2 कुरीन्थियो 3 - बारेली पावरी

मसिही जीवतलो चिट्ठी

¹ काय आपनु पोछा आपनी बोढाई कोरणे बाज गोया? नि ती आमु काजे दिसरा सारखो सिफारीसोन चिट्ठी तुमरेनचा लावनो कि तुमरेनचा गोथो लेनो छे?

² आमरी चिट्ठी तुमुत छे, जो आमरा मोनोन लिखली छे एने तीनाक आखा माणसे उवेखतला एने भोनतेला.

³ यो प्रगट छे कि तुमु मसिहन चिट्ठी छे, जीना काजे आमु सेवकोन सारखो लिख्या एने चो शाईसी नी बाकीन जीवतला परमेश्वरोन आत्मासी दोगळान पाटीपोर नी बाकीन मोनोन माणसोन रुपोन पाटीपोर लिखला छे.

पौलुसोन क्षमता

⁴ आपनु मसिहन लारे परमेश्वर पोर ओसुत भुरसू मेकतला छे.

⁵ यो नी कि आपु खुद इनान लायक छे कि आपना तोरोफसी काहीन वातोन विचार कोर सोके बाकीन आमरी लायकी परमेश्वरोन तोरोफसी.

⁶ जू आपनु काजे नोवला वायदान सेवक बोननेन लायक बी बोनाव्यू बुलनोन सेवोक नी बाकीन आत्मान, शब्द मारतलु छे एने आत्मा जीवाळतलु छे.

नोवला वायदान महिमा

⁷ ओगर मोतोन चू वायदु जेरो लिखलो दोगळा पोर बोनावलो होतो, न्या तोक विजावो होयो कि मुसान मुयो पोर विजावोसी जो कोम होयतो होतो, इस्राईल तेरे मुयो पोर नोजोर नी नाक सोकता होता.

⁸ ती आत्मान वायदु ओवी बी ताकत वावो काहा नी होय?

⁹ काहाकि जेतार गुणावा ठेरावने वावी वायदु विजावो होतो ती धोरमी ठेरावने वावी वाचा ओवी बी विजावो काहा नी रोयो?

¹⁰ एने जो विजावो होतो चो बी तीना विजावासी, विजावो होयनेसी जीनासी बोढीन विजावो होतो काय विजावो नी ठेहेऱ्यो.

¹¹ काहाकि जेतार चो जेतार कोम होयतो होतो विजावो होतो जो चो पाकु रोयसे एने बी विजावू काहा नी होयो.

¹² इनान कोरता ओसी आस राखीन आमु हिंमतसी कोयतेला एने मुसा सारखु नी जू आपना मुयो पोर पोरदु मेक लेदलु काहाकि इस्राईल तिनी घोळनेवावी विजावा भूनी कुदू नी देखे.

¹³ एने मुसान सारखो नी, जू आपना मुयो पोर पोडदु नाख रोयू होतु काहाकि इस्राईल तिना घोटने वावा तेजोन आखरी नी देखे.

¹⁴ बाकीन चू मतीमंद होय गोयू काहाकि आज तोक जुनलु नियम भोननेन टेमे तिंदरा मोनोमा चू पोडदु मेकाय रोयतलु बाकीन चे मसिहमा उठ जातला छे.

¹⁵ आज तोक जेतार कोदि मुसान किताब पोढाय जातली छे ती तिंदरे मोनोमा पोडदु मेकाय रोयतलु.

¹⁶ बाकीन जेतार कोबी तिंदरो मोन प्रभू भूनी फिरसे तेत्यार चू पोडदु निकवी जासे.

¹⁷ प्रभू ते आत्मा छे एने जा का प्रभून आत्मा छे चा स्वतंत्रता छे.

¹⁸ बाकीन जेतार आपनु आखान उगाळला चेहरासी प्रभून विजावो इना रितीसी छे, जिना रितीसी आरसामा प्रभून लारे जू आत्मा छे आपनु तीना विजावा रुपमा थुलो-थुलो कोरीन बदलता जातला छे.