1 पतरस 2 - बारेली पावरी

नेवाळलु दोगळू

¹ एरेन कोरता आखा भातीन भेदभाव एने छोळ एने ढोंग एने खोर एने बुराई काजे नांबे कोरीन,

² नोवीन जन्मो लेदला पुऱ्यान तोसो चुखलो आत्मिक दुधोन मोर्जी कोरु, तेरेन कोरता तेरे लारे छुटकारू जोळनो जुवे कोरीन ओगोव जावू,

³ काहाकि तुमु प्रभून दयान सोवाद चाख लेदलु छे.

⁴ तेरेनचा आवीन, जीना काजे माणसे रीकामू कोयतेला बाकीन परमेश्वरोन साते नेवाळलु छे एने मोहेंगलु जीवतलु दोगळू छे,

⁵ तुमु बी जीवतलु दोगळान तोसो आत्मिक घोर बानावतला छे, जेरेन कोरता पुजारान चुखला सोमाज बोनीन, ओसो आत्मिक बलिदान चोळावू जू येसु मसिहन परमेश्वर काजे मान्यो छे.

⁶ इना वोजेह पवित्र शास्त्रमा बी आवलो छे, “देखू, मी सियोनोन कुपरान मुंडकान नेवाळलु एने मोहोंगलु दोगळू धोरलु छे, एने जू कुदु तेरे पोर भुरसू कोरसे, चू कानली रिती से लाजवायलु नि.”

⁷ आखरी, तुमरेन कोरता जू भुरसू कोरतेला छे चू ते मोहोंगलो छे, बाकीन जे भुरसू नी कोऱ्या तिंदरेन कोरता “जिना दोगळा काजे बांधनेवावा रीकामो गीनायता होता, चू कुपरान दोगळू होय गोयू.”

⁸ एने ठेस लागनेन दोगळू एने ठूकर खाणेन चाफुर होय गोयलु छे, काहाकि चा ते वचन काजे नि मानीन ठूकर खातला छे, एने एरेन कोरता चू कोवय बी गोया होता.

⁹ पुन तुमु एक खास पिढ्या, एने राज-पदधारी पुजारान सोमाज, एने चुखला माणसे एने परमेश्वरोन नेवाळली माणसे होयसे, एरेन कोरता कि जू तुमु काजे आंदारामा गोथू तेरा अदभूत विजावामा बुलावलु छे, तेरा गुणे ओगोव कोरु.

¹⁰ तुमु पेहेले ते कायबी नि होता, बाकीन हिमी परमेश्वरोन माणसे छे; तुमरे पोर दया नि होयली होती बाकीन हिमी तुमरे पोर दया होयली छे.

परमेश्वरोन कोरता जीवन

¹¹ हे मोंगावा, मी तुमु काजे विनता कोरो कि तुमु खुदो काजे दिसरा देसोन एने पाहांतऱ्या जानीन इना संसारोन लालूच गोथो जू आत्मामा लोळाय कोरतेली छे, वाचीन रोयू.

¹² दिसरा जातीमा तुमरो चाल चोलोन वारलो रोये; काहाकि जिना-जिना वातोमा होय तुमु काजे भुंडला कामोन जाणीन बोदनाम कोरतेला छे, चे तुमरा वारला कामो काजे देखीन तिंदरे वोजेह दयान दाहळामा परमेश्वरोन महिमा कोरु.

पुढाऱ्यान अधीनमा रोयनो

¹³ प्रभून कोरता माणसोन ठोरावला हर एक बंदोबस्त न अधीन रोयू, राजान इनान कोरता कि होया आखा प्रोधान छे,

¹⁴ एने सुभेदार, काहाकि चू भुंडलो कामो काजे दोंड आपने एने वारलो कोरने वावान कोरता तेरा मुकेलला छे.

¹⁵ काहाकि परमेश्वरोन मोर्जी जी छे कि तुमु वारलो काम कोरनेन लारे जिनाक बुद्धी नि होय, ओसला माणसे अनपडोन वाते बोंद कोर देयू.

¹⁶ तुमु खुद काजे आजाद कोयू; बाकीन आपनी इनी आजादी काजे बुराईन कोरता आडोव मा बोनावु; बाकीन तुमु खुदो काजे परमेश्वरोन दास सोमजीन चालू,

¹⁷ आखान आदर कोरु, भाशो पुठी मोंग राखू; परमेश्वर काजे बिहू, राजान सन्मान कोरु.

येसु मसिहन दुखन उदाहरण

¹⁸ हे सेवक, आखा प्रकारोन बीको साते तुमरा मालिकन अधीन रोयू, नि निस्त तिनान जू वारला एने नम्र होसे, बाकीन तिंदराबी जिंदरा काठलो विचार होय.

¹⁹ काहाकि ओगर कुदु परमेश्वरोन विचार कोरीन अन्याय से दुख झेलतू जाईन दुख सोहोन कोरे ती वारलो छे.

²⁰ काहाकि अगर तुमु पाप कोरीन धुमा खादा एने धीर धोऱ्या, ती इनामा काय मोटाइन वात छे? ओगर कुदु वारलो काम कोरीन दुख झेलतला छे, एने धीर धोरतला छे, ती यो परमेश्वर काजे गोवतेलो छे.

²¹ एने तुमु एरेन कोरता बुलावला छे, काहाकि मसिह भी तुमरेन कोरता दुख झेलीन तुमु काजे एक वारलो नमुनु आपीन गोयलु छे, कि तुमु भी तिंदरा पायोन निशानी पोर चालू.

²² नि ती चू पाप कोऱ्यु एने नि तेरे मुयो से छोळोन कानली वात निकवी.

²³ चू लोळनो सोमवीन नि लोळतू होतु, एने दुख झेलीन कुदा काजे भी धोमकी नि आपतू होतु, ओगर तुमु काजे खोरला न्यायीन हातोमा सोपतू होतु.

²⁴ चू खुद आपना पापो काजे, आपनी डील पोर लीन ख्रुस पोर चोळ गोयू, जेरेसी आमु पापोन कोरता मोरीन धारमिकतान कोरता जीवन जीवसु, तेरे मार खाणेसी तुमु वारला होया.

²⁵ काहाकि तुमु पेहेले भोटकायला गाडरान ओगोव होता, बाकीन हिमी आपना जीवन सोमावने वावा एने पुढारीनचा आव लागला छे.