1 थिस्सलुनीकियो 3 - बारेली पावरी

भुरसान कोरता चिंता

¹ इनान कोरता जेतार आमरेसी एने नी रोवायतो, ती आमु यो ठेराव्या कि एथेंसमा एखलु रोय जाय;

² एने आमु तीमथीस काजे जू मसिहन वारली खोबरमा आमरू भाश एने परमेश्वरोन सेवक छे इनान कोरता मूकल्यु कि चू तुमुक पाका कोरे एने तुमरु भुरसान बारामा तुमु काजे सोमजाडे.

³ कि कुदु इना तोकलीतोन वोजेसी कोमजुर नी होय जाय काहाकि तुमु खुद जानतला छे कि आमु इंदरेन कोरता ठेरावला छे.

⁴ काहाकि पेहेलेत, जेतार आमु तुमरेनचा होता, ती तुमु काजे कोया कोरता होता कि आपनु काजे तोकलीत झेलणू पोळसे, एने ओसोत होयलो छे, जोसो कि तुमु काजे मालूम छे.

⁵ इना वोजेसी जेतार मेसे काजे एने नि रोवायो, ती तुमरा भुरसान हाल जाननेन कोरीन मुकल्या, कि कोदि ओसो नी होये कि पारख कोरणे वावू तुमरो पारख कोरलु छे, एने आमरी मेहनत वायबार होय जाय.

तीमथी लारे उत्साहित

⁶ बाकीन हिमी तीमथीयुस, जू तुमरेनचा गोथू आमरेनचा आवलु छे, तुमरु भुरसू एने मोंगोन वारली खोबर सोमवाळ्यु एने इनी वातो काजे बी सोमवाळ्यु कि तुमु हमेशा मोंगसी आमु काजे फोम कोरतेला छे, एने आमरे देखनेन मोर्जी राखतला छे, जोसा आमु बी तुमुक देखनेन.

⁷ इनान कोरता हे भाशो, आमु आपना आखा दुख एने तोकलीतमा तुमरा भुरसासी तुमरे बारामा शांती जोळी.

⁸ काहाकि हिमी ओगर तुमु प्रभूमा पाका रोयू ती आमु जीवतला छे.

⁹ एने जोसो खुशी आमुक तुमरे कोरता आपना परमेश्वर सामने छे, तेरे बोदले तुमरे बारामा आमु काहनला रितीसी परमेश्वरोन धन्यवाद कोरो?

¹⁰ आमु रात दाहळू रेट प्रार्थना कोरता रोयला छे, कि तुमरो मुय देखजे एने भुरसान कोमी काजे पुरा कोरजे.

मंडवीन कोरता प्रार्थना

¹¹ हिमी आमरा परमेश्वर एने बास खुदू एने आमरू प्रभू येसु, तुमरेनचा आवनेमा अगवाई कोरे;

¹² एने प्रभू ओसू कोरे कि जोसू आमु तुमरेसी मोंग कोरतेला छे, तोसोच तुमरो मोंग बी एक दिसरामा एने माणसो साते बोढे, एने बोढती कोरतु जाय,

¹³ काहाकि चू तुमरा मोनो काजे ओसू पाकु कोरे कि जेतार आमरू प्रभू येसु आपना आखा चुखला माणसो साते आवे, ती चे आमरा परमेश्वर एने बासो सामने चुखलामा निरदोष ठेराये.