2 कुरीन्थियो 10 - बारेली पावरी

आत्मिक लोळाय

¹ मे चू पौलुस जू तुमरे सामने नम्र छे बाकीन तुमरे पोछोव तुमरेसी कोळक रोयतेलु, तुमु काजे मसिहन नम्रता एने नोरमाईन वजेसी सोमजतेलु.

² मे विनता कोरो कि तुमरे सामने हिंमत कोरीन धीर धोरणो नि पोळे, जोसो मे काहना माणसो पोर जे आमु काजे डीलोन अनसारे चालने वावा सोमजतेला, धीर धोरणेन विचार कोरे.

³ काहाकि हांजू तोक आमु डीलोसी चालतला फिरतेला, ते बी डीलोन अनसारे नि लोळतेला.

⁴ काहाकि आमरी लढाइ हत्यार डीलोन नि होय, पुन गळो काजे पाळणेन कोरता परमेश्वरोन लारे ताकत छे.

⁵ इनान कोरता आमु विचारोन एने होर एक मोटली वातोन, जो परमेश्वरोन उवखने खिलापमा उठतली, खोंड लेतला एने होर एक मोर्जी काजे बोंदी बोनावीन मसिहन आग्या मानने वावा बोनाव देतला.

⁶ एने तीयार रोयतेला कि जेतार तुमरो आग्या आपनो पुरो होय जाय, ती होर एक भातीन आग्या तुडने वावा काजे दोंड कोरे.

पौलुसोन होक

⁷ तुमु इनी वातो काजे देखू, डूवा ओगोव छे ओगर कुदा काजे आपने खुदो पोर यु भुरसू होये कि मे मसिहन छे, ती चू यो बी जान लेनो कि जोसू चू मसिहन छे तोसाच आमु बी छे.

⁸ काहाकि ओगर मे इना होकोन बारामा ओवी बी मोटायकी देखाळो, जू प्रभू तुमरे बिगाडनेन कोरता नि पुन बोढतीन कोरता आमुक आपलु छे, ती लाजवायनो नि.

⁹ यो मे इनान कोरता कोयो कि चिट्ठीन लारे तुमुक बिहाळणे वावु नि ठेरे.

¹⁰ काहाकि चे कोयतेला, “तारी चिट्ठी ते बिहने वावी एने भारलो छे, बाकीन जेतार चू सामने आवतेलु, ती चू डीलोन कोमजुर एने वक्तव्यमा हलकू मालूम पोळतेलु.

¹¹ जू ओसू कोयतेलु, चू यो सोमजी लेये कि जोसो वासा पोछोव आमरो वचन छे; तोसोच तुमरे सामने आमरो काम बी रोयतलो.”

पौलुसोन होकोन हद

¹² काहाकि आमुक यो हिंमत नि होय कि आमु खुदो काजे तिंदरेमा गोथा कोसा कुदा पुठी नीती चे तीनु काजे आपनुक भेटाळे, जे आपनी बोढाई खुद कोरतेला, एने खुदो काजे आपोसमा गिनतला मापतेला एक दिसरा पुठी मेवान बिन ओकली ठेरायतेला.

¹³ आमु ते हदसी बारथे मोटायकी कोदि नि कोरजे, बाकीन तीना हद तोक यो परमेश्वर एरेन कोरता ठेरायलु छे, एने तीनामा तुमु बी आव गोयला छे, एने तिनान अनसारे मोटायकी बी कोरसू.

¹⁴ काहाकि आमु आपना हदसी बारथे खुदो काजे बोळावनो नि जुवता जोसा कि तुमरेनचा तोक पुगाळने वावा होता, बाकीन मसिहन वारली खोबर सोमवाळता जायीन तुमरेनचा तोक पुग गोयला छे.

¹⁵ आमु हदोन बारथे दिसरान मेहनतमा मोटायकी नि कोरता; बाकीन आमुक आस छे कि जे तुमुक भुरसू बोढावता जासे तेत्यार-तेत्यार आमु आपना हदोन अनसारे तुमरे वजेसी ओवी बी बोढता जासू,

¹⁶ काहाकि आमु तुमरी हदसी ओगोव जायीन वारली खोबर सोमवाळ जे, एने यो नि कि आमु दिसरान हदोन माहाय कामो पोर मोटायकी कोरजे.

¹⁷ बाकीन जू मोटाय कोरे, चू प्रभू पोर मोटाय कोरे.

¹⁸ काहाकि जू आपनी खुदोन बोढाई कोरतेलु चू नि, बाकीन जिनान बोढाई प्रभू कोरतेलु चोत स्वीकार कोरतेला.