1 पतरस 1 - बारेली पावरी

सुभेच्छा

¹ पतरसोनचा गोथू जू येसु मसिहन प्रेषितो छे, तीनु पोरदेशीन नाव जो पुन्तुस, गलातिन, कप्पदूकिया, आसिया एने बिथुनीयामा तितर बितोर होईन रोयला छे,

² एने परमेश्वर बासन भविष्य ग्यानोन अनसारे, आत्मान चुखला कोरनेन लारे आग्या मानने एने येसु मसिहन लुय काजे शीतळनेन कोरता नेवळाय गोयला छे, तुमु काजे अनुग्रह एने शांती जुदा रितीसी जोळती रोयसे.

एक सोरगो माईन जागू

³ आपने प्रभू येसु मसिहन परमेश्वर एने बासोन धन्यवाद होये, जिना काजे येसु मसिहन मोरलाम गोथू जीव उठनेन लारे, तेरी मोटली दया से आमु काजे जीवतली आसोन कोरता नोवलो जन्मो आप्यू,

⁴ काहाकि एक अविनाशी एने निरदोष, एने जिंदरा मनोमा काहना नि होय एने अजर वतन कोरता जी तुमरेन कोरता सोरगोमा राखली छे;

⁵ जिंदरी राखवावी परमेश्वरोन ताकतसी भुरसान लारे तीना छुटकारान कोरता, जू आवनेन टेमोमा प्रकट होयनेवाली छे, कोराय जातली छे.

⁶ एने इना वोजेसी तुमु मगन रोयतला छे, जोर कोबी पाक्को छे कि हिमी काहना दाहळान कोरता सोवटा प्रकारोन परीक्षा कोरनेसी दुखोमा छे;.

⁷ एने जो एरेन कोरता छे तुमरु पारखायलु भुरसू, जू आगठामा तातलो कोरीन नाशवान सोना गोथो बी जाफा, किमती छे, परमेश्वरोन येसु मसिह प्रकट होयने से बोळाय एने महिमा एने आदर कोरनेन ठेरावसे.

⁸ तेरेसी तुमु बीना देखे मोंग राखतला छे, एने हिमी ते तिना पोर बिगुर देखीन भी भुरसू कोरीन ओसा खुशीमा एने मगन होतु जू कोयनेन बारथे एने महिमासी भोरलु छे;

⁹ एने आपना भुरसान प्रतीफोव मतलब आत्मान छुटकारू हासील कोरतेला छे.

नाबियोन गोवायी

¹⁰ इना छुटकारान विषय पोर भविष्य कोरता, घोणा बारकाई सी हेऱ्या एने पारख कोऱ्या, जे तीना दयान विषयमा तुमरे पोर होयने होतो, भविष्यवाणी कोरली होती.

¹¹ हीनु काजे इना वातोन हेर कोऱ्या कि मसिहन आत्मा जी तिंदरेमा होती, एने पहेले गोथो मसिहन दुखोंचा तेरेन ओवते होयने वावी महिमान गोवायी आपतू होतु, चू कानला एने काहना टेमोन इशारू कोरलु होतु.

¹² तीनु पोर जो प्रकट होये कि चू आपनी नि पुन तारी सेवान कोरता जी वात कोया कोरतू होतु, जिनान खोबर हिमी तुमु काजे तिंदरे लारे जोळलो जे पवित्र आत्मान लारे जू सोरगोम गोथू मुकेल्ला छे, तुमुक वारली खोबर कोयलु; एने इनी वातोन काजे सोरग दूत भी मोन लागाळीन देखनेन मोर्जी राखताला छे.

चुखलो जीवन जीवनेन कोरता बुलावनो

¹³ इना कोरनेसी आपनी-आपनी दिमाकसी कोड्यो बांधीन, एने शुद्धीम रोयीण, तिना दयान आखी आस राखू जी येसु मसिहक प्रकट होयनेन कोरता, टेम तुमु काजे जोळनाय छे.

¹⁴ आग्या पावने वावा पुऱ्यान ओगोव आपनी अग्यानता टेमोन जुनली लालचोन तोसा मा बोनु.

¹⁵ बाकीन जोसी तुमरू बुलावने वावू चुखलु छे, तोसोत तुमु भी तुमरा आखा चाल चलनमा पवित्र बोनु.

¹⁶ काहाकि लिखलो छे, “चुखला बोनु, काहाकि मे चुखलु छे.”

¹⁷ एने तेत्यार तुमु “हे बास” कोयीन तेरेनचा प्रार्थना कोरतेला छे, जू बिगुर भेदभाव हर एकोन कामोन अनसारे न्याय कोरतेलू छे, ती आपनी पोरदेशी होयनेन टेम बिहीन निकावू.

¹⁸ काहाकि तुमु जानतला छे कि तुमरा वायबार चाल चोलन जी बाप दादो से चाल रोयी, तीनासी तुमरु छुटकारू चांदी सोनो ओगर नाशवान वस्तून चुरी नि होये.

¹⁹ बाकीन निरदोष एने चुखलो गाडरो, मतलब मसिहन किमतीन लुयोन लारे होयलो.

²⁰ तेरो ग्यान ते जोगोन घोडनेन पेहेलेसी जान लेदलु होतु, पुन हिमी आखरी युगमा तुमरेन कोरता प्रकट होयलू.

²¹ तेरे लारे तुमु तिना परमेश्वर पोर भुरसू कोरतेला छे, जीनाक मोरलामा गोथो जीवाळ्यो एने महिमा आप्यू कि तुमरु भुरसू एने आस परमेश्वर पोर होयसे.

²² आखरीमा जेतार तुमु वारला विचार एने मोनमा दोगो नि होय मोंगोन निमित्त खोरो माणसोसी आपना मोनो काजे चुखा कोरला छे, ती तन मन लागाळीन एक भाश्योसी लोके मोंग राखू.

²³ काहाकि तुमु नाशवान नि बाकीन अविनाशी बिजडासी, परमेश्वरोन जीवतला एने कायम रहनेवाला वचनोन लारे नवलू जन्मो जोळलो छे.

²⁴ काहाकि हर एक प्राणी चारान तोसु छे, एने हेरी आखी शोभा चारान फुलन तोसी छे चारू सुख जातलु छे, एने फुल गोव जातला छे,

²⁵ बाकीन प्रभून वचन पिढ्यान पिढ्या एक जागे रोयतलू छे एने योत वारली खोबरोन वचन छे जू तुमु काजे कोवायलो होतो.