1 पतरस 5 - बारेली पावरी

भिळोन गुवाव्यू

¹ एरेन कोरता मी जो तुमु आखा डाह-डाहा छे, मसिहन दुखोन गोवा छे, एने देखायने वावी महिमामा भागी होयीन तीनुक यो सोमजाडो,

² कि आपना इचमा परमेश्वरोन टूवान राखवावी कोरो, एने जो कानला दोबावसी नि बाकीन परमेश्वरोन मोर्जीन अनसारे खुशीसी, गोलोत कोमायीन कोरता नि बाकीन मोन लागाळीन कोरु.

³ जे माणसे तुमु काजे आपला छे, तिंदरे पोर मसिहमा देखाळू, बाकीन आपना टूवू कोरने वावा बोनु.

⁴ जेतार प्रोधान राखनेवावू प्रगट होयसे ती तुमु अमोर महिमान मुकुट जोळसे.

परमेश्वर काजे समर्पित करनो एने भुतडान खिलाप करनो

⁵ इना प्रोकारसी हे नोवला जुवान्या, तुमु बी डाह-डाहान अधीन रोयू, एने तुमु आखान-आखा एक दिसरान कोरता दीनतासी कोळ्याक बांदला राखू, काहाकि परमेश्वर अभिमानीन खिलाप कोरतेलू छे, बाकीन गोरीबोपोर दया कोरतेला छे.

⁶ एरेन कोरता परमेश्वरोन ताकत हातोन नेचा दीनतासी रोयू, जेरेसी सही टेमो पोर बोढावे.

⁷ आपनो आखा चिंता तेरे पोर नाख देवू, काहाकि चू तुमरी चिंता कोरतेलू छे.

⁸ शांत एने सावध रोयू, तुमरु दुष्मोन भुतडा डोखारनेवावा नाहारो सारखो इना हेरमा रोयतलु छे, कि कुदा काजे फाडीन खाम.

⁹ भुरसामा पाका रोयीण तेरु खिलाप कोरु एने यो जान लेयु कि तुमरा भाशे, जा जोगोमा छे इना रितीसी तोकलीत झेलणे बाज रोया.

¹⁰ तुमु इतरीक वार तोकलीत झेलीन आखो दयान परमेश्वर छे, जू तुमु काजे येसु मसिहमा तेरी ओमोरकाईन महिमान कोरता बुलावलु, चू खुद तुमु काजे सिद्ध, पाक्का ताकत वावा एने स्थिर कोरसे.

¹¹ तेरो राज कायम रोये. आमेन.

आखरी अभिवादन

¹² मी सिलवानुसोन लारे, जेरेसी मी भुरसान योग्य भाश मानतलु छे, वारू रितीसी लिखीन तुमु काजे सोमजाडलु छे एने यी गोवायी आपलु छे कि परमेश्वरोन खोरलु दया छे इनामा वातडा बोनीन रोयु.

¹³ जी बाबेलमा तुमरे सारका प्रेषितोन छे, तुमुक नमस्कार कोये एने तिंदरे पुठी मारू पुऱ्यु मरकुस भी.

¹⁴ मोंगोन गुवासी एक दिसराक नमस्कार कोयू, तुमु आखा जा मसिहमा छे, शांती जोळे.