1 योहान 1 - बारेली पावरी

जीवनोन वचनोन घोषणा

¹ तिना जीवनोन वचनोन बारामा मे जू पेहेले गोथू होतु, जीनाक आमु सोमव्या, एने जीनाक आपने डूवे सी देख्या, एने आमु ध्यान दिन देख्या एने हाते कोरीन छिम्या.

² यो जीवन प्रगट होयो, एने आमु तीनाक देख्या एने तेरी गोवायी आपतला, एने तुमुक तिना ओमोर जीवनोन वारली खोबर आपतला जू बासो साते होतो एने आमरेपोर प्रगट होयू.

³ जो काय आमु देख्या एने सोमवतला छे तेरो वारली खोबर तुमु काजे बी आपजे, इनान कोरता कि तुमु बी आमरे पुठी भागीदारी होयू; एने आमरी जी सहभागीता बास पुठी एने तेरु पुऱ्यु येसु मसिह पुठी छे.

⁴ एने जे वाते आमु एरेन कोरता लिख रोया कि आमरी खुशी पुरी होय जाय.

परमेश्वरोन साते भेचकायनो

⁵ जी वारली खोबर आमु तीना जुव गोथा सोमव्या एने तुमु काजे सोमवाळ रोया, चो यो छे कि परमेश्वर विजावो छे एने तेरे सामने आंदारलो नि होय.

⁶ कोदि आमु कोयजे कि तेरी पुठी आमरी भागीदारी छे एने ओवी आंदारलामा चाले, ती आमु झुटा छे एने खोरला पोर नि चालतला.

⁷ बाकीन कोदि जोसो चू विजावामा छे तोसोत आपनु बी विजावामा चालू, ती एक दिसरा पुठी सहभागीता रोयतला छे एने तेरु पुऱ्यु येसुन लुय आमुक आखा पापोमा गोथू चुखो कोरतेलू छे.

⁸ कोदि आमु कोयजे कि आमरेन काहीन बी पाप नि होय, ती आपने खुद काजे धोकू आपतला छे, एने आमरेमा खोरलो नि होय.

⁹ कोदि आमु आपना खुदोन पापो काजे मान लेयू ती चू आमरा पापो काजे माफ कोरणे एने आमुक आखा अधोरमीमा गोथो चुखो कोरनेमा विश्वासयोग्य एने धोरमी छे.

¹⁰ कोदि आमु कोयजे कि आमु पाप नि कोऱ्या ती तीनाक झुटू ठेरावतेला, एने तेरो वचन आमरेमा नि होय.