1 थिस्सलुनीकियो 4 - बारेली पावरी

चुखला होयनो कोरता बुलावनो

¹ इनान कोरता हे भाशो, आमु तुमरेनचा विनता कोरजे एने तुमु काजे प्रभू येसुमा सोमजाडतला छे कि जोसा तुमु आमरे साते खोरलो चाल चालजू एने परमेश्वर काजे खुश कोरनेन सिकला छे, एने जोसा तुमु चालतला भी छे, तोसात एने बोढता जावू.

² काहाकि तुमुक मालूम छे कि आमु प्रभू येसुनचा गोथा तुमुक कानली-कानली आग्या पुगाळला.

³ काहाकि परमेश्वरोन मोर्जी जी छे, कि तुमु चुखला बोनु, मतलब व्यभिचारसी वाचीन रोयू.

⁴ एने तुमरे माहीन होर एक चुखला एने आदोर साते आपनी लाडी काजे हासील कोरने जाणू,

⁵ एने यो काम गोलोत मोर्जीसी नी, एने नि तिंदरा जातीन तोसा जी परमेश्वर काजे नि मानतली.

⁶ इना वातोमा कुदू आपना भाश काजे नि ठोगे, एने नि तीना पोर दोगु चालाळे, काहाकि प्रभू इनी आखा वातोन बदलू लेणे वावु छे; जोसो कि आमु पेहेले तुमु काजे कोयला एने जोताळला भी होता.

⁷ काहाकि परमेश्वर आमु काजे भुंडला होयनेन कोरता नि बाकीन चुखला होयनेन कोरता बुलावलु छे.

⁸ इनान वोजेहसी जू तिनाक कोम मानतलु छे चू माणसो काजे नि बाकीन परमेश्वर काजे कोम लेखतलु, पवित्र आत्मा तुमुक आपतलु छे.

मोंग एने काम

⁹ बाकीन भाय-भोलायीन मोंगोन बारामा जो, गोरोजोन नि कि मे तुमरे साते काय लिखो, काहाकि आपनेमा मोंग कोरनेन तुमु खुद परमेश्वरोनचा गोथा भोनला छे;

¹⁰ एने आखा मकीदुनीयान आखा भाशो साते ओसो कोरतेला बी छे. बाकीन हे भाशो आमु तुमु काजे सोमजाडला कि एने बी बोढता जावू.

¹¹ एने जोसा आमु तुसेक आग्या आपला छे, तोसोत हुगा रोयने एने आपना-आपना काम-काजे कोरणे एने आपना-आपना हातोसी कोमायनेन कोशिश कोरु;

¹² काहाकि बारथे वावान तोरोफसी आदोर हासील कोरु, एने तुमु काजे कहानला चीजोन कोमी नि होये.

येसु मसिहीन पोछो आवनो

¹³ हे भाशो आमु नि जानतला कि तुमु तिंदरा विषयोमा जे सुवतला छे, अनपड रोये; ओसो नि होय कि तुमु दिसरान तोसो शंका कोरे जीनु काजे आस नि होय.

¹⁴ काहाकि ओगर आमु भुरसू कोरतेला छे कि येसु मोऱ्यू एने जीव उठ्यू, तोसोत परमेश्वर तीनुक भी जे येसुमा मोर गोयला छे, तेरेत साते लीन आवसे.

¹⁵ काहाकि आमु प्रभून वचनोन अनसारे तुमु काजे जो कोयतेला छे कि आमु जे जीवतला छे एने प्रभून आवने तोक वाचला रोयसु, मोरलामा गोथा कोबी ओगोव नि बोढसे.

¹⁶ काहाकि प्रभू एक सोरगो गोथू उतरसे; तिने टेमे ललकार, एने प्रधान दुतोन वात सोमवाय जासे, एने परमेश्वरोन फेपाऱ्यो फुकाय जासे; एने जे मसिहमा मोरला छे, चे पेहेले जीव उठसे.

¹⁷ तेत्यार आमु जे जीवतला एने वाचीन रोयसु तिंदरे साते वादवा पोर चुटाय जासु कि हवामा प्रभू काजे भेटसे; एने इना रितीसी आमु सोदा प्रभून साते रोयसु.

¹⁸ इना रितीसी इना वातोसी एक दिसरा काजे शांती आप्या कोरु.