2 कुरीन्थियो 12 - बारेली पावरी

पौलुस काजे दर्शन

¹ हिमी तोक मोटाय कोरनो मारेन कोरता वारू नी होय तीबी कोरनो पोळतेलो छे; इनान कोरता मे प्रभून आपलो दर्शन एने देखाळला वाते कोरिस.

² मे मसिहमा एक माणसो काजे उवखलु; चौदा साल होया कि नी मालूम डीलो साते, कि डील छुळीन, बाकीन परमेश्वरोक मालूम छे; ओसलु माणूस तीसरे सोरग तोक चूटाय गोयू.

³ मे ओसला माणूस काजे उवखतेलु. नी मालूम डीलो साते, नी मालूम डीलोक छुळीन परमेश्वरुत उवखतलु छे.

⁴ कि सोरगोमा चूटाय गोयू, एने ओसला वाते सोमव्यू जे कोयनेन नी होय; एने जेरो मुयो पोर लावनो मोनसो काजे वारू नी होय.

⁵ ओसला माणसो पोर मे ते मोटाय कोरीस, बाकीन मार पोर मारी कोमजुरी काजे छुळीन, मारा बारामा मोटाय नी कोरो.

⁶ काहाकि ओगर मे मोटाय कोरणे हिंडो तीबी बिन ओकल्यु नी होयो, काहाकि खोरलो बुलीस; तीबी रुकाय जातलु छे, ओसो नी होयनो जुवे कि जोसो कुदू मेसेक देखतलो छे, नीती मारेसी सोमवतलो छे, मेसेक तिना गोथो बोढीन सोमजू.

डीलोमा काटा

⁷ इनान कोरता कि देखाळला वातोसी मे जादासी फुल नी जाम, मारा डीलोमा एक काटू गुपाय गोयू, मतलब भुतडान एक दुत मेसेक धुमा देदू काहाकि मे फुल नी जाम.

⁸ एरे बारामा मे प्रभूसी तीन कावार विनता कोऱ्यु कि मारेसी यु नांबे होय जाय.

⁹ बाकीन चू मेसे काजे कोयू, “मारी दया तारेन कोरीन सोवटी छे; काहाकि मारो ताकत कोम ताकतसी पुरो होयतेली छे” इनान कोरता मे मोटला खुशीसी मारी कोम ताकत पोर मोटाय कोरीस, मसिहन ताकत मारे पोर छावाय रोयतली छे.

¹⁰ इनान वोजेसी मे मसिहन कोरता कोम ताकत वावामा, एने बुराईमा, एने गोरबायमा, एने उपद्रोव मा, एने तोकलीतमा खुश छे; काहाकि जेतार मे कोमजुर होयतलु छे तेत्यार ताकत वावू होयतलु छे.

अगवान लक्षण

¹¹ मे बिन ओकल्यु ते बोन्यू, बाकीन तुमुत मेसेक यो कोयनेन कोरता मोजबुर कोऱ्या. तुमुक ते मारी बोढाई कोरनो जुवतो होतो, काहाकि हिमी मे कायबी नी होय, तीबी तीनुक मोटलासी मोटला प्रेषितोन सी काहना वातोमा कोम नी होय.

¹² प्रेषितोन लोक्षने बी तुमरे इचमा आखा रितीन धीर पुठी निशाणी, एने नेवलाय कामे, एने ताकत कामोसी देखाळाय गोया.

¹³ तुमु काहणी वातोमा दिसरी मंडवीमा गोथा कोम होता निस्ता इनाम कि मे तुमरे पोर आपनु भार नी नाख्यू मारो यो अन्याय माफ कोरु.

मंडवीन कोरता मोंग

¹⁴ देखू, मे तिसरी कावार तुमरेनचा आवनेन कोरीन तीयार छे, एने मे तुमरे पोर काहनु भार नी मेको, काहाकि मे तुमरो धोन नी बाकीन तुमु काजे जुवे काहाकि पुऱ्या काजे आसी-बासान कोरता धोन एखठो कोरनो नी जुवे, बाकीन आसी-बासा काजे पुऱ्यान कोरता.

¹⁵ मे तुमरी आत्मान कोरता जादा खुशीसी खोरचू कोरिस, बाकीन तुमु भी खोरचू होय जासे काय जोतरा बोढीन मे तुमरे पोर मोंग कोरतेलू छे, तोतरोत घोटीन तुमु मारेसी मोंग राखसु?

¹⁶ ओसो होय सोकतलो छे कि मे तुमरे पोर भार नी मेक्यू, बाकीन हुशारीसी तुमु धुकू आपीन फोसाळ देदु.

¹⁷ भोलोत, जीनुक मे तुमरेनचा मूकल्यु, काय हीनुमा गोथा काहनासून लारे नी छोळ कोरीन तुमरेसी काहीन ली लेदू?

¹⁸ मे तीतुस काजे सोमजाडीन हेरे साते तिना भाश काजे मूकल्यु, ती काय तीतुस छोळ कोरीन तूमरे सी काहीन लेदू? काय आमु एकुत आत्मान चालना पोर नी चाले? काय एकुत वातो पोर नी चाले?

¹⁹ तुमु हिमी तोक सोमोज गोया होसे कि आमु तुमरे सामने मुयो पोर मूय कोर रोया आमु ते परमेश्वर उपस्तीती जानीन मसिहमा बुलतला छे, एने हे मोंगावा, आखा वाते तुमरा बोढतीन कोरीन कोय रोया.

²⁰ काहाकि मेसेक बिक छे, कोदि ओसो नी होयनो जुवे कि मे आवीन जोसो जुवे, तोसो तुमुक नी देखो; एने तुमरेमा झोगळू, डाहा, रीस, खिलाप, रीस, चुगली, अभिमान एने झुटा छे.

²¹ एने कोदि ओसो नी होयनो जुवे कि मारू परमेश्वर मारो पोछोव तुमरेनचा पोछो आवने पोर दोबाव नाखे एने मेसेक ज्यादा जोनान कोरता पोछो एने दुख कोरनो पोळे, जे पेहेले पाप कोरला होता एने भुंडला कामे एने भुंडलु विचार एने लुचळायसी, जो चे कोऱ्या, मोन नि फिराव्या.