1 योहान 2 - बारेली पावरी

येसु आपनु मदतगार

¹ हे मारा पुऱ्या मे यी वात तुमुक इनान कोरता लिखलो छे कि तुमु पाप नि कोरु; एने जर कुदु पाप कोरे, ती बासो पुठी आमरू एक मदतगार छे, मतलब धोरमी येसु मसिह;.

² एने होयुत आमरे पापोन पश्चाताप छे, एने बोस आमरो ओतरो नि आखा जोगोन पापोन बी.

परमेश्वरोन आग्या

³ जर कोदि आमु हेरी आग्या काजे मानसु, ती इनुक आमु जान लेसू कि आमु हिनाक जान गोयलु छे.

⁴ जो कुदू यो कोयतू होसे, मे हिनाक जान गोयलु छे, एने हेरी आग्या काजे नि मानतला, होयू झुटू छे एने हिनामा खोरलो नि होय;

⁵ पुन जू कुदु हेरा वचन पोर चाले, हिनाम छाचलीन परमेश्वरोन मोंग सिद्ध होयलु छे, इनासी आमु जानतला छे कि आमु होया छे.

⁶ जो कुदू यो कोयतेलु छे कि मे हिनामा बोनीन रोयतलु, हिनाक जुवे कि आपु बी होसात चाले जोसू होयू चाले.

आखासी मोंग कोरु

⁷ हे मोंगावा, मे तुमुक दिसरी नोवीन आग्या नि लिखतलु, पुन चीत जुनली आग्या जी पेहेले गोथू तुमुक जोळली छे, यी जुनली आग्या चो वचन छे जिनाक तुमु सोमवला छे.

⁸ ते बी मे तुमुक नोवीन आग्या लिखो, एने यो तीनामा एने तारेमा खोरली ठेरायली छे; काहाकि आंदारलो मिटायतू जातलु छे, एने खोरलान विजावो हिमी चोमोकने लागलो छे.

⁹ जो कुदू यो कोयतलो कि मे विजावामा छे एने आपना भाश पूठी बुराई राखतलु छे, होयू हांजू तोक आंदारामा छे.

¹⁰ जो कुदू आपना भाश पोर मोंग कोरतेला छे चू विजावामा रोयतलु, एने ठूकर नि खाय सोकतलु.

¹¹ पुन जो कुदु आपना भाश पुठी बुराई कोरतेलू छे चू आंदारामा छे एने आंदारलामा चालतलु छे, एने नि जानतलु कि का जाने छे, काहाकि आंदारो हेरा डूवा काजे आंदवो कोर देदलो छे.

चिट्ठी लिखने वजह

¹² ए पुऱ्या मी तुसेक इनान कोरीन लिखतलु छे कि येसुन नावोसी तूमरा पाप माफ होयला छे.

¹³ हे बास मी तुसे काजे इनान कोरीन लिखो कि जू पेहेलेन छे तू हिनाक जाणतो होय, ए जुवान्या मे तुमुक इनान कोरता लिखतोलु तुमु हीना भुतडा पर जीत हासील कोरला, ए पुऱ्या मी तुमु काजे इनान कोरता लिखलू छे कि बासो काजे जान गोयला छे.

¹⁴ हे बास मे तुमुक इनान कोरता लिखलू छे कि जो पेहेलेन छे तू हिनाक जान गोयलु छे, ए जुवान्या मे तुमुक इनान कोरता लिखलू छे कि तुमु बोलवान छे, एने परमेश्वरोन वचन तुमरेमा बोनलू रोयतलु छे, एने तू हीना भुतडा पोर जीत कोरलु छे.

संसारोन बारामा चेतावनी

¹⁵ तुमु नि ते संसारसी एने नि जोगो माइली चीजोसी मोंग राखू, जोर कुदू संसारसी मोंग कोरतू होसे, ती हिनामा बासोन मोंग नि होय.

¹⁶ काहाकि जो काय जोगमा छे, यो कि डीलोन भुंडली मोर्जी एने डूवान लालच एने जीवनोन मोटाय होये बासोन भूनी गोथो नि पुन संसार भूनी गोथो छे.

¹⁷ जोग एने हिंदरी भुंडली मोर्जी दुयू नाश होय जातला छे पुन जू परमेश्वरोन मोर्जी पोर चालतलु छे, चू हमेशा बोनी रोयसे.

आखरी टेमोन धोकू

¹⁸ ए पुऱ्या यु आखरी टेम छे; एने जोसो तू सोमवलू छे कि मसिहक रुकने वावु आवन्यू छे, हीनान अनसारे हिमी बी लोके जोना मसिह रुकने वावा उठीन उबा रोय गोयला छे; इनुसी आमु जानतला छे कि यु आखरी टेम छे.

¹⁹ होया निकोवला ते आमरेमा गोथो छे, पुन आमरे मायला नि होता काहाकि जोर होया आमरे मायला होता, ती आमरे साते रोयता; पुन इनान कोरता निकवी गोया कि यो प्रकट होयो कि होया आखा आमरे मायला नि होय.

²⁰ पुन तारो ते हीना चुखलासी अभिषेक होयलू छे, एने तुमु आखो जानतेला.

²¹ मे तुसेक इनान कोरता नि लिख्यू कि तू खरलो नि जानतलु, पुन इनान कोरता कि हिनाक जानतलु छे, एने इनान कोरता कहानलो झूट, खोरला भूनी गोथो नि.

²² झूट कून छे? निसतू होयू जू येसुन मसिह होयनेन मोना कोरतेलु छे; एने मसिहक रुकने वावु होयू छे, जू बासोन एने पुऱ्यान इनकार कोरतेलु छे.

²³ जू कुदू पुऱ्यान इनकार कोरतेलू छे तेरे पास बास बी नि होय.

²⁴ जो काय तू पेहेलेन सोमवला छे चो होयू तारेमा बोनलु रोये ती तू बी पुऱ्यामा एने बासोमा बोनलु रोयीस.

ओमोरकाईन जीवनोन वायदू

²⁵ एने जिंदरी होयू आमरे कोरता वायदू कोऱ्यु, होयो ओमोर जीवनोन छे.

²⁶ मे यी वात तुमुक हिंदरा बारामा लिखलू छे, यो तुमुक भनकावतलो छे;

²⁷ पुन तुमरु होयू अभिषेक जू हेरेनचा गोथो कोरलु होतु, तारेमा बोनी रोयतलु छे; एने तुसेक एरू गोरोज नि होय कि कुदू तुमुक सिकाळे नीती जोसो होयो अभिषेक जू हेरेनचा गोथू कोरलु गोयू तुमुक आखी वात सिकाळतला छे एने यो खोरलो छे एने झूट नि होय; एने जोसू होयू तुमुक सिकाळलु छे होसात तुमु हिनामा बोनला रोयतला छे.

परमेश्वरोन पुऱ्या

²⁸ हे पुऱ्या, येसुमा बोनला रोयु कि जेतार होयु प्रगट होये ती आमुक हियाव होये, एने आमु हेरे आवने पोर हेरे सामने लाजवाये नि.

²⁹ जोर तुमु जानता होसे कि होया धोरमी छे, ती यो बी जानता होसे कि जू कुदू धोरमोन काम कोरतेलु छे चू हीनासी पोयदा होयलू छे.