1 थिस्सलुनीकियो 2 - बारेली पावरी

पौलुसोन जोगोन

¹ हे भाशो, तुमु खुदो काजे मालूम छे आमरो तुमरेनचा आवनो वायबार नी होयो.

² पुन तुमुक खुदो काजे मालूम छे कि फिलीप्पीमा दुख भुगतने एने तोकलीत सोहोन कोरणे पोर बी परमेश्वर आमुक ओसी हिंमत आप्यू, कि परमेश्वरोन वारली खोबरोन भारी खिलाप होयतेली ते बी तुमुक सोमवाळ्या.

³ काहाकि आमरू प्रचार नि शंका सी होय एने नी भुंडलासी, एने नी छळ पुठी होय.

⁴ बाकीन जोसू परमेश्वर आमुक खोरलो ठेरावीन वारली खोबर सोप्यू, आमु तोसोच वर्णन कोरतेला, एने इनाम माणसो काजे नी, बाकीन जो परमेश्वर काजे जो आमरा मोनो काजे पारखतलो खुश कोरतेला.

⁵ काहाकि तुमु जानतला छे कि आमु ते कोबी कोपटी वाते नि कोऱ्या, एने नि कोबी लालुचोन कोरता, बाहानो कोरता होता, परमेश्वर गोवा छे;

⁶ एने हांजू तोक आमु मसिहन प्रेषित होयनेन वोजेह तुमरे पोर बोझ नाख सोकता होता ते बी आमु माणसो जुव गोथा मान सन्मान नी मांगता होता, एने नी तुमरे जुव गोथा नी एने कुदा जुव गोथा.

⁷ बाकीन जिना रितीसी आश आपना पुऱ्या काजे देख भाव कोरतेली, तोसाच आमु बी तुमरा इचमा रोयीण नरमाय देखाळतला छे.

⁸ एने तोसाच आमु तुमरी लालच कोरता जायीन, निस्ता परमेश्वरोन ओतरा नि बाकीन वारली खोबर पोर बी आपनु-आपनु जीव तुमुक आपनेन कोरता तीयार होता, इनान कोरता कि तुमु आमरा गोवता होय गोयलु होता.

⁹ काहाकि हे भाशो तुमु आमरा कामोन एने मेहनतोन फोम कोरतेला; आमु ते इनान कोरता रात दाहळू काम धोंदू कोरता जायीन तुमरेमा परमेश्वरोन वारली खोबरोन प्रचार कोऱ्या कि तुमरे मायला कुदा पोर भार नी पोळे.

¹⁰ तुमु खुद गोवा रोयू एने परमेश्वर बी गोवा छे कि तुमु विश्वासीन आमरू वेहवार कोसू पवित्र एने धोरमी एने निरदोष होयनो जुवे.

¹¹ तुमुक मालूम छे, जोसू बास आपना पुऱ्या पुठी वेहवार कोरतेलु तोसात आमु बी तूमरे मायला हर एक जोनानु काजे प्रचार कोरतेला, एने महिमामा बुलावतला.

¹² कि तुमरो चाल चलन परमेश्वर काजे बराबोर होय, जो तुमुक तेरा राजमा एने महिमामा बुलावतलु.

थिस्सलुनीकियोंन माणसोन बोदलनो

¹³ इनान कोरता आमु बी परमेश्वरोन धन्यवाद एक सारखा कोरतेला कि जेतार आमरे लारे परमेश्वरोन वचन तुमरेनचा पुग्यू, ती तुमु तिना काजे माणसोन नि बाकीन परमेश्वरोन वचन सोमजीन (एने छाचलीन यो ओसोत छे) स्वीकार कोऱ्या; एने चू तुमरा विश्वासीमा जे भुरसू कोरतेला, ताकत वावा छे.

¹⁴ इनान कोरता तुमु, हे भाशो, परमेश्वरोन मंडवीन तोसी चाल चालने बाज गोया जे यहुदिमा मसिह येसुमा छे, काहाकि तुमु बी तुमरा माणसोनचा गोथा दुख झेलला छे, जोसा चे यहुदिनचा गोथा लेदला छे.

¹⁵ एने चे प्रभू येसु काजे एने भविष्य कोरता काजे मार नाखला एने आमु काजे वेला पाळावला, एने परमेश्वर तिंदरे पोर खुश नी होय, एने चे आखा माणसोन खिलाप कोरतेला,

¹⁶ एने चे दिसरा जातीसी तिंदरू छुटकारान कोरता वाते कोरणेसी आमुक रुके कि कायम आपना पापोन माप भोरता रोये; पुन तीनु पोर परमेश्वरोन घोन मोटू दोंड आवतेलु छे.

मंडवी काजे भेटनेन आस

¹⁷ हे भाशो जेतार आपु थुलिक वारोन कोरता मोनमा नि बाकीन प्रगटमा तुमरेमा गोथा ओलोग होय गोयला होता, ती आमु मोटी लालूच पुठी तुमरो मूय देखणे कोरता एने बी कोशिश कोऱ्या.

¹⁸ इनान कोरता आमु (मतलब मे पौलुस) एक बार नि बाकीन दुय कावा तुमरेनचा आवनेन कोऱ्यु बाकीन भुतडू आमुक रुक रोयलु.

¹⁹ वारलो आमरी आस एने खुशी एने बोढाईन मुकुट काय छे? काय आमरा प्रभू येसुन सामने तेरो आवनेन टेमे तुमु बी रोये.

²⁰ आमरी महिमा एने खुशी तुमुत छे.