1 कुरीन्थियो 2 - बारेली पावरी

पौलुसोन उद्घोषणा

¹ हे भाशो, जेतार मे परमेश्वरोन भेद सोमवतू जायीन तुमरेनचा आव्यु, ती बुल या ग्यानोन वारलान कोरता नी आयु.

² काहाकि मे यो ठान लेदलु होतो कि तुमरा इचमा येसु मसिहक छुळीन ओवी कानली वात काजे नी जाणो.

³ मे बिना ताकतोन एने बिक साते, एने जादा थुर-थुर कापतू जायीन तुमरे साते रोयु.

⁴ एने मारो वचन, एने मारा प्रचारमा ग्यानोन विसरने वावी वाते नी होय, बाकीन आत्मा एने ताकत सबूत होतो,

⁵ इनान कोरता कि तुमरु भुरसू माणसोन ग्यान पोर नी, बाकीन परमेश्वरोन ताकत पोर आधारित छे.

आत्मिक ग्यान

⁶ तीबी तीयार होयला माणसोमा आमु ग्यान सोमवाळतला छे; बाकीन इना जोगोन एने इना संसारोन नाश होयने वावान सुभेदारोन ग्यान नी;

⁷ बाकीन आमु परमेश्वरोन चो डूकायला वावोत ग्यान, भेदन रिती पोर कोयतेला छे, जीनाक परमेश्वर कायम सी आमरी महिमान कोरता ठेराव्यू.

⁸ जीनाक इना संसारोन सुभेदारमा गोथू कुदू नी जान्यो, काहाकि कोबी चे जानता ती तेजवावा प्रभू काजे ख्रुस पोर नी चोळावता.

⁹ बाकीन ओसो लिखलो छे, “जी वाते डूवा नी देख्या कानटो नी सोमव्यो, एने जे वाते माणसोन मोनमा नी चोळी चेत छे जे परमेश्वरमा आपनो मोंग राखणे वावान कोरता तीयार कोरला छे.”

¹⁰ बाकीन परमेश्वर तीनुक आपना आत्मान लारे आपनेपोर देखाळ्यू, काहाकि आत्मा आखी वाते, नीती परमेश्वरोन गुढ वाते बी जाच कोरतेला छे.

¹¹ माणसोमा गोथू कून काहनास माणसोन वाते जानतला छे, निस्ता माणसोन आत्मा जो हेरेमा छे? तोसोच परमेश्वरोन वाते भी कुदु नी जानतलो निसतू परमेश्वरोन आत्मा.

¹² बाकीन आमु जोगोन आत्मा नी, बाकीन ची आत्मा ली लेदला छे जी परमेश्वर भूनी गोथी छे कि आमु तिनी वातो काजे जानजे, जू परमेश्वर आमुक आपलु छे.

¹³ जीनुक आमु माणसोन ग्यानोन सिकाळली वातोमा नी, बाकीन आत्मान सिकाळली वातोमा, आत्मिक वातोसी भेसकी भेसकीन सोमवाळतला छे.

¹⁴ बाकीन डीलोन माणसे परमेश्वरोन आत्मान वाते स्वीकार नी कोरतेला, काहाकि चे हिंदरी नोजोरमा बीना दिमाक वावान वाते छे, एने नी चू हिनुक जान सोकतलु छे काहाकि हिंदरी चौकसी आत्मिक रितीसी होयतेली छे.

¹⁵ आत्मिक जोन आखो काय पारकतलु छे, बाकीन चू खुद कुदासी पारखाय नी जातलो.

¹⁶ “काहाकि प्रभून मोन कुन जानलु छे कि हिनाक सिकाळे?” बाकीन आमरेमा मसिहन मोन छे.