1 पतरस 3 - बारेली पावरी

घोरवावी

¹ हे बायरा, तुमु भी आपना ओदमीन अधीन रोयू, एरेन कोरता कि ओगर इनामा गोथो कुदू ओसू होसे जू वचन काजे नि मानतू होसे,

² तीबी तुमरी बिक साते चुखला चाल चलन काजे देखीन बिगुर वचनोन आपनी-आपनी बायरोन चाल-चलनोन लारे हापकाय जासे.

³ तुमरु श्रृंगार देखावट नि होयनो जुवे, मतलब झोटा गुथने, एने सोनान वोजन, या भाती भातीन छिंदरा पेहेरणे,

⁴ नीती तुमरो डूकायलो एने माणसोन, नम्रता एने मोनोन दीनतान अविनाशी सोजावट तीयारीमा रोये, काहाकि परमेश्वरोन नजरमा एरू महत्व मोटलो छे.

⁵ जूनला दाहळामा चुखला बायरा भी, न परमेश्वर पोर आस राखता होता, खुदो काजे इना रितीसी सोजाळतला एने आपना-आपना ओदमीन अधीन रोयती होती.

⁶ जोसो सारा अब्राहामन आग्यामा रोयती होती एने मालिक कोयती होती, इना रितीसी तुमु भी ओगर वारलो कोरो एने इना भातीन बिक से बिहू मा, ती तिंदरा पुरायटा कोवायसे.

घोर वावु

⁷ तोसोत हे ओदमी, तुमु भी बुद्धिमान बायर साते जीवन जोग्या कोरु, एने बायरोन कोमजुरी जानीन तिंदरू आदर कोरु, जो सोमजीन कि आमु दुयू जीवनोन वरदानोन वरीस छे, इनासी तुमरी प्रार्थना थामे नि.

आशिषित वारीस होयनेन कोरता बुलावनो

⁸ आखरी, आखा एक मोन एने दयामय एने भाशो पोर मोंग कोरणे वावु, एने दयावान एने नम्र बोनु,

⁹ भुंडलान बोदले भुंडलो मा कोरु एने लोळनेण बोदले मा लोळायु, बाकीन इना बोदले आशिष आपु, काहाकि तुमु आशिषोन वरीस होयनेन कोरता बुलावला छे.

¹⁰ काहाकि जू कुदु जीवनोन आस राखतलु छे, एने वारला दाहळा देखनेन मोर्जी छे, चू आपनी जीब काजे भुंडली वातोसी, एने आपना हुठो काजे तोकलीतोन वाते कोरनेसी रुक रोये.

¹¹ चू बुराईन साथ छुळे, एने वारूत कोरु, चू मेवाय काजे हेरे; एने तेरे कोशिशमा रोयू.

¹² काहाकि प्रभून दुवा धोरमी पोर लाग रोयतली छे, एने हेरा कानटा तेरे प्रार्थनामा लागला रोतला छे; बाकीन बुराई कोरणे वावान, कोळक नजर रोयतली छे.

भोलाई कोरनेन कोरता सताव

¹³ अगर तुमु वारलो कोरनेन कोरता तीयार रोये, ती तुमरी बुराई कोरणे वावू कून छे?

¹⁴ ओगर तुमु धोरमोन वोजेह दुख झेलसु, ती सोयावा छे; बाकीन माणसोन वातो काजे मा बिहू, एने मा घाबरायु,

¹⁵ बाकीन प्रभू येसु मसिह काजे जानीन आपना आपने मोनमा चुखो सोमजू, जू कुदू तुमरेसी तुमरे आसोन बारामा काय पुछे, तीनाक जोवाब आपने कोरता हमेशा तीयार रोयू, बाकीन नम्रता एने बिक साते;

¹⁶ एने मोन भी चुखलो राखू, एरेन कोरता कि जिना वातोन विषयमा तुमरी बोदनामी होयतेली छे, तिंदरे विषयमा चा, जी मसिहमा तुमरी वारली चाल चालनो अपमान कोरतेला छे, चा लज्जीत होयसे.

¹⁷ काहाकि ओगर परमेश्वरोन जी मोर्जी होयसे कि तुमु भोलाई कोरनेन वजेसी दुख, वेठनो, ती जी बुराई कोरीन दुख चूटनेसी वारलो छे.

मसिहीन दुख

¹⁸ एरेन कोरता मसिह भी, मतलब अधोरमीन कोरता धोरमी, पापोन वजेसी एक कावा दुख झेललु तेत्यार आमु काजे परमेश्वरोनचा पुगाळे, चू डीलोन भाव से ती माराव देदा, बाकीन आत्मान भावमा जीवतु होय जासे.

¹⁹ तीनामा होयू जाईन बोंद आत्मा काजे बी प्रचार कोरलु,

²⁰ जो तीने टेमे आग्या नि मान्या, जेतार परमेश्वर नुहान दाहळामा धीर धोरीन रोयू एने चू ढोंड्यो बोनावतू होतु, तिनाम बोठीन थुलाक माणसे मतलब आठ जनावरे पाणीन लारे वाच गोया.

²¹ तीना पाणीन दाखलू भी, मतलब बाप्तिस्मा, येसु मसिह मोरीन जीव उठनेन लारे, हिमी तुमु काजे वाचाडलु छे; इनासी डीलोन मोयोव काजे धुवने कोरनेन मतलब नि होय, बाकीन वारला मोनोसी परमेश्वरोन ताबामा होई जाणेन मतलब छे.

²² चू सोरग पोर जाईन परमेश्वरोन जेवळे धोळे बोठ गोयू; एने सोरग दूत एने अधिकारी एने ताकत वावा तेरे अधीन कोराय गोयला छे.