1 कुरीन्थियो 9 - बारेली पावरी

अगवान उदाहरण

¹ काय मे आजाद नी होय? काय मे प्रेषित नी होय? काय मे येसु काजे जू आमरू प्रभू छे, नी देख्यू? काय तुमु प्रभूमा मारा बोनावला नी होय?

² कोदि मे दिसरान कोरता प्रेषित नी होय, तीबी तुमरेन कोरता ते छे; काहाकि तुमु प्रभूमा मारी प्रेरीताइ पोर छापू छे.

³ जे मेसेक पारखतला छे, हिंदरेन कोरता यो मारो जोवाब छे.

⁴ काय आमुक खाणे-पिणेन होक नी होय?

⁵ काय आमुक यु होक नी होय, कि काहणी मसिही बहोनिश साते वियाव कोरीन तिनीक लीन फिरे, जोसो दिसरा प्रेषितोन एने प्रभून भाशे एने कैफा कोरतेला छे?

⁶ नीती निस्तो मेसेक एने बरनाबास काजेत होक नी होय कि कोमाय कोरनो छुळे.

⁷ कून कोबी आपनी पोळनेसी खायीन सिपायळान काम कोरतेलू छे? कून आंगुरोन वाळी लागाळीन हेरो फोव नी खातलो? कून गाडरान राखवावी कोरीन हिंदरो दुद नी पीतलो?

⁸ काय मे जे वाते माणसोन रिती पोर बुलतलु छे?

⁹ काय नियम शास्त्र बी यो नी कोयतलो? काहाकि मुसा नियम शास्त्रामा लिखायलु छे, “दोवळनेन टेमे चालतला बुल्योन मूय मा बांधु.” काय परमेश्वर बुल्यो जून चिंता कोरतेलू छे?

¹⁰ नीती खास कोरीन आमरेन कोरता कोयतेला छे होव, आमरेन कोरता लिखाय गोयो, काहाकि उचित छे कि जुपने वावू आसोसी जुपे एने दावणे वावू भागीदार होयनेन आसोसी दावणी कोरे.

¹¹ आखरी जेतार कि आमु तुमरेन कोरता आत्मिक चीजे वेऱ्या ती काय जो काय मोटली वात छे कि तुमरा डीलोन चीजोन फोव काटे.

¹² जेतार दिसरान तुमरे पोर यो होक छे, ती काय आमरो इना गोथो जादा नी होसे? बाकीन आमु यु होक कामोमा नी लावनो; बाकीन आखो काय सोहोतला छे कि आमरे लारे मसिहन वारली खोबरमा काहीन रुकावट नी रोये.

¹³ काय तुमु नी जानतला कि जू मंदीरमा सेवा कोरतेलू चू मंदीरमा गोथू खातलु छे; एने जू वेदीन सेवा कोरतेलू, चू वेदी साते भागीदार होयतलु छे?

¹⁴ इना रितीसी प्रभू ठेराव्यु कि जे माणसे वारली खोबर सोमवाळतला छे, तिंदरो जीवन वारली खोबरसी होये.

¹⁵ बाकीन मे इनामा गोथू कानली बी वात कामोमा नी लाव्यू, एने मे जे वाते इनान कोरता नी लिख्यू कि मारेन कोरता ओसो कोराय जाय, काहाकि इना साते मारो मोरनोत वारू छे कि कुदु मारा मोटाय काजे वायबार ठेरावे.

¹⁶ कोदि मे वारली खोबर सोमवाळो, ती मारेन कोरता काय मोटायन वात नी होय; काहाकि यो मारेन कोरता गोरोज छे कोदि मे वारली खोबर नी सोमवाळो, ती मारे पोर हाय!.

¹⁷ काहाकि कोबी मारी मोर्जीसी यो कोरो ती दाहाळकी मेसेक जोळतली छे, एने कोदि मारी मोर्जीसी नी कोरतू, तीबी पुढारीपोन मेसेक सोपाय गोयलो छे.

¹⁸ ती मारी कानली दाहाळकी छे? यो कि वारली खोबर सोमवाळने मा मे मसिहन वारली खोबर साते एकमेक कोर दोम, न्या तोक कि वारली खोबरमा जू मारू होक छे तीनाक भी मे पुरा रितीसी कामोमा नी लावो.

आखान सेवा

¹⁹ काहाकि आखासी स्वतंत्र होयने पोर बी मे खुदो काजे आखान दास बोनाव लेदलु छे कि जादा माणसो काजे हापकी लावो.

²⁰ मे यहुदियान कोरता यहुदि बोन्यू कि यहुदि काजे हापकी लावो जे माणसे नियम शास्त्रान अधीन छे तिंदरेन कोरता मे नियम शास्त्रोन अधीन नी होयने पोर नियम शास्त्रोन अधीन बोन्यू कि तीनुक जो नियम शास्त्रान अधीन नी होय, हापकी लावो.

²¹ जे व्यवस्थाहीन छे तिंदरेन कोरीन मे जो परमेश्वरोन नियमशास्त्रासी हीन नी होय बाकीन मसिहन नियम शास्त्रान ओधीन छे, नियम शास्त्रान अधीन छे, नियमशास्त्रहीन तोसा बोनु कि अधोरमी काजे हापकी लावू.

²² मे कोम ताकत वावान कोरता कोम ताकत वावू बोन्यू कि कोम ताकत वावा काजे हापकी लावो मे आखा माणसोन कोरता आखो काय बोन्यू कि काहनाबी रितीसी काहना एकोन छुटकारू कोरावो.

²³ मे यो आखो काहीन वारली खोबरोन कोरता कोरो कि दिसरान साते तिंदरो भागीदार होय जाम.

मसिही दवळ

²⁴ काय तुमु नी जानतला कि दोवोळनेमा ते दोवोळतला आखा छे, बाकीन इनाम एकुत ली जातलु? तुमु ओसलोत दोवेळना काजे जिकू.

²⁵ होर एक पेहेलवान आखा रितीन तंबू कोरतेलू छे; होयु एक चिमटायने वावा मुकुट काजे हासील कोरनेन कोरता यो आखो कोरतेलू छे, बाकीन आमु ते तीना मुकुटोन कोरता कोरतेला जो चिमटायतेलो नी.

²⁶ इनान कोरता मे ते इना रितीसी दोवेळतलु छे, बाकीन लक्षहीन नी होय; मे भी इना रितीसी मुकासी लोळतलु छे, बाकीन हिंदरेन तोसो नी जू वाहवाक ठूकतू जायीन लोळतलु छे.

²⁷ बाकीन मे आपना डीलो काजे देतलु कुटतलु एने ताबामा लावतलु छे, ओसो नी होये कि दिसरा काजे प्रचार कोरीन मे खुद कानला रितीसी रिकामु ठेरायो.