1 कुरीन्थियो 6 - बारेली पावरीखुदोन झोगळान निपटारू 1 काय तुमरेमा गोथो कुदा काजे जी हिंमत छे कि जेतार दिसरा साते झोगळू होये ती नियावोन कोरता अधोरमीनचा जाय एने चुखला माणसोनचा नि जाय? 2 काय तुमु नी जानता कि चुखला माणसे जोगोन फेसलू कोरसे? इनान कोरता जेतार तुमुक जोगोन नियाव कोरनो छे, ती काय तुमु नानला गोथो बी नानला झोगळान बी फेसलान लायक नी होय? 3 काय तुमु नी जानता कि आमु सोरग दूतोन फेसलू कोरसु? ती काय संसारोन वातोन फेसलू नी कोरे? 4 कोदि तुमुक संसारोन वातोन फेसलू कोरनो छे, ती काय तीनु काजे बोसाळसु जे मंडव्यामा काय नी सोमजाय जातला? 5 मे तुमुक लाजवाळनेन कोरता यो कोयो. छाचलीन तुमरेमा एक बी दिमाक वावू नी जोळतू, जू आपना भाशोन फेसलू कोर सोके? 6 तुमरेमा भाशो-भाशोमा लोळाय होयतलु, एने चू बी अविस्वासीन सामने. 7 बाकीन छाचलीन तुमरेमा मोटलु गुणू ते यो छे कि आपोसमा नियाव कोरतेला. अन्याय काजे नी सोहोनेन कोरतेला? आपनो नुकसान काहा सोहोन नि कोरतेला? 8 बाकीन तुमु ते खुद अन्याय कोरतेला एने नुकसान पुगाळतला एने चो बी भाशो काजे. 9 काय तुमु नी जानता कि अन्याय कोरण्या माणसे परमेश्वरोन राजोन वारीस नी रोये? धोकू मा खावू; नी वेश्या गमन, नी मूर्ती पुजान, नी परस्त्रीगमन, नी लुचळाय, नी पुरूश गामी, 10 नी चुरी, नी लोभी, नी मोंदळ्यु, नी लोळने वावू, नी तकलिप आपनेवावू परमेश्वरोन राजोन वारीस बोने. 11 एने तुमरेमा गोथा कोतरा ओसात होता, बाकीन तुमु प्रभू येसु मसिहन नावोसी एने आमरा परमेश्वरोन आत्मासी धुवाय गोया एने चुखो होया एने धोरमी ठेराया. शरीर एने आत्मामा परमेश्वरोन महिमा 12 आखा चीजे मारेन कोरता वारला ते छे, बाकीन आखा चीजे लाभोन नी होय; आखा चीजे मारेन कोरता वारला छे बाकीन मे काहणी वातोन ताबामा नी रोयो. 13 खाणो पेटोन कोरता, एने पेट खाणान कोरता छे, बाकीन परमेश्वर इना एने हीना काजे दुयू काजे खोतम कोरसे बाकीन डील व्यभिचारोन कोरता नी, बाकीन परमेश्वरोन कोरता छे, एने प्रभू डीलोन कोरता छे. 14 परमेश्वर आपनो ताकतसी प्रभू काजे जीवाळ्यु, एने आमु काजे बी जीवाळ्यु. 15 काय तुमु नी जानता कि तुमरो डील परमेश्वरोन डील छे? ती काय मे मसिहन डील लीन तीनाक वेश्यान डील बोनावीस? कबी नी. 16 काय तुमु नी जानता कि जी काहणीस वेश्या सी संगती कोरतेलू छे, चू हेरे साते एक डील होय जातलु छे? काहाकि लिखलो छे “चे दुयू एक डील होयसे.” 17 एने जू प्रभून संगतीमा रोये, चू हेरे साते एक आत्मा होय जातलु छे. 18 व्यभिचारसी वाचीन रोयू. जोतरा दिसरा पाप माणूस कोरतेलू छे चे डीलोन बारथे छे, बाकीन व्यभिचार कोरणे वावू आपनात डीलोन खिलापमा पाप कोरतेलू छे. 19 काय तुमु नी जानतला कि तुमरो डील पवित्र आत्मान मंदीर छे, जू तुमरेमा बोसलु छे एने तुमुक परमेश्वरोनचा गोथू जोळलु छे; एने तुमु खुदोन नी होय? 20 काहाकि दाम आपीन मुले लेवाय गोयला छे, इनान कोरता आपना डीलोन लारे परमेश्वरोन महिमा कोरु. |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation