1 कुरीन्थियो 15 - बारेली पावरी

पौलुसोन वारली खोबर एने येसुन पोछो जीव उठनो

¹ हे भाशो हिमी मे तुमुक काजे वारली खोबरोन प्रचार देखाळो जो पेहेले सोमवाळ देदलु छे, जीनाक तुमु स्वीकार बी कोर लेदला होता एने जिनामा तुमु पाका बी छे.

² हीनान लारे तुमरू छुटकारू बी होयतेलु छे, कोदि तिना वारली खोबर काजे जो मे तुमुक सोमवाळलु होतु फोम कोरता रोयू; नीती तुमरो भुरसू कोरनो वायबार होयो.

³ इनान वोजेसी मे आखान पेहेले तुमु काजे चीत वात पुगाळ देदू, जी मारेंचा पुगली होती, कि पवित्र शास्त्रान वचनोन अनसारे मसिह आमरा पापोन कोरता मोर गोयू.

⁴ एने गाळाय गोयू एने पवित्र शास्त्रान वचनोन अनसारे तिसरे दाहळे जीव उठ्यू.

⁵ एने पतरस जू कैफा बी कोवायतलु काजे तेत्यार बारा जोना काजे देखाय पोळ्यु.

⁶ ओवतेन पोछु चू पाच सोव सी जादा भाशो काजे एकठा देखाय पोळ्या, जीनामा गोथा जादात हिमी तोक जीवतला छे बाकीन काहनास मोर गोया.

⁷ पोछु चू याकुब काजे देखाय पोळ्यु तेत्यार आखा प्रेषित काजे देखाय पोळ्यु.

⁸ आखान ओवते मेसे काजे बी देखायू पोळ्यु, जोसो कोम दाहळान पोयदा होयलु छे.

⁹ काहाकि मे प्रेषितमा आखा गोथू नानलु छे, बाकीन प्रेषित कोवायनेन लायक बी नी होय, काहाकि मे परमेश्वरोन मंडव्या काजे तोकलीत आप्यू.

¹⁰ बाकीन मे जो कायबी छे, परमेश्वरोन दयासी छे. हेरी दया जी मार पोर होई, चो वायबार नी होयो; बाकीन मे हिमी आखा गोथू बोळीन मेहनत बी कोऱ्यु, तीबी यो मारे भूनी गोथो नी होयो बाकीन परमेश्वरोन दयासी जो मार पोर होतो.

¹¹ इनान कोरता चाहे मे छे, चाहे चे होसे, आमु योत प्रचार कोरतेला छे, एने इनापोर तुमु बी भुरसू कोऱ्या.

मोरलान जीव उठनो

¹² इनान कोरता जेतार कि मसिहन प्रचार कोराय जातलो छे कि चू मोरलामा गोथू जीव उठ्यू, ती तुमरेमा गोथा कोतरा कोसा कोयतेला छे कि मोरलान पोछो उठनो होयीत नि?

¹³ कोदि मोरलान पोछो उठनो होये नि, ती मसिह बी नि जीव उठ्यू;

¹⁴ एने कोदि मसिह नि जीव उठ्यू, ती आमरो प्रचार कोरनो बी वायबार छे, एने तुमरू भुरसू बी वायबार छे.

¹⁵ नीती आमु परमेश्वरोन झुटा गोवा ठेराये; काहाकि आमु परमेश्वरोन बारामा जो गोवायी आप्या कि चू मसिह काजे जीवाळ देदू, कोदि नि जीवाळ्यो कोदि मोरला नि जीव उठे.

¹⁶ एने ओगर मोरला नि जीव उठे ती येसु मसिह बी नि जीव उठ्यू;.

¹⁷ एने ओगर येसु मसिह बी नि जीव उठ्यू, ती तुमरू भुरसू बी वायबार छे, एने तुमु हिमी तोक तुमरा पापोमा फोस रोया.

¹⁸ एने ओवी जे मसिहमा सुव गोयला छे, चे बी नाश होय गोया.

¹⁹ एने आपनु इना जीवनमा मसिहमा आस मेके ती आमु आखा माणसोमा गोथा जादा अभागा छे.

²⁰ बाकीन छाचलीन येसु मसिह मोरलामा गोथू जीव उठलु छे, एने जे मोर गोयला छे तीनुमा चू पेहलो फोव बोन्यू.

²¹ काहाकि जेतार माणसोन लारे मोत आव्यो ती माणसोन लारे मोरलान पोछो जीव उठनो बी होयो.

²² एने जोसा आदोममा आखा मोर गोयला, तोसाच मसिहमा आखा जीवाळ देसे.

²³ बाकीन होर एकोन आपना-आपना वाडी पोर पेहेलो फोव येसु मसिह, ओवतेन येसुन आवने पोर तेरा माणसे.

²⁴ तेरे आवनेन आखरी सोर जासे, तिनी टेमे आखा राजाधिराज एने आखो होक एने ताकत खतम कोरीन राज्य काजे परमेश्वर बासोन हातोमा सोप देसे.

²⁵ काहाकि जेतार तोक चू आपना दुष्मोन काजे आपना पायो तोवे नि लावे तेत्यार तोक तेरो राज कोरनो जोरुरी छे.

²⁶ आखरीमा दुष्मोन बी खतोम कोराय जासे, चो मोत छे.

