1 कुरीन्थियो 8 - बारेली पावरी

चोळावलो खाणो

¹ हिमी मूर्ती ओगोव बलिदान कोरला चीजोन बारामा आमुक मालूम छे कि आपु आखा काजे मालूम छे. ग्यान मोटाय पोयदा कोरतेला छे, बाकीन मोंगसी उन्नती होयतेली छे.

² अगर कुदू सोमजे कि मे काहीन जानतलु छे ती जोसो सोमोजतलु तोसो हिमी तोक नी सोमजी रोयू.

³ बाकीन कुदू परमेश्वर पोर मोंग कोरे ती परमेश्वर तीना काजे उवेखतलु कि.

⁴ आखरी मूर्ती ओगोव बलिदान कोरनो चीजोन खाणेन बारामा आमु काजे मालूम छे कि मूर्ती जोगोमा काय चीज नी होय एक छुळीन ओवी कुदू परमेश्वर नी होय.

⁵ हिमी चालू जोगोमा एने सोरगोमा जुदा सोवटा परमेश्वर कोवायतेला जोसा कि जुदा परमेश्वर एने जुदा प्रभू छे.

⁶ ते बी आमरेन कोरता ते एकुत परमेश्वर छे; मतलब बास जिना तोरोफसी आखा चीजे एने आपना तिनान कोरता छे मतलब, येसु मसिहन जिनान लारे आखा चीजे बोन्या एने आपनु तेरे लारे.

⁷ बाकीन आखा काजे यो ग्यान नी होय, बाकीन काहनास ते हिमी तोक मूर्ती काजे काहीन सोमजीन मूर्तीन सामने बलिदान कोरली चीजो काजे काहीन सोमजीन खातला एने तिंदरो विचार कोमजुर होयने वोजेसी भुंडली होय जातलो छे.

⁸ खाणो आमु काजे परमेश्वरोनचा नी पुगाळतलो, अगर आमु नी खाजे ती आपनो काहीन नुकसान नी होये एने खाय ती काय लाभ नी होय.

⁹ बाकीन सावधान, ओसो नी होये कि तुमरी मोकवेपोना कुदान कोमजुर वावान कोरता ठूकरन मतलब बोने.

¹⁰ काहाकि ओगर कुदू तार सारखा ग्यानी मूर्तीन सामने मंदीरमा खाणो खातलु देखे एने चा कोमजुरी वावा होसे ती काय तिंदरा विचारे मूर्तीन ओगोव बलिदान कोरलो चीज खाणेन हिंमत नी होय जासे.

¹¹ इना रितीसी तारा ग्यानोन वोजेसी कोमजुर भाश जिनान कोरता येसु मसिह मोऱ्यु, नाश होय जासे.

¹² इना रितीसी भाशोन खिलाप गुणू कोरनेसी एने तिंदरो कोमजुर मोन काजे दुख आपनेसी तुमु मसिहन खिलाप पाप कोरतेला.

¹³ इना वोजेसी अगर खाणो मारा भाश काजे ठूकर खावाळे, ती मे कोबी काहना रितीसी मास नी खाम ओसो नी होये कि मारा भाशोन कोरता ठूकरोन वजा बोने.