1 तीमथी 3 - बारेली पावरी

अध्यक्षन योग्यता

¹ यी वात खोरी छे कि जू पुढारी होयनेन कोरतेलू, होयू वारला कामोन मोर्जी कोरतू छे.

² यो महत्वान छे कि पुढारी निरदोष होय, एने एकुत बायरोन आदमी, धीर धोरन्यू, घाटावू, वारलु पाहांतराय कोरने वावू, एने सिकाळनेमा हुशार होसे,

³ दारकुट्यू या ठूकने वावू नि रोयनो जुवे; बाकीन सुवावू रोये, एने नी झगळावू, नी पोयशान लालची रोये.

⁴ आपना घोरोन वारू देखभाल कोरतू होय, एने हेरा पुऱ्या पारीन आखी गंभीरता मा सोमावीन राखतू होय.

⁵ जो कुदू आपना घोरोन वारू राखवावी कोरनेन नी जानतू होय, ती परमेश्वरोन मंडवीन राखवावी कोसू कोरसे?

⁶ ती यो कि नवला चेला नि होय, ओसो नी होय कि मोटाय कोरीन भुतडान तोसु दोंड जोळे.

⁷ एने बारथे वावामा बी हेरा वारलो नाव होय, ओसो नी होय कि बोढाई होयीन भुतडान फांदामा फोस जाये.

सेवकोन योग्यता

⁸ तोसोत सेवक काजे भी वातळा होयनो जुवे, इमानदार सी चालन्यू, मोंदळ्यु एने भुंडला कामोन कोमाय कोरने वावू एने लालची नी जुवे;

⁹ बाकीन भुरसान भेद काजे चुखलो विचारसी सोमावीन राखे.

¹⁰ एने यो बी पेहेले पारखाय जाय, ती कोदि वारलु निकवे ती सेवकोन काम कोरे.

¹¹ इनान कोरता बायोर काजे बी वातळी होयनो जुवे; चुगली लागाळने वावी नी जुवे, पुन चतरावी एने आखी वातोमा भुरसू मेके ओसी जुवे.

¹² दास एक बायरोन ओदमी रोये एने पुऱ्या पारीन एने आपना घोरोन वारू देखभाल कोरणे जानतू होसे.

¹³ काहाकि जे सेवकन काम वारू कोरता होसे, चे तेरेन कोरीन वारलु पोड एने हेरु भुरसामा जू मसिह येसु पर, मोटी हिंमत हासील कोरे.

मोटू रहश्य

¹⁴ मे तारे पास छाटू आवनेन आस कोरतेलू पुन यी वात हेरने कोरता लिखलू छे.

¹⁵ कि अगर मारो आवनेमा टेम होय जाय ती तू जान ले कि परमेश्वरोन मंदीरमा जू जीवतला परमेश्वरोन मंडवी छे, एने जो खोरलान खांबु एने पाये छे कोसू रोयनो जुवे.

¹⁶ इनुमा शंका नी होय कि भोक्तीन फरक गंभीर छे, मतलब होयो जे डीलोमा प्रगट होयलो, आत्मामा धोरमी ठेरायू, सोरग दूत काजे देखायतू दिसरा जातीमा हेरा प्रचार होयलू, जोगोमा हेरे पोर भुरसू कोरलु होतु, एने महिमामा उपर चुटायलु होतु.