²⁷ काहाकि परमेश्वर आखो काय तेरे पायो तोवे कोर लेदलु छे, बाकीन जेतार चू कोये कि आखो काय तेरा हातोमा आप देदला छे, ती प्रत्यक्ष चो भी जो आखो तेरे हाते आप देदो, चू खुद ओलोग रोये,

²⁸ एने जेतार आखो काय हेरा अधीन होय जासे, ती पुऱ्यु खुद बी हेरे ओधीन होय जासे, जू आखो काय हेरे ओधीन कोर देदु, काहाकि आखामा परमेश्वरुत आखो काय छे.

²⁹ नीती जे माणसे मोरलान कोरता बाप्तिस्मा लेतला छे चे काय कोरसे? कोदि मोरला जीव उठतेला नीती पोछो काहा हिंदरेन कोरता बाप्तिस्मा लेतला?

³⁰ एने आमु बी काहा होर एक घोळी जोखीममा पोळता रोयतला छे.

³¹ हे भाशो, मेसेक हीना मोटायन कोसोम जो आमरा येसु मसिहमा मे तुमरे बारामा कोयो कि मे दाहळीन मोरतलु.

³² कोदि मे माणसोन रिती पोर इफिसमा बोयडा मायला जोनावरोसी लोळायू ती मेसेक काय फायदू होयू? अगर मोरला जीवाळाय नी जाये, “ती आवू, खावू-पिवू, काहाकि वाहनेत मोर जासू.”

³³ धोकू मा खावू, “भुंडली संगती वारला चरित्र काजे बिगाड देतली छे.”

³⁴ धारमिकतान कोरता जाग उठू एने पाप मा कोरू; काहाकि काहनास ओसा छे जे परमेश्वर काजे नी जानतला. मे तुमुक लाजवाडने कोरता यो कोयो.

आपनुक कसलो डील जुळसे?

³⁵ हिमी कुदू यो कोयसे, “मोरला काहना रितीसी जीव उठतला छे, एने कानला डीलो साते आवतेला छे?”

³⁶ हे बिना दिमाक वावा, जो काय तू वेरतलु छे, तेत्यार तोक चो नी मोरे तेतार तोक जीवाळाय नि जातलो.

³⁷ एने जो तू वेरतलु चो डील नी होय जो पोयदा होयने वावो छे, बाकीन दाना छे, चाहे गोहून होय या चाहे काहनला बीजोन.

³⁸ बाकीन परमेश्वर आपनी मोर्जीन अनसारे हिना काजे डील आपतलु छे, एने होर एक बीज काजे तेरो खास डील.

³⁹ आखो डील एक सारखो नी होय मोनसोन डील दिसरो छे, जोनावरोन डील दिसरो छे; चिल्लान डील दिसरो छे; माछान डील दिसरो छे.

⁴⁰ सोरगोन डील छे एने जोगोन डील बी छे बाकीन सोरगोन डीलोन विजावो दिसरो छे, एने जोगोन दिसरो.

⁴¹ दाहळान तेज दिसरो छे, चांदोन विजावो दिसरो छे, एने चांदण्यान तेज दिसरो छे, (काहाकि एक चांद न्या सी दुसरी चांदणीन विजावासी जागू छे).

⁴² मोरलान जीव उठनो बी ओसोत छे डील नाशोन देसोमा वेराय जातलो छे एने ओमोरकाईन रूपमा जीव उठतलु छे.

⁴³ चो बिना आदर साते वेराय जातलो छे एने महिमा साते जीव उठतलो छे; बिना ताकत वावा साते वेराय जातलो छे एने ताकत साते जीव उठतलो छे.

⁴⁴ सादो डील वेराय जातलो छे, एने आत्मिक डील जीव उठतलो छे जेतार कि स्वाभाविक डील छे, ती आत्मिक डील छे.

⁴⁵ ओसोत लिखलो बी छे, कि “पेहेलू माणूस मतलब आदोम जीवतलु जोनावर बोनु” एने आखरी आदोम, जीवन आपनेवावू आत्मा बोन्यू.

⁴⁶ बाकीन पेहेले आत्मिक नी होतु बाकीन स्वाभाविक होतु, एरेन ओवतेन आत्मिक बोन्यू.

⁴⁷ पेहेले माणूस धुवान होतु; दिसरू माणूस सोरगोन छे.

⁴⁸ जोसू चू धुवान होतु, तोसोच चे बी छे यु धुवान छे; एने जोसू चू सोरगोन छे, तोसुच चू बी छे जू सोरगोन छे.

⁴⁹ एने जोसा आमु बी हेरो रूप ली लेदा जू धुवान होतु तोसोच तीना सोरगोन वावान बी रुप ली लेसू.

⁵⁰ हे भाशो, मे यो कोय कि मास एने लुय परमेश्वरोन राज्योन अधिकारी नी होय सोकतला, एने नाश वावू अधिकारीन अविनाशीन अधिकारी होय सोकतलु छे.

⁵¹ देखू, मे तुमरे पुठी भेदोन वात कोयो आमु आखा सुवसु बाकीन आखा बोदली जासू,

⁵² एने यो क्षन भोरमा, पापण्या लागाळतेत आखरी फेपाऱ्यो फुकतूत होसे काहाकि फेपाऱ्यो फुकाय जासे मोरला ओमोरकाई हालोतमा उठाय जासे, एने आमु बोदली जासू.

⁵³ काहाकि गोरोज छे कि यो नाश वावो डील अमोर काजे पेहेरले एने यो मोरनेवावो डील, नी मोरने वावा काजे पेहेरले.

⁵⁴ एने जेतार यो नाश वावