2 कुरीन्थियो 11 - बारेली पावरी

तिंदरे भुरसान लायकोन कोरता चिंता

¹ ओगर तुमु मारो मूर्खता काजे सोहोनेन कोर लेता ती काय भोलो होयतो; होव मारो सोह लेवू.

² काहाकि मे तुमरा बारामा परमेश्वरोन आवाजोन आस लागाळतलु, इनान कोरता मे एकुत ओदमी पुठी तुमरी जूळावनी कोरतेलू तुमु चुखला कुवारी सारखा मसिह काजे सोप देवू.

³ बाकीन मे बिहतेलु कि जोसू घोळसु आपनी चोतूरायसी हव्वा बायर काजे फोसाळ्यु, तोसुत तुमरो मोन इना सुधा एने चुखलासी जे मसिह साते होयनो जुवे, काहनोत नाश नी होयनो जुवे.

⁴ ओगर कुदु तुमरेनचा आवीन काहना दिसरा येसुन काम कोरे, जेरु प्रचार आमु नी कोऱ्या; नीती काहनु ओवी आत्मा तुमुक जोळे जू पेहेले नी जोळलु होतु; नीती कुदू वारली खोबर सोमवाळतलु तुमु पेहेले नी मान्य, ती तुमु तीनाक सोह लेता.

पौलुस एने झुटा अगवा

⁵ मे ते सोमोजतलु कि मे काहणी वातोमा मोटला प्रेषितमा गोथू कोम नी होय.

⁶ ओगर मे बुलनेमा अनाडी होसे, ते बी ग्यानमा नी. आमु तीनुक होर वातोमा आखा भातीन तुमरेन कोरता देखाळ देदु.

⁷ काय इनाम मे काहीन पाप कोऱ्यु कि मे तुमुक परमेश्वरोन वारली खोबर पुरो-पुरो सोमवाळ्यु; एने खुदो काजे नेचू कोऱ्यु कि तुमु उचा होय जाणो जुवे.

⁸ मे ओवी दिसरान मंडव्या काजे लुट्यु, मतलब मे तिंदरे जुव दाहाळकी लेदू काहाकि तुमरी सेवा कोरो.

⁹ एने जेतार मे तुमरे पुठी होतु एने मेसेक कोम पोळ्यो, ती मे कुदा पोर भार नी नाख्यू, काहाकि जे भाशे मकीदुनीयामा गोथा आवीन मारी कोमी काजे पुरो कोऱ्या; एने मे होर वातोमा खुदो काजे तुमरे पोर भार कोरनेसी रुक्यू, एने रुक रोयीस.

¹⁰ ओगर मसिहन खोराइ मारेमा छे कि अखाया देसोमा कुदू इनी मोटायकी काजे नी रुके.

¹¹ काहा? काय इनान कोरता कि मे तुमरे पोर मोंग नि कोरतेलू? परमेश्वर यो जाने.

¹² बाकीन यो मे कोरतेलू, चोत कोरतू रोयीस कि जे माणसे कुहराये हेरतेला तीनुक मे कुहराय नी जोळने दोम, काहाकि जिनी वातोन मोटाय कोरतेला, तिंदरेमा चे आमरे सारखा ठेरे.

¹³ काहाकि ओसा माणसे झुटा प्रेषित, एने तोकलीत पुठी काम कोरणे वावा एने मसिहन प्रेषितोन रूप कोरणे वावा छे.

¹⁴ जी काहीन नोवलायीन वात नी होय काहाकि भुतडू खुद भी तेजस्वी सोरग दूतोन रूप धारण कोरतेलू.

¹⁵ इनान कोरता तेरा सेवक भी धोरमान सेवकोन सारखो रूप लेये, ती काय मोटी वात नी होय, बाकीन तिंदरो आखरी तिंदरा कामोन अनसारे होयसे.

येसु मसिन कोरता दुख झेलणो

¹⁶ मे ओवी कोयो, कुदू मेसेक बिन ओकल्यु मा सोमजू; नीती बिन ओकल्यु सोमजीन मारो सोह लेवू, काहाकि थुलोक मे बी मोटाय कोर सोको.

¹⁷ इना बिंधास मोटायमा जो काहीन मे कोयने बाज रोयू, चू प्रभून आग्यान अनसारे नी बाकीन बेओकली सी कोयो.

¹⁸ जेतार कि लोकेत माणसे डीलोन अनसारे मोटाय कोरतेला, ती मे बी मोटाय कोरिस.

¹⁹ तुमु ते सोमोजदार होयीन खुशीसी बिन ओकोलोन सोह लेतला से,

²⁰ काहाकि जेतार तुमुक कुदू पावोर बोनाव लेये नीती खाय जाय, नीती फोसाळ देये नीती खुदो काजे मोटू सोमजे नीती तुमरा मुयो पोर थापुळ देये, ती तुमु सोह लेतला.

²¹ मारो कोयनो अपमान रिती पोर छे; सोमजू आमु एरेन कोरीन कोमजुर सारखा होता बाकीन जिनी कानली वातोमा कुदू हिंमत कोरतू होय मे बी ओकोलसी हिंमत कोरो.

²² काय चेत इब्री छे? मे बी छे, काय चे इस्राईल छे? मे बी छे. काय चेत अब्राहामन पिढी छे? मे बी छे.

²³ काय चेत मसिहन सेवक छे. मे गांडान तोसु कोयो, मे तिंदरेसी बोढीन छे, जादा मेहनत कोरणेमा; घोळी-घोळी बोंदी होयनेमा; चाबका खाणेमा; घोळी-घोळी मोतोन सोंकोटमा.

²⁴ पाच कावार यहुदिन उंतालीस फोटका खादलु.

²⁵ तिन कावार मे थापळ्यान मार खादलु; एक कावार मार पोर दोगळ मार होयली; तीन कावार ढोंड्यो जीना पोर मे चोळ रोयलु होतु, तूट गोयलो; एक रात-एक दाहळू मे दोरीयामा रोयू,

²⁶ मे घोळी-घोळी यात्रामा; नोंदमा, सोंकोटमा; डाखून सोंकोटमा; आपना जाती वावान सोंकोटमा; दिसरा जातीन गोथा सोंकोटमा; गावोन सोंकोटमा, बोयडान सोंकोटमा; दोरीयान सोंकोटमा; झुटा भाशोन इचमा सोंकोटमा रोयू.

²⁷ काम एने मेहनत घोळी-घोळी जागतू रोयनेमा भूकला-तीसलामा; घोळी-घोळी उपास कोरणेमा; सेवामा; उगाळलु रोयनेमा;

²⁸ एने दिसरा वातोक छुळीन जिंदरा वाते मे नी कोयतू, आखा मंडवीन चिंता दाहळीन मेसेक दाबतली.

²⁹ जिनान कोमजरीसी मे कोमजुर नी होयतलु? कुदान ठूकर खाणेसी मारो जीव नी दुखतलु?

³⁰ ओगर मोटाय कोरनो जोरुरी छे, ती मे आपनी कोमजूरीन वातो पोर मोटाय कोरीस.

³¹ जिनान कोमजूरीसी मे कोमजुर नी होयतलु? कुदान ठूकर खाणेसी मारो जीव नी दुखतलु प्रभू येसुन परमेश्वर एने बास जू कायम सोयावा छे, जानतलु छे कि मे झूट नी बुलतलु.

³² दमिश्कोमा अरीतास राजा भूनी गोथो जे सुभेदार होता, चे मेसेक धोरणेन कोरता दमिश्कोन सोहोरोमा पहरु बोसाळता होता.

³³ एने मेसेक खिल्लामा बोसाळीन, खिडकिन माईन भीतडा पोर गोथा उताऱ्या, एने तिंदरा हातोसी मे वाच गोयू.