1 कुरीन्थियो 4 - बारेली पावरी

येसुन भुरसान लायक भंडारी

¹ माणसे आमुक मसिहन चेला एने परमेश्वरोन भेदोन भंडारी सोमज्या.

² ओवतेन न्या भंडारीमा जी वात देखाय जातली छे कि चू भुरसान लायक होय.

³ बाकीन मारी नोजोरोमा जी जादा नानली वात छे कि तुमु नीती माणसोन कानलु न्यायी मेसेक पारखे, बाकीन मे खुद आपना खुदो काजे नी पारखतू.

⁴ काहाकि मारो मोन मेसेक काहणी वातोमा गुणावा नी ठेरावतो, बाकीन इनासी मे बिना गुणावू नी ठेरायतू, काहाकि मेसेक पारखने वावू प्रभू छे.

⁵ इनान कोरता जेतार तोक प्रभू नी आवे, टेमोन पेहेले काहणी वातोन नियाव मा कोरू; चू आंदारलाम डूकायली वाते विजावामा देखाळसे, एने मोनोन अभीप्राय काजे प्रकट कोरसे, तेत्यार परमेश्वरोनचा गोथो होर एकोन बोळाय होयसे.

येसुन कोरता पागल

⁶ हे भाशो, मे इना मोटायमा तुमरेन कोरता आपनी एने अपुल्लोसन खोबर दर्शनोन रिती पोर कोरलो छे, इनान कोरता कि तुमु आमरे लारे यो सिकू कि लिखला सी ओगा मा बोढू, एने एकान पक्षमा एने दिसरान खिलापमा मोटाय नि कोरनो.

⁷ काहाकि तुमरेमा एने दिसरामा कून मोटाय कोरे? एने तारे जुव काय छे जो तू दिसरासी नी लेदू? एने जेतार कि तू दिसरासी लेदलु छे, ती ओसी मोटायकी काहा कोरे कि माणू नि जोळ्यो?

⁸ तुमु ते आफरी गोया, तुमु धोनवावा होय गोया, तुमु आमरे विगुर राज कोऱ्या; बाकीन भोलो होयतो कि तुमु राज कोरता कि आमु बी तुमरे साते राज कोरता.

⁹ मारा सोमोजमा परमेश्वरोन आमु प्रेषित काजे आखान ओवतेन तिना माणसोन सारखो ठेरावला छे, जिंदरो मोरनेन आग्या होय गोयली छे; काहाकि आमु जोग एने सोरग दूत एने प्रेषितोन कोरता तोमासु ठेरला छे.

¹⁰ आमु मसिहन कोरता बिना दिमाक वावा छे, बाकीन तुमु मसिहमा दिमाक वावा छे; आमु कोम ताकत वावा छे, बाकीन तुमु ताकत वावा छे, तुमु आदर आपतला छे बाकीन आमु बिना आदर वावा होयतला छे.

¹¹ आमु इना घोळी तोक भूकला तीसला एने उगाडला छे, एने घुदा खातला छे एने मारे-मारे फिरतला छे.

¹² एने आपनात हातोसी काम कोरीन मेहनत कोरतेला छे, माणसे आमुक भुंडा कोयतेला छे, आमु आशिष आपतला छे; चे तोकलीत देतला छे, आमु वेठतेला छे.

¹³ चे बदनाम कोरतेला छे, आमु विनता कोरतेला छे, आमु आज तोक जोगोन कोचरु एने आखा चीजोन खुरचन सारखा ठेरायतेला छे.

येसुन तोसा कोरनेन कोरता पौलुसोन सलाह

¹⁴ मे तुमुक लाजवाडने कोरता ये वाते नि लिखतु, बाकीन आपनु मोंगावू पुऱ्यु जानीन तुमुक कोयो.

¹⁵ काहाकि कोदि मसिहमा तुमुक सिकाळने वावा दस हजार बी रोयता, तीबी तुमरा बास जादा नी; इनान कोरता कि मसिह येसुमा वारली खोबरोन लारे मे तुमरू बास होयू.

¹⁶ इनान कोरता मे तुमुक विनता कोरो कि मारी चाल चालू.

¹⁷ इनान कोरता मे तीमथी काजे जू प्रभूमा मारू मोंगावू एने भुरसान लायक पुऱ्यु छे, तुमरेनचा मुकली रोयू. चू तुमुक येसु मसिहमा मारो जीवन फोम कोरावसे, जोसू कि मे होर जागा पोर होर एक मंडव्यामा प्रचार कोरतेलू छे.

¹⁸ काहना ते ओसा फुल गोयला छे, मानो मे तुमरेनचा आवने वावू नी होय.

¹⁹ बाकीन प्रभून मोर्जी होये ती मे तुमरेनचा मामार आवीस, एने तीनुक फुल्लान वातो काजे नी, बाकीन तिंदरी ताकत काजे जान लीस.

²⁰ काहाकि परमेश्वरोन राज वातोमा नी बाकीन ताकत छे.

²¹ तुमु काजे काय जुवे? काय मे लाकळी लीन तुमरेनचा आवो, नीती मोंग एने नम्रतान आत्मा साते?