1 योहान 5 - बारेली पावरीसंसारपोर विजय 1 जिंदरु यु भुरसू छे कि येसु मसिह छे, चू परमेश्वरोनचा गोथू बोनलु छे; एने जू कुदू बोनावने वावासी मोंग कोरतेलू, चू तेरो पोर बी मोंग कोरतेलू, जू तिना जुव गोथू बोनलू छे. 2 जेतार आमु परमेश्वर पोर मोंग कोरतेला छे एने तेरी आग्या काजे पावतेला छे, ती तीना जुव गोथो आमु जानतला छे कि आमु परमेश्वरोन पुऱ्या पोर मोंग कोरतेला. 3 काहाकि परमेश्वर पोर मोंग कोरणे यो छे कि आमु तेरा आग्या काजे माने; एने तेरी आग्या कोठीन नि होय. 4 काहाकि जो काय परमेश्वर जू गोथो बोनलो छे, चू जोगो पोर जय हासील कोरे; एने चू विजय जीनासी जोगो पोर जय हासील कोरला छे, आमरू भुरसू छे. 5 जोगो पोर जय हासील कोरणे वावु कून छे? बाकीन चू तेरु भुरसू छे कि, येसु परमेश्वरोन पुऱ्यु छे. मसिहन बारामा गोवायी 6 यो छे चू जू पाणी एने लुयोन लारे आवलु होतु मोटलोब येसु मसिह चू नि निसतो पाणीन लारे नि तेत्यार पाणी एने लुय दुयोन लारे आवलो होतो. एने यी आत्मा छे जी गोवायी आपे, काहाकि आत्मा खोरली छे. 7 एने जू गोवायी देतलू छे, चू आत्मा छे; काहाकि आत्मा खोरली छे. 8 गोवायी आपन्या तीन छे, आत्मा एने पाणी एने लुय; एने तीनु एकुत वातो पोर सहमत छे. 9 तेत्यार माणसोन गोवायी मान लेतला छे, ती परमेश्वरोन गोवायी ते आखा गोथी बोढीन छे, एने परमेश्वरोन गोवायी जी छे कि चू तेरा पुऱ्यान बारामा गोवायी आपलु छे, 10 जे परमेश्वरोन पुऱ्या पोर भुरसू कोरे चु आपनेमा गोवायी राखतला, जे परमेश्वर पोर भुरसू नि कोऱ्या तीनुक चू झुटू ठेरावलू छे काहाकि चे तिनी गोवायी पोर भुरसू नि कोऱ्या जो परमेश्वर तेरा पुऱ्यान बारामा गोवायी आपलु से. 11 एने ची गोवायी जी छे, कि परमेश्वर आपनुक ओमोरकाईन जीवन आप रोयू, एने यो जीवन तेरा पुऱ्यामा छे. 12 जिंदरे जु येसु छे तिंदरे जु जीवन छे, एने जिंदरे जु परमेश्वरोन पुऱ्यु नि होय तिंदरे जु जीवन बी नि होय. 13 मे तुमुक, जू परमेश्वरोन पुऱ्यान नाव पोर भुरसू कोरतेला, एरेन कोरता लिखलो छे कि तुमु जान जावू ओमोर जीवाय तुमरी छे. प्रभाव वावी प्रार्थना 14 आमु उवेखतला कि आमु मोरनेमा गोथा निकवीन जीवनोमा पुग रोया; काहाकि आमु भाशोसी मोंग कोरतेला छे जू मोंग नी कोरतेलू चू मारनेन दशामा रोयतलु. 15 जू कुदू आपना भाशो पुठी दुष्मोनी कोरतेलू, चू हत्यारु छे एने तुमु जानतेला छे कि कानलात हत्यारमा ओमोर जीवन नी रोयतलु. 16 अगर कुदू आपना भाश काजे पाप कोरतेलू देखे, जेरो फोव मोरण नि होय, ती विनता कोरु, एने परमेश्वर तेरेन कोरता, जे असो पाप कोऱ्या जेरो फोव मोरण नि होसे, जीवाय आपसे. ओसलो पाप बी रोये कि तेरो फोव मोरण छे एरा बारामा मे विनता कोरणे नि कोयो. 17 आखा भातीन अधोरमोन पाप छे, बाकीन असोलो पाप बी छे, जेरो फोव मोत नि होय. निष्कर्ष 18 आपनु जानजे कि जो काय परमेश्वर सी बोनलो छे, चू पाप नि कोरतेलु; बाकीन जो कुदू परमेश्वर सी बोनलो से तीनाक चू वाचाळीन राकतेलु; एने चू भुतडू तीनाक छिम नि सोके. 19 आमु जानतला कि आमु परमेश्वरोनचा गोथा से एने आखो जोग भुतडान वशमा छे. 20 एने यो बी जाणेजे, परमेश्वरोन पुऱ्यु आव रोयू एने चू आमुक सोमज आपलु छे, हिमी तिनी खोराइ काजे जानजे, एने आमु तीना माइली जी खोराइ छे, मतलब परमेश्वरोन पुऱ्यु येसु मसिहमा रोयतला. खोरलू परमेश्वर ओमोरकाईन जीवाय यित छे. 21 हे पुऱ्या, खुदो काजे मूर्तीसी वाचाडू. |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation