2 कुरीन्थियो 13 - बारेली पावरी

आखरी चेतावनी

¹ हिमी तिसरी कावार मे तुमरेनचा आवो, दुय नीती तीन गोवान मुयोसी होर एक वात ठेराय जासे.

² जोसू मे जेतार दुसरी कावार तुमरे साते होतु, तोसुत हिमी नांबे रोयतू जायीन तिना माणसोसी जे पेहेले पाप कोऱ्या, एने दिसरा आखा माणसोसी हिमी पेहेलेसी कोय दोम कि ओगर मे पोछु आवीस ती नी छुळो.

³ काहाकि तुमुक ते एरू सबूत जुवे कि मसिह मारेमा बुलतलु छे, जो तुमरेन कोरता कोम ताकत नी होय बाकीन तूमरेमा ताकत छे.

⁴ चू कोम ताकतोन वोजेसी ख्रुस पोर चोळी ते गोयू, ते बी परमेश्वरोन ताकतसी जीवतलु छे आमु बी तेरेमा कोम ताकत वावा छे, बाकीन परमेश्वरोन ताकतसी जो तुमरेन कोरता छे, तेरे साते जीवसु.

⁵ आपना खुदो काजे पारखू कि भुरसामा होय कि नी होय. आपना खुदजे पारखू, काय तुमु आपना बारामा यो नी जानतला कि येसु मसिह तुमरेमा छे? नीती तुमु पारखमा बिन कामोन निकवला छे.

⁶ बाकीन मारी आस छे कि तुमु जान लेसू कि आमु बिन कामोन नी होय.

⁷ आमु आपना परमेश्वरोनचा जी प्रार्थना कोरतेला छे, कि तुमु काहणी बुराई नी कोरे, इनान कोरता नी कि आमुक खोरलो देखाय पोळे, बाकीन इनान कोरता कि तुमु बुराई कोरु, भोले आमु बिन कामोन ठेराये.

⁸ काहाकि आमु खोरलायीन खिलापमा काय नी कोर सोकतला, बाकीन खोरलायीन कोरता कोर सोकतला छे.

⁹ जेतार आमु कोम ताकत वावा छे, एने तुमु ताकत वावा छे, ती आमु खुश होयतला छे, एने जी प्रार्थना बी कोरतेला छे कि तुमु पुरा होय जाये.

¹⁰ इनान वोजेसी मे तुमरा वासा पोछोव जी वात सिकाळो, कि जागे रोयीन मेसेक तिना होकोन अनसारे जिनान प्रभू बिगाडनेन कोरता नी बाकीन बोनावनेन कोरता मेसेक आपलु छे, कोळक रितीसी काहीन कोरनो नी पोळे.

सुभेच्छा एने आशिष

¹¹ आखरी, हे भाशो, खुश रोयू; पुरा बोनता जावू; धीर राखू; एकुत मोन राखू; मेवायीन रोयू एने मोंग एने शांतीन आपनेवावू परमेश्वर तुमरे साते रोयसे.

¹² एक दिसरा काजे चुखला गुवासी नमस्कार कोरु.

¹³ आखा चुखला माणसे तुमुक नमस्कार कोरे.

¹⁴ प्रभू येसु मसिहन दया एने परमेश्वरोन मोंग एने पवित्र आत्मान सहभागीता तुमरे साते रोयती रोये.