1 थिस्सलुनीकियो 5 - बारेली पावरी

पोछो ओवतेन कोरता तीयार रोयनो

¹ बाकीन हे भाशो, इनान गोरोज नि कि टेमेन एने दाहळान बारामा तुमरे जुव काय लिखलो जासे.

² काहाकि तुमु बोराबर जानतला छे कि जोसू राती चुटू आवतेलु छे, तोसोत प्रभून दाहळू बी आवने वावु छे.

³ जेतार माणसे कोयता होसे, “वारलो छे, एने काय बिक नि होय,” तिंदरे पोर एका पोछोव एक नाश आवीन लागसे, जिना रितिसी भारीस बायोर पोर दुख; एने चे कानला रितीसी नि वाचसे;

⁴ बाकीन हे भाशो; तुमु ते आंदारलामा नि होय कि चू दाहळू तुमरे पोर दोगळान तोसो ओगोव आवीन पोळे.

⁵ काहाकि तुमु आखा विजावान पुऱ्या एने दाहळान पुऱ्या होयसे; आमु नि रातन छे, नि आंदारान छे.

⁶ एरेन कोरता आपनु दिसरान तोसा सुवतोला मा रोयू, बाकीन जागला एने सावधान रोयू.

⁷ काहाकि जे सुवतलु छे चे रातीत सुवतला छे, एने जा छाकला रोयतला छे चे रातीन छाकला होयतला छे.

⁸ बाकीन आपनु जे दाहळान छे, भुरसान एने मोंगोन झीलम पेहेरीन एने छुटकारान आसोन टूपी पेहेरीन सावधान रोयू.

⁹ काहाकि परमेश्वर आपनुक रीसोन कोरता नि, बाकीन एरेन कोरता ठोरावला छे कि आमु खुद प्रभू येसु मसिहन लारे छुटकारू हासील कोरे.

¹⁰ चू आमरेन कोरता इना वोजेसी मोरलु कि आमु चाहे जागतला रोये, नीती सुवतला रोये, आखा मेवीन तेरे साते जासे.

¹¹ इना वोजेसी एक दिसरा काजे शांती आपु एने एक दिसरान उन्नतीन वोजेह बोनु, जोसो तुमु कोरतेला भी छे.

मंडवी काजे प्रचार

¹² हे भाशो, आमु तुमु काजे विनता कोरजे कि जो तुमरेमा मेहनत कोरतेला छे, एने प्रभूमा तुमरे ओगोव छे, एने तुमुक भोनाळतला छे, तिंदरू आदर कोरु.

¹³ एने तिंदरे कामोन वोजोसी मोंगोन साथे तीनुक जादा आदोरोन लायक सोमजू, एक दिसरा साते हिव मेवीन रोयू.

¹⁴ हे भाशो, आमु तुमु काजे सोमजाडतला छे कि जे वारलो चाल नि चालतला तीनुक सोमजाळू, बिहन्या काजे धीर आपु, बिना ताकत वावा काजे सोमावू, आखांचा सहन शीलता देखाळू,

¹⁵ सावधान, कुदु कुदासी बुराईन बोदले बुराईमा कोरु; बाकीन हमेशा वारू कोरणे पोर तीयार रोयू, आपनामा एने आखा साते भी भोलाईन मोजाक कोरु.

¹⁶ हमेशा खुशीमा रोयू.

¹⁷ हमेशा प्रार्थनामा लागला रोयू.

¹⁸ आखा वातोमा धन्यवाद कोरु; काहाकि तुमरेन कोरता मसिह येसुमा परमेश्वरोन जीत मोर्जी छे.

¹⁹ आत्मा काजे मा बिगाडू.

²⁰ भविष्यवाणी काजे विटोव मा जाणू.

²¹ आखा वातो काजे पारखू; जी वारली छे तिनाक धोरीन रोयू.

²² आखा भातीन वातोसी वाचीन रोयू.

आशिष

²³ शांतीन परमेश्वर तुमु काजे आखी रितीसी चुखलो कोरे; एने तुमरी आत्मा एने जीव एने डील आपना प्रभू येसु मसिहन आवने तोक पुरो पूर एने निरदोष, एने वारला रोये.

²⁴ तुमुक बुलावनेवावु खोरलू छे, एने चू होसुत कोरसे.

²⁵ हे भाशो आमरेन कोरता प्रार्थना कोरु.

²⁶ आखा भाशो काजे चुखला गुवासी, एने नमस्कार कोरु.

²⁷ मी तुमु काजे प्रभून कोसोम आपो कि जो चिट्ठी आखा भाशो काजे वाचीन सोमवाय जासे.

²⁸ आमरू प्रभू येसु मसिहन दया तुमरे पोर होयतो रोये.