1 पतरस 4 - बारेली पावरी

बदलोलो जीवन

¹ एरेन कोरता जेतार मसिहन डीलोमा होईन दुख झेल्यू ती तुमु भी तिनी मनसा काजे हत्यार सारखा वापर कोरु, काहाकि जू डीलमा दुख झेललु छे, चू पापमा गोथू छुट गोयू,

² तेरेन कोरता भविष्यमा आपना रोयला डीलोन जीवन माणसोन भुंडली मोर्जीन अनसारे नि बाकीन परमेश्वरोन मोर्जीन अनसारे जीवे.

³ काहाकि दिसरा जातीन मोर्जी अनसारे काम कोरणे, एने लुचळा भुंडली लालूच, मोतलोबी, लीलाक्रीडा, मोंदळ्या एने भुंडला नीती मूर्ती पूजामा जा तोक आपनु पेहेल टेमे खुवाळ्या, चू जादा होये.

⁴ इनासी चा नोवलाय कोरतेला कि तुमु ओसा मोटी लुचळायमा तिंदरू साथ नि देतला, एने एरेन कोरता चे भुंडला कोयतेला छे;

⁵ बाकीन चे तिनाक जू जीवतलान एने मोरलान छे तीनुन न्याय कोरणे तीयार छे, लेखू आपसे.

⁶ काहाकि मोरला काजे बी वारली खोबर एरेन कोरता कोयला कि डीलोमा ते माणसोन अनसारे होयसे, बाकीन आत्मामा परमेश्वरोन मोर्जी अनसारे जीवतला रोईसे.

मसिह महिमान कोरता सेवा

⁷ आखा चीजोन नाश होयन्यो छे; एरेन कोरता एक मोन होयीन प्रार्थना कोरता रोयू.

⁸ आखा गोथो बोढीन, एक दिसरान बारामा मोंगसी वारला कामे राखू, काहाकि मोंग जादा पापो काजे ढाक लेतलो छे.

⁹ बिगोर कुरकुरोन एक दिसरान पाहांतराय कोरु.

¹⁰ जेतार आखा काजे एक खास वरदान जूळलो छे, ती तिनाक परमेश्वरोन ओलोग-ओलोग भातीन अनुग्रहन वारला भंडारीन सामने एक दिसरान सेवामा लागाळू.

¹¹ जू भी आदेश आपे, चू ओसो आपे माणू परमेश्वरो जून वचन आपलु छे, जू सेवा कोरे तिना ताकत से कोरु जो परमेश्वर आपतलु छे, जीनासी आखा वातोमा येसु मसिहन लारे परमेश्वरोन महिमा होयसे, महिमा एने होक कायम तेरोत छे. आमेन.

परमेश्वरोन महिमान कोरता दुख उठावनो

¹² हे मोंगावा, जो दुखोन आगठो तुमुक पारखने कोरता जी तुमरेमा भोळेकली छे इनासी यो सोमजीन नोवलायी मा कोरु कि कानली ओलोग घोटणा तुमरे पोर घोड रोयी.

¹³ बाकीन जोसो-जोसो तुमु मसिहन दुखोमा सहभागी होयतला छे, खुशीमा रोयू, जीनासी तेरी महिमा प्रकट होयते सोमय भी तुमु खुशीसी भोराय जावू.

¹⁴ ओगर मसिहन नावोन वोजेसी तुमरी बुराई कोराय जातली छे, ती तुमु सोयावा छे, काहाकि महिमान आत्मा, जू परमेश्वरोन आत्मा छे, तुमरेमा आव्या कोरतेलू छे.

¹⁵ तुमरे माईन कुदू बी खुनी, चुटू, भुंडलो काम कोरने वावु, नीती दिसरान काममा हात नाखने वोजेहसी दुख नि झेलतलु छे.

¹⁶ बाकीन ओगर कुदू मसिही होयनेन वोजेह दुख उठावतलु छे, ती लाजवाये नि, बाकीन आपना इना नावोन कोरता परमेश्वरोन महिमा कोरु.

¹⁷ काहाकि टेम आव लागली छे, कि परमेश्वरोन घोरोमा गोथो सुरवात छे, आखरी नियावोन सुरवात आमरे गोथो होयसे ती तिंदरू काय पोरीनाम होयसे जे परमेश्वरोन वारली खोबरोक नि मानतेला?

¹⁸ ओगर धोरमी माणूस काहने रितीसी छुटकारू हासील कोरसे, कि परमेश्वरमा नि रोयने वावू एने पापी माणसोन काय हाल होयसे?

¹⁹ एरेन कोरता चे बी परमेश्वरोन मोर्जीन अनसारे दुख झेलतला छे, चे वारलो काम कोरतेला छे, आपनो-आपनो जीव काजे भुरसान लायक, कोवीक बोनावने वावान हातोमा सोप देवू.