1 कुरीन्थियो 5 - बारेली पावरी

मंडवीमा पापी माणसे

¹ न्या तोक सोमवनेमा आवे कि तुमरेमा व्यभिचार होयतला छे, एने ओसू व्यभिचार जू दिसरा जात्यामा भी नी होयतलो कि एक माणूस आपना बासोन लाडी काजे राखतलु.

² एने तुमु शंका ते नी कोरतेला, जीनामा ओसो काम कोरणे वावू तूमरे इचमा गोथू निकवी जातलु, बाकीन मोटाय कोरतेला छे.

³ ती डीलोन भाव सी नांबे होता, बाकीन आत्मान भाव सी तुमरे साते होयीन माणू जागेन देसोमा कोरणे वावान ओसो काम कोरणे वावान बारामा जी आग्या आपलु छे.

⁴ कि जेतार तुमु एने मारी आत्मा, आमरा प्रभू येसुन ताकत साते एखठा छे, ती ओसू माणूस आमरा प्रभू येसुन नावोसी.

⁵ डीलोन विनाशोन कोरीन भुतडा काजे आपाय जाय, काहाकि हेरी आत्मा प्रभू येसुन दाहळामा छुटकारू आपे.

⁶ तुमरो मोटाय कोरनो वारू नी होय; काय तुमु नी जानतला कि इतरोक खमीर पुरा कुसेनला पीठाक खमीर कोर देतलो छे.

⁷ जुनलो खोमीर निकावीन आपना खुदो काजे चुखला कोरु कि नोवलु कुसोनलु पिठू बोन जावू; काहाकि तुमु अखमीरी छे काहाकि आमरो बी धान, जू मसिह छे, बलिदान होयलु छे.

⁸ इनान कोरता आवू, आपनु तीहीवारमा खुशी कोरु, नीती जूनला खोमीरसी एने नी बुराई एने दुष्टता खमीरसी, बाकीन सुधा एने खोरलायीन बिना खमीरोन रुटासी.

सोवटामा नियाव

⁹ मे आपना चिट्ठीमा तुमुक लिखलू छे कि व्यभिचार वावान संगती मा कोरु.

¹⁰ यो नि कि तुमु निस्ता इना जोगोन व्यभिचारोन नीती लोभी नीती जुलूम कोरणे वावा, नीती मूर्तीन पुजा कोरणे वावान संगती मा कोरु; काहाकि इना देसोमा ते तुमुक जोगोमा गोथो निकवी जाणो पोळसे.

¹¹ बाकीन मारो कोयनो यो छे कि कोदि कुदू भाश कोवाये, व्यभिचार, नीती लोभी, नीती मूर्ती पुजक, नीती लोळने देणे वावू, नीती मोंदळ्यु नीती खोराब कोरणे वावू होसे, ती तिंदरी संगती मा कोरु; बाकीन ओसला माणसो पुठी खाणो भी झुन खाता.

¹² काहाकि मेसेक बारथे वावा मंडवीन नियाव कोरणेसी काय काम? काय तुमु माहिय वावान नियाव नी कोरतेला?

¹³ बाकीन बारथे वावान नियाव परमेश्वर कोरतेलू छे इनान कोरता तिना भुंडला कामो काजे आपना इचमा गोथा निकाव देवू.