1 कुरीन्थियो 7 - बारेली पावरी

वियावोन सिद्धांत

¹ तिनी वातोन बारामा जो काय तुमु लिख्या, यो वारलो छे कि माणूस बायोर काजे नी छिमे.

² बाकीन व्यभिचारोन बिकोसी होर एक माणसोन लाडी एने होर एक बायरोन पाहणू रोये.

³ घरवावू आपनी लाडीन होक पुरो कोरे; एने तोसोच लाडी बी आपना घरवावान.

⁴ लाडी काजे खुदोन डीलोपोर होक नी होय बाकीन हेरा घरवावान होक छे; तोसोच घरवावा काजे बी आपना डीलोपोर होक नी होय बाकीन लाडीन छे.

⁵ तुमु एक दिसरासी ओलोग मा रोयू; बाकीन निस्तो काहीन टेमे तोक आपोसमा सोम्मतीसी कि प्रार्थनान कोरता टेम जोळे, एने पोछो एक सात रोयू; ओसो नी होयनो जुवे कि टेम नी आपनेन वोजेसी भुतडू तुमुक पारखे.

⁶ बाकीन मे यो कोय चो अनुमती छे नी कि आग्या.

⁷ मेसेक यो जुवे कि जोसू मे छे, तोसाच आखा माणसे रोये; बाकीन होर एक काजे परमेश्वरोनचा गोथो खास वरदान जोळला छे; काहना काजे कानला रितीन, एने कानला काजे काहना एने रितीन.

बिना वियाव वावाक सलाह

⁸ बाकीन मे बिना वियाव वावा एने रोंडायलान बारामा कोयो कि हिंदरेन कोरीन ओसलोत रोयनो वारलो छे, जोसू मे छे.

⁹ बाकीन कोदि चे ताबु नी राख सोके, ती वियाव कोरे; काहाकि वियाव कोरनो लालसाये राखने सी वारलो छे.

वियाव वावाक सलाह

¹⁰ जिंदरु वियाव होय गोयलु छे, तीनु काजे मे नी, बाकीन प्रभू आग्या आपे कि लाडी आपना पाहणासी ओलोग नी होये.

¹¹ एने कोदि ओलोग बी होय जाय, ती बिना दुसरा वियावोन रोये; नीती आपना घरवावा पुठी पोछा मेव कोर लेये-एने नी पाहणू आपनी लाडी काजे छुळे.

¹² दिसरा काजे प्रभू नी बाकीन मेत कोय, “अगर कुदान भाशोन लाडी भुरसू नी मेकती होसे एने तेरे साते रोयनेसी खुशीमा रोये ती चू तिनीक नी छुळे.”

¹³ काहनीस बायरोन घरवावू भुरसू नी राखतू होसे, एने तेरे पुठी रोयनेसी खुशीमा होसे; ची घरवावा काजे नी छुळे.

¹⁴ काहाकि ओसलु घरवावू जू भुरसू नी राखतू होय, चू लाडीन वोजेसी चुखो गीनायतेलु एने ओसली लाडी जी भुरसू नि राखतली घरवावान वोजेसी चुखलो गिनायतली छे; नीती तुमरा पुऱ्या पारी भुंडला रोयता, बाकीन हिमी ते चुखला छे.

¹⁵ बाकीन जू ओदमी भुरसू नी राखतलु, कोदि चू ओलोग होये ती ओलोग होयने देवू, ओसली हालोतमा कुदू भाश नीती बहोनिश बंधनमा नी होय. परमेश्वर आमु काजे हिव मेवीन कोरता बुलावलो छे.

¹⁶ काहाकि हे बायर, तू काय जानतली छे कि तू आपना घरवावान छुटकारू कोराव लीस? एने हे ओदमी, तू काय जानतलु छे कि तू आपनी लाडीन छुटकारू कोराव लीस?

परमेश्वरोन बुलावलान अनसारे चालू

¹⁷ जोसू प्रभू होर एक काजे वाटलु छे, एने जोसू परमेश्वर होर एक काजे बुलावलु छे, तोसत चू चाले एने मे आखा मंडव्यामा ओसुत गीनायतेलु छे.

¹⁸ जू सुंता कोरलु बुलावलु छे, चू बिना खोतना वावू नी बोने जू बिना सुंता वावू बुलावाय गोयलु छे, चू सुंता नी कोरावे.

¹⁹ नी सुंता काहीन छे एने नी बिना सुंता वावू, बाकीन परमेश्वरोन आग्या माननो आखो काय छे.

²⁰ होर एक जोनाक जिना देसोमा बुलावला गोयला छे तिनामा रोये.

²¹ कोबी तू दासोन देसोमा बुलावाय गोयलु छे ती चिंता मा कोरे; बाकीन कोदि तू मोकवू होय सोके, ती ओसोच काम कोर.

²² काहाकि जू दासोन हालोतमा प्रभूमा बुलावलु गोयलु छे, चू प्रभून स्वातंत्र कोरलु छे तोसुच जू मोकवायीन हालतमा बुलावलु गोयलु छे, चू मसिहन दास छे.

²³ तुमु किमोत आपीन मुले लेवाय गोयला छे; माणसोन दास मा बोनु.

²⁴ हे भाशो, जो कुदू जिना देसोमा बुलावला गोयला छे, चू तीनामात परमेश्वरोन साते रोये.

वियाव सी जुळायला सावालोन जवाब

²⁵ छोल्लान बारामा काहीन आग्या मेसेक नी जोडी बाकीन भुरसान लायक होयनेन कोरता जोसी दया प्रभू मार पोर कोरलु छे, तेरेत अनसारे सहमती आपो.

²⁶ मारा सोमोजमा यो वारलो छे कि आजकाल दुखोन वोजेसी, माणूस जोसू छे तोसुत रोये.

²⁷ कोदि तारी लाडी छे, ती तेरी पुठी ओलोग होयनेन कोशिशमा कोरे; एने कोदि तारी लाडी नी होय, ती लाडीन हेर मा कोरे.

²⁸ बाकीन कोदि तू वियाव बी कोरे, ती पाप नी होय; एने कोदि कुवारी वियाव कोराय जाय ती काय पाप नी होय बाकीन ओसला काजे डीलोन दुख होयसे, एने मे वाचाडने हिंड रोयू.

²⁹ हे भाशो, मे यो कोयो कि टेम कोम कोराय गोयलो छे, इनान कोरता जुवे कि जिंदरा लाड्या छे, चे ओसा होये जोसा कि तिंदरा लाड्या नी होय;.

³⁰ एने रोडने वावा ओसला जुवे, जोसा रोडतला नी; एने खुशी कोरणे वावा ओसा जुवे, जोसा खुशी नी कोरतेला; एने मुले लेणे वावा ओसा जुवे जोसा तिंदरे जुव काय होय नी.

³¹ एने इना जोगोन साते व्यहवार कोरणे वावा ओसा जुवे, कि जोगोन नी होय; काहाकि इना जोगोन रिती एने व्यहवार बोदोलतलो जातलो छे.

³² आखरी मे मेसेक यो जुवे कि तुमु चिंता नी होये बिना वियाव वावू आदमी प्रभून वातोन चिंतामा रोयतलु छे कि प्रभू काजे कोसू प्रसन्न राखो.

³³ बाकीन वियाव वावू माणूस जोगोन वातोन चिंतामा रोयतलु छे कि आपनी लाडी काजे काहनला रितीसी खुश राखो.

³⁴ वियाव एने बिना वियावमा बी भेद छे कुवारा प्रभून चिंतामा रोयतलु छे कि चू डील एने आत्मा दुयूमा चुखला रोये, बाकीन वियाव वावा जोगोन चिंतामा रोयतला छे कि आपना घरवावा काजे खुश राखे.

³⁵ मे जी वात तुमरे फायदान कोरता कोयो, नी कि तुमुक फोसाळनेन कोरता, बाकीन इनान कोरता कि जोसो वारू देखायतलु छे तोसोच कोराय जाय, कि तुमु एक मन होयीन प्रभून सेवामा लाग रोयू.

³⁶ कोबी कुदू यो सोमजे कि मे आपनी तिनी कुवारीन होक मारणे बाज रोयू, जेरी जुवानी बोढने बाज रोय एने गोरोज बी छे ती जोसो जुवे तोसो कोरु, इनामा पाप नी होय, चा येरू वियाव होयने देवू.

³⁷ बाकीन जू मोनोमा पाकु रोयतलु छे, एने तिनी काजे गोरोज नी होय, बाकीन आपनी मोर्जी पोर होक राखतला छे एने मोनोमा जी वात ठाण लेदा होसे कि, चू आपनी कुवारी पुराय काजे बिना वीयाव वावी राखसे, चू वारलु कोरतेलु छे.

³⁸ तिनान कोरता जू आपनी कुवारीन वियाव कोर देतलु छे, चू वारू कोरतेलू छे, एने जू वियाव नी कोरतेलु चू ओवी बी वारलो कोरतेलू छे.

³⁹ जेतार तोक दिसरी बायरोन घरवावू जीवतलु छे, तेत्यार तोक चू हिंदरु बोंदी होयलु छे; बाकीन कोबी तेरु घरवावू मोर जाय ती जेरेसी जुवे तेरेसी वियाव कोर सोकतली छे, बाकीन निस्तु प्रभूमा.

⁴⁰ बाकीन जोसो छे कोबी तोसाच रोये ती मारा विचारमा ओवी बी सोयावा छे; एने मे सोमजो कि परमेश्वरोन आत्मा मारेमा बी छे.