1 तीमथी 6 - बारेली पावरी

मसिही सेवकोन अनुकरण

¹ जोतरा दासोन जुवळा तोवे छे, चे आपना-आपना मालिक काजे आदर कोरे, काहाकि परमेश्वरोन नाव एने प्रचारोन बुराई नी होई.

² जिंदरु मालिक विश्वासी छे तीनुक होयू भाश होयनेन वोजेह कमी नी माने, एने हिंदरी चाकरी कोरे काहाकि या गोथू फायदू लेने वावू विश्वासी एने मोंगावू छे इनू वातोन प्रचार आपतू रोयु एने सोमजाडतू रोय.

³ जर कुदू दिसरे भातीन प्रचार कोरतू होसे एने वारली वातोन आमरा प्रभू येसु मसिहन वातो काजे नी मानतू होसे, जो भोक्तीन अनसारे छे.

⁴ ती होयू अभिमानी होय गोयू, एने काय नी जानतलु नीती हिनाक झोगळू एने वातो पोर शब्द लोळाय कोरनेन बिमारी छे, जिना पुठी मोटाय एने लोळाय, एने बुरायीन वाते एने भुंडला-भुंडला शंका,

⁵ एने हीनु माणसोन उदळूत लोळाय, होयतेली छे, एने होया खोरली वातोन गोथा ओलोग होय गोयला छे.

⁶ पुन खुशी साते भोक्ती मोटी कोमाय छे.

⁷ काहाकि नी आपनु जोगोमा काहीन लाव्या एने नि काय लीजाय सोकसू.

⁸ जर आपने पास खाणे एने पेहेरनेन काय छे ती इनू पोर खुश रोयनो जुवे.

⁹ पुन जू मोटू बोननेन कोरसे ती चू पारख एने फांदा एने घोणा सोवटा रिकामा एने नुकसान वावा लालूचमा फोसला छे जे माणूस काजे बिगाड देतली छे.

¹⁰ काहाकि पोयशान लालच आखा भातीन बुराइन थुळ छे, तीनाक हेरनेन कोरीन कोशिश कोरीन भुरसाम चा गोथा भटकीन आपनु काजे भाती भातीन दुखोसी छलनो बनाव लेदलु छे.

वारलु पछतावू

¹¹ पुन हे परमेश्वरोन माणसे, तू इनी वातोनचा गोथू ढास एने धारमिकता, भोक्ती, भुरसू, मोंग, धीर एने नम्रपणान पोछोव पोड.

¹² भुरसान वारली कुस्ती लोळाय; एने इना ओमोरकाईन जीवन काजे धोर ले, जिनान कोरता तू बुलाय गोयू एने घोणा सोवटा गोवान सामने वारलु अंगीकार कोरलु होतु.

¹³ मे तुसेक परमेश्वरोन जू आखा काजे जीवतलु राखतलु, एने मसिह येसु काजे गोवायी कोरीन जू पुन्तियुस पिलातूसन ओगोव वारलु रोयलु जू आग्या आपो,

¹⁴ कि तू आमरा प्रभू येसुन मसिहन प्रगट होयनेन तोक इनी आग्या काजे चुखो एने निरदोष राखे.

¹⁵ जीनाक चू वारले टेमो पोर देखाळसे, जू सोयावू एने एखला अधिपती एने राजान राजा एने प्रभून प्रभू छे.

¹⁶ एने ओमोरकाई निसतो तेरो छे एने चू लेके विजावामा रोयतलु छे, एने नि तीनाक काहनलु माणूस नि देख्यू एने नी कोदि देख सके, हेरी महिमा एने राज्य हमेशा रोयसे. आमेन.

मालदार काजे कोयनो

¹⁷ इनी संसारन मालदार माणसोक आग्या आप कि होया लालची नी होय एने चूलबुल धोनोपोर आस नी कोरे, पुन परमेश्वर पोर जू आमरे सुखोन कोरता आखो एने घोनो सोवटो आप देतलु.

¹⁸ चे वारलो कोरे, एने वारला कामोमा मालदार बोने एने उदार एने मदतमा हमेशा उभू रोये.

¹⁹ एने ओगलान कोरता एक वारलु पायु राखे कि खोरला जीवन काजे ताबामा कर लेये.

भुरसान राखवावी

²⁰ हे तीमथी जो तुसेक आपलो छे तेरी राखवावी कोर; एने जिना ग्यान काजे ग्यान कोयनेन भूल छे, हेरी भुंडली वात एने खिलापोन वातोन गोथू ओलोग रोये.

²¹ कोतरा जोना इना ग्यानोन अंगीकार कोरीन भुरसान चा गोथा भटक गोयला छे. तुमरे पोर दया होयती रोये.