1 तीमथी 4 - बारेली पावरी

झुटा प्रचार सी सावधान

¹ पुन आत्मा साफ रितीसी कोये कि आवने वावी टेममा कोतरा माणसोन फोसाळने वावी आत्मा, एने भुंडली आत्मान शिक्षा पोर मन लागाळीन भुरसासी भटक जासे.

² यो इनू झुटा माणसोन घोमंडोन वजेसी होयसे जेरु ग्यान जसो धोपतला आगठामा लुहळे कोरीन डामाय गोयलु छे.

³ जू वियाव कोरनेसी रुकसे, एने खाणेन दिसरा चीजे अलग रोयनेन आग्या आपसे, जीनुक परमेश्वर इनान कोरता सजाड्यू कि एने खोरला पारखन्या काजे धन्यवादन साते खासे.

⁴ काहाकि परमेश्वरोन बोनावली हर एक चीज वारली छे एने कानली चीज मोना कोरणेन लायक नि होय, पुन यो कि धन्यवादन साते खाणो जुवे.

⁵ काहाकि परमेश्वरोन वचन एने प्रार्थनान लारे चुखो होय जाये.

मसिह मोताळू सेवक

⁶ अगर तू इनू भाशो काजे सोमजाडतू रोयसे, ती मसिह येसुन वारलु दास बोनसे; एने भुरसू एने हेरा वारला प्रचारोन वातो पोर, जो मानतू आव रोयु, तारू देख भाव होयतो रोयसे.

⁷ पुन अपवित्र एने दाहळीन काहनास गोथू ओलोग छे; एने भोक्तीन तीयारी कोर.

⁸ काहाकि डीलन तीयारी सी कोम फायदु होयतलु छे, पुन भोक्ती आखा वातोन कोरता फायदान छे, काहाकि इने टेमोन एने आवने वावा जीवनोन बी वायदू इनान कोरता छे.

⁹ यी वात छाचलीन एने हर भातीन माननेन योग्य छे.

¹⁰ काहाकि आमु मेहनत एने कोशिश एरेन कोरता कोरतेला छे कि आमरी आस हीना जीवतला परमेश्वर पर छे, जू आखो माणसोन एने खास विस्वास्यान छुटकारू आपने वावु छे.

¹¹ इनी वातोन आग्या आप एने सिकाळतु रोय.

सेवकाई पोर ध्यान देणो

¹² कुदू तारी जुवानी काजे कमी नी समजनो जुवे; पुन वचन एने चाल चलन एने मोंग एने भुरसू एने चुखलामा विस्वास्यान कोरता वारलो होय जासे.

¹³ जेतार तोक मे नी आवो तेत्यार तोक पवित्र शास्त्रो भोनने एने प्रचार एने सिकाळनेमा तीयारीमा रोयू.

¹⁴ हीना वरदानोन कोरता जू तार पुठी छे एने भविष्यवाणी पुठी डाह-डाहान हात मेकनेन टेमे तुसेक जोळलो होतो, बे फिकर मा रोये.

¹⁵ इनी वातो काजे सोचतू रोयजी एने इनुमा तारो मन लागाळ रोयजी, काहाकि तारी बढती आखा प्रगट होये.

¹⁶ तुमरी एने तुमरा प्रचारन तोपास कोर. इनू वातो पोर एक जागे रोय, काहाकि अगर ओसू कोरतू रोयीस ती तू तारा एने तारा सोमोवने वावान कोरता बी छुटकारान वोजा होयसे.