2 कुरीन्थियो 1 - बारेली पावरी

स्वागत

¹ पौलुसोन भूनी गोथो जी परमेश्वरोन मोर्जी मसिह येसुन प्रेषितोन छे, एने भाश तीमथी भूनी गोथो परमेश्वरोन तिनी मंडवीन नावे, यो कुरिन्थमा छे, एने आखा अखायान चुखला माणसोन नावे.

² आमरू बास परमेश्वर एने प्रभू येसु मसिहन भूनी गोथो तुमुक दया एने शांती जोळती रोये.

शांतीन परमेश्वर

³ आमरा प्रभू येसु मसिहन परमेश्वर एने बासो काजे धन्यवाद होय, जू दयान बास एने आखा रितीन शांतीन परमेश्वर छे.

⁴ चू आमरा आखा दुखोमा शांती आपतलु छे; काहाकि आमु तिनी शांतीन वोजेसी जू परमेश्वर आमुक आपतलु छे, तीनुक भी शांती आप सोके जो कानला रितीन दुखोमा छे.

⁵ काहाकि जोसो मसिहन दुखोमा आमु जादा भागीदारी होयतला छे, तोसात आमु शांतीमा भी मसिहन लारे जादा सहभागी होयतला छे.

⁶ ओगर आमु दुख आपतला छे, ती यो आमरी शांती एने छुटकारान कोरता छे; एने ओगर शांती आपतला छे, ती यो तुमरा शांतीन कोरता छे; जेरु प्रभाव तुमु धीर साते तिना दुखो काजे सोहोनेन कोर लेतला छे, जीनाक आमु भी सोहोनेन कोर लेतला छे.

⁷ आमरी आस तुमरा बारामा पाकी छे; काहाकि आमु जानतला छे कि तुमु जोसा आमरा दुखोमा, तोसात आमरा शांतीमा भी भागीदार छे.

दुखमा गोथा वाचाडे

⁸ हे भाशो, आमुक नी जुवतो कि तुमु आमरा तिना दुखोमा ओनजानला रोये, जे आसियामा आमरेपोर पोळ्यो; आमु ओसा भारी भारोसी दाबाय गोयला होता, यो आमरा ताकतोन बारथे होतो, न्या तोक कि आमु जीवन सी बी हात धुव बोसला होता.

⁹ बाकीन आमु आपना मोनोमा सोमोज गोयला होता कि आमरेपोर मोरनेन आग्या होय गोयली छे, काहाकि आमु आपनु भुरसू नी राखे बाकीन परमेश्वर जू मोरला काजे जीवाळतलु छे.

¹⁰ चू आमुक मोरनेन ओसला मोटा दुखोमा गोथू वाचाळ्यु एने वाचाडसे; एने तीना पोर आमरी जी आस छे कि चू ओगोव वाचाडतू रोयसे.

¹¹ तुमु बी मेवायीन प्रार्थनान लारे आमरी मदत कोरसु कि जो वरदान जादा जोनान लारे आमुक जोळ्यो, तिनान वोजेसी जादा माणसे आमरे भूनी गोथा धन्यवाद कोरे.

चुखली सोच

¹² काहाकि आमु आमरा दिमाकोन इनी गोवायी पोर घोमंड कोरतेला छे, कि जोगोमा एने खास कोरीन तुमरे इचमा आमरो जीवन परमेश्वरोन लायक ओसलो पवित्र एने खोराइ साते होतो, जो डीलोन ग्यानसी नि बाकीन परमेश्वरोन दया साते होतो.

¹³ आमु तुमुक ओवी काय नी लिखता, निसतो यो तुमु भोनतला एने मानतला बी छे, एने मेसेक आस छे कि आखरी तोक बी मानता रोयसु.

¹⁴ ओसो तुमरेमा गोथा कोतरा मान लेदला छे कि आमु तुमरा मोटायन वोजा छे, तोसोच तुमु बी प्रभू येसुन दाहळे आमरेन कोरता मोटायन वोजा ठेरायसु.

यात्रामा बदलाव

¹⁵ इना भुरसासी मेसेक लागतो कि पेहेले तुमरेनचा आवो कि तुमुक एक ओवी दान जोळे;

¹⁶ एने तुमरेनचा गोथू जायीन मकीदुनीया काजे जाम, एने पोछु मकिदुनिया गोथू तुमरेनचा आवो; एने तुमु मेसेक यहुदिया भूनी काहीन नांबे तोक पुगाळ देजू.

¹⁷ इनान कोरता मे जी मोर्जी कोऱ्यु कि ती काय मे हुशारी देखाळ्यू? नीती यो कोरणे हिंडो काय डीलोन अनसारे कोरणे जुवतलो छे कि मारा वातोमा “होव, होव बी कोरो एने नी बी कोरो?”

¹⁸ परमेश्वर खोरलु गोवा छे कि आमरा तीना वचनमा जो मे तुमु काजे कोयू “हाव एने नी दुयू नी जोळ जातला.”

¹⁹ काहाकि परमेश्वरोन पुऱ्यु येसु मसिह जेरो आमरे लारे मतलब मारा एने सिलवानुस एने तीमथीन लारे तुमरे इचमा प्रचार होयू, हिनामा “हाव” एने “नी” दुयू नी होता, बाकीन हिनामा “होव कि होव होय.”

²⁰ काहाकि परमेश्वरोन जोतरा वायदू छे, चे आखा हिनामा “होव” साते छे इनान कोरता हिंदरे लारे आमेन होयो कि आमरे लारे परमेश्वरोन महिमा होये.

²¹ एने जे आमु तुमरे साते मसिहमा पाका कोरतेला छे, एने जे आमरू अभिषेक कोऱ्यु चू परमेश्वर छे,

²² जू आमरेपोर छापू बी लागाळ देदलो छे एने बोयानमा आत्मा काजे आमरा मोनोमा आप्यू.

²³ मे परमेश्वर काजे गोवा कोरीन कोयो कि मे हिमी तोक कुरिन्थमा इनान कोरता नी आव्यु, कि मेसेक तुमरे पोर दया आवती होती.

²⁴ यो नी कि आमु भुरसान बारामा तुमरे पोर प्रभूता जोताळनो जुवतो होतो; बाकीन तूमरी खुशीमा मोदतगार छे काहाकि तुमु विश्वासी स्थिर रोयतला छे.