1 योहान 3 - बारेली पावरी1 देखू, बास आमरेपोर कोसो मोंग कोरतेलू छे कि आमु परमेश्वरोन पुऱ्या कोवायजे; एने आमु छे बी इनान कोरता जोग आमुक नी उवख्यू. 2 हे मोंगावा, हिमी आपु परमेश्वरोन पुऱ्या छे एने हिमी तोक यो प्रगट नि होयो कि आमु काय-काय होयसु, ओतरो जान लेतला छे कि जेतार चू प्रगट होयसे ती आमु तेरे सामने होयसू, काहाकि तीनाक तोसुच देखसु जोसू चू छे. 3 एने जू कुदू तीना पोर जी आस राखतलु छे चू आपने खुदो काजे तोसुत चुखा कोरतेला जोसू चू चुखलु छे. पाप एने परमेश्वरोन पुऱ्यु 4 जू कुदु पाप कोरतेलु छे चू नियम शास्त्रण खिलाप कोरतेलू छे; एने पाप ते नियम शास्त्रण खिलाप छे. 5 तुमु जानतला छे कि चू इनान कोरता प्रगट होयू कि पापो काजे हारवी देय; एने तेरा स्वभाव पाप नि होय. 6 जू कुदू तिंदरेमा बोनीन रोयतलु, चू पाप नी कोरतेलू, जू कुदू पाप कोरतेलू छे, चू ते नि ते तीनाक देखलु छे, एने तीनाक उवखतलु छे. 7 हे पुऱ्या, कुदान भनकावामा नी आवे, आपनो जू धोरममा काम कोरतेला, चू तेरे सारखु धोरमी छे. 8 जू कुदू पाप कोरतेलु छे चू भुतडा जुव गोथो छे काहाकि भुतडू सुरुसी पाप कोरतू आवलु छे, परमेश्वरोन पुऱ्यु इनान कोरता प्रगट होयू कि भुतडान कामोन नाश कोरु. 9 जू कुदु परमेश्वरोनचा गोथू पोयदा होयलू छे चू पाप नी कोरतेलू; काहाकि तेरो बीज तेरेमा बोनीन रोयतलो, एने चू पाप कोरी नी सोकतलु काहाकि परमेश्वरोनचा गोथू पोयदा होयलु छे. 10 इनामा परमेश्वरोन पुऱ्या एने भुतडान पुऱ्या उवखाय जातला छे; जो कुदू धर्मान काम नी कोरलु चू परमेश्वरसी नी होय, एने नि चू जू आपना भाशो पोर मोंग नी कोरतेलु. मोंगोमा रोयू 11 काहाकि जी वारली खोबर तुमु पेहले गोथा सोमव्या, चे यो छे कि आमु एक दिसरा पोर मोंग कोरे; 12 एने केनोन सारखो मा बोलू जू तिना पापोसी होतु, एने जू आपना भाशो काजे मार देदलु इनान कोरता कि तेरा कामे भुंडला होता, एने तेरा भाशोन काम धोरमीन होता. 13 हे भाशो, कोदि जोग तुमरे पोर दुष्मोनी कोरे ती नोवलाय मा होयू. 14 आमु उवेखतला कि आमु मोरनेमा गोथा निकवीन जीवनोमा पुग रोया; काहाकि आमु भाशोसी मोंग कोरतेला छे जू मोंग नी कोरतेलू चू मोरनेन दशामा रोयतलु. 15 जू कुदू आपना भाशो पुठी दुष्मोनी कोरतेलू, चू हत्यारु छे, एने तुमु जानतेला छे कि काहना हत्यारमा ओमोर जीवन नी रोयतलु. 16 आमु मोंग तीना पोरसी जाण्या कि चू आमरेन कोरता तेरु जीव आप देदु एने आमु बी भाशोन कोरता जीव आपनो जुवे. 17 बाकीन जिना कुदा जुव जोगोन धोन छे एने चू तेरा भाशो काजे गोरीब देखीन तेरो पोर गिन नि कोरनो जुवे, ती तेरेमा परमेश्वरोन मोंग कोसो बोनीन रोय सोकसे? 18 हे पुऱ्या आमु वचन एने जिब सी नि एने खोरला रितीसी बी मोंग कोरु. परमेश्वरोन सामने साहस 19 इनासी आमु जानसु कि आमु खोरलान छे, एने जिना वातोमा आमरे मोन आमुक गुणू आपसे तेरा बारामा, तेरे ओगोव आपना मोनो काजे हिंमत आप सोकसू; 20 काहाकि परमेश्वर आमरा मोनोसी मोटू छे, एने आखोत जानतलु छे. 21 हे मोंगावा, कोदि आमरो मोन गुणू नी आपे ती आमुक परमेश्वर ओगोव हिंमत होयतेलु छे. 22 एने जू काय आमु मांगतेला चो आमुक जोळतलो काहाकि आमु तेरा आग्या काजे पावतेला छे एने जो तीनाक गोवतेलो चोत कोरतला छे. 23 तेरी आग्या जी छे कि आमु तेरा पुऱ्या येसु मसिहन नावो पोर भुरसू कोरजे एने जोसो चू आमुक आग्या आपलु छे तिनान लारे तीनामा मोंग राखे 24 जू तेरा आग्या काजे पावतलु चू तेरेमा एने चू तीनामा बोनीन रोयतलु, एने इनामा मतलब तिना आत्मा जुव गोथो जो चू आमुक आपलु छे कि चू आमरेमा बोनीन रोयतलु. |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation