1 योहान 4 - बारेली पावरीआत्मा काजे पारखू 1 हे मोंगावा, एक आत्मान तेरेन तोसो मा कोरु, नि ती आत्मा काजे पारखू कि चे परमेश्वर जुव गोथा छे कि नि; काहाकि झुटा भविष्य कोरणे वावा जोगोमा निकवीन आव लागला छे. 2 परमेश्वरोन आत्मा तुमु इना रितीसी उवखी सोकतला; जी आत्मा मान लेतली छे, कि येसु मसिह डीलोमा होईन आवलो छे, चू परमेश्वर भूनी गोथू छे. 3 एने जी आत्मा येसु काजे नि मानतेली ची परमेश्वर जुव गोथी नि होय; एने चे ते मसिहक रुकने वावी आत्मा छे, जेरी वाटे तुमु सोमवी रोया कि चू आवने वावू छे एने हिमी बी जोगोमा छे. 4 हे पुऱ्या, तुमु परमेश्वरोन छे, एने तुमु तीना पोर जीत गोयला छे; काहाकि जो तुमरेमा छे चू तेरेमा जो जोगोमा छे मोटलु छे. 5 चे जोगोन छे, तिनान कोरता चे जोगोन वाते कोरतेला छे, एने जोग तिंदरो सोमवतलो छे. 6 आमु परमेश्वरोन छे, यु परमेश्वर काजे उवेखतलू चू आमरी सोमवतलु छे; जू परमेश्वर काजे नि उवखे चू आमरेसी नी सोमजतलु इना रितीसी खोरली आत्मा एने भ्रमणोन आत्मा काजे उवखी लेतला छे. मोंगोन लारे परमेश्वर काजे जाननो 7 हे मोंगावा, आमु एक दिसरासी मोंग कोरु; काहाकि मोंग परमेश्वर जुव गोथो छे जो कुदू मोंग कोरतेलु छे, चू परमेश्वर जुव गोथो पोयदा होयलु छे. 8 जू मोंग नि कोरतेलु, चू परमेश्वर काजे नि उवेखतलु काहाकि परमेश्वर मोंग छे. 9 जो मोंग परमेश्वर आमरेपोर कोरलु छे, जो इनामा प्रकट होयो कि परमेश्वर तेरा एकुत पुऱ्या काजे जोगोमा मुकल्या, कि आमु तेरे लारे जीवन हासील कोरजे. 10 मोंग इनामा नि कि आमु परमेश्वर पोर मोंग कोऱ्या, बाकीन इनाम छे कि चू आमरेपोर मोंग कोऱ्यु एने आमरा पापोन पश्चातापन कोरता हेरा पुऱ्या काजे मूकल्यु. 11 हे मोंगावा, जेतार परमेश्वर आमरेपोर मोंग कोऱ्यु ती आमु काजे बी आपना एक दिसरान इचमा मोंग कोरणे जुवे. मोंगोन लारे परमेश्वर काजे देखनो 12 बाकीन परमेश्वर काजे, कोबी कुदू नि देख्यो अगर आमु आपनेन इचमा मोंग कोरती, ती परमेश्वर आपनेमा रोयतलु एने तेरो मोंग आमरेमा सिद्ध होय गोयलो छे. 13 इनासी आमु उवेखतला कि आमु तेरेमा बोनला रोयतला, एने चू आमरेमा; काहाकि चू आपना आत्मामा गोथो आमुक आपलु छे. 14 आमु देखी बी लेदा एने गोवायी आपजे कि बास पुऱ्या काजे जोगोन छुटकारू आपन्यु कोरीन मुकली रोयू. 15 जो कुदू यो मान लेतलु छे कि येसु परमेश्वरोन पुऱ्यो छे, परमेश्वर तिंदरेमा बोनीन रोयतलु, एने चू परमेश्वरमा. 16 जो मोंग परमेश्वर आमरेपोर कोरतेलु, तीनाक आमु उवखी लेदा एने आमुक तेरु भुरसू छे. परमेश्वर मोंग छे, एने चू मोंगोमा बोनीन रोयतलु, चू परमेश्वरमा बोनीन रोयतलु, एने परमेश्वर तिंदरेमा बोनीन रोयतलु. 17 इनासी मोंग आमरेमा सिद्ध होये, कि आमुक नियावोन दाहळे हिंमत होय; काहाकि जोसू चू छे तोसोच जोगोमा आमु भी छे. 18 मोंगोमा बिक नि रोयतला, नि तेत्यार सिद्ध मोंग बिक काजे नांबे कोर देदला छे; काहाकि भाशोन संबंध दोंडोसी होयतलो, एने जू बिक धोरतलु चू मोंगोमा सिद्ध नि होयू. 19 आमु इनान कोरता मोंग कोरतेला, कि पेहेले चू आमरेपोर मोंग कोऱ्यु. 20 कोबी कुदू कोये, “मे परमेश्वर पोर मोंग कोरतेलू छे,” एने आपना भाशो पोर दुष्मोनी राखतला कि चू झुटू छे, काहाकि चू आपना भाश पुठी जिनाक चू देखलू छे मोंग नि कोरतेलू, ती चू परमेश्वर पोर बी जीनाक चू नि देख्यू नि कोर सोकतलु. 21 तिना जुव गोथी आमुक जी आग्या जोडी, ती जो कुदू परमेश्वर पोर मोंग कोरतेलू चू आपना भाशो पोर बी मोंग कोरे. |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation