1 तीमथी 2 - बारेली पावरी

आखान कोरता प्रार्थना

¹ हिमी मे आखा गोथू पेहेले यो रावन्या कोरो कि विनता, एने प्रार्थना, एने निवेदन, एने धन्यवाद आखा माणसोन कोरता रोये.

² राजा एने आखा उचा पोद पोरलान कोरता एरेन कोरता कि आमु आराम एने नोरमाय पुठी आखी भोक्ती एने गंभीर से जीवन जीवजे.

³ यो आराम छुटकारू आपन्यु परमेश्वर काजे वारू लागतलो एने गोवतेलो बी छे,

⁴ जो यु चाहतलु कि आखा माणसोन छुटकारू होये एने खोरला काजे वारू रितीसी जान लेये.

⁵ काहाकि परमेश्वर एक छे, एने परमेश्वर एने माणसोन अगवू भी एकुत छे, मतलब मसिह येसु जू माणूस छे.

⁶ जू खुदो काजे आखान छुटकारान दामोमा आप देदू, एने हेरी गोवायी ठीक टेमो पोर आपाय गोयी.

⁷ मे खोरु कोयने बाज रोयू, झूट नी बुलतू, कि मे इना उद्देशोन प्रचारक एने प्रेषित एने दिसरा जातीन कोरता भुरसू एने खोरलान प्रचारक ठेरावतलु होतु.

मंडवीमा बायराक एने माणसोक सिकाळनो

⁸ हेरेन कोरता मारी मोर्जी छे कि आखे जागे माणूस, बिना रीस एने झोगळान चुखला हातो काजे उचा कोरीन प्रार्थना कोऱ्या कोरे.

⁹ तोसात बायराबी शंका एने धीर साते वारला कापळासी हीनु खुदो काजे सजाळे; नी कि झोटा गुथने एने सोनो एने मोती एने मोहोंगा कापळासी.

¹⁰ बाकीन वारला कामोसी, काहाकि परमेश्वरोन भोक्ती कोरणे वावी बायोर काजे यो वारू बी छे.

¹¹ बायरा काजे हुगा होयीन आखो मन लागाळीन सिकनो जुवे.

¹² मे कोयो कि बायर नी प्रचार कोरे एने नी माणूस पोर आग्या कोरे, पुन चूप रोये.

¹³ काहाकि आदोम पेहेले, एने हव्वा पोछोव बोनी.

¹⁴ एने आदोम बहकावमा नी आव्यु बाकीन बायर बहकावमा आवीन गुणावी होय गोयी.

¹⁵ ती भी बायर पुऱ्या काजे जन्मो आपनेने लारे छुटकारू हासील कोरसे, अगर ची धीर साते भुरसू, मोंग, एने चुखलामा एक जागे रोये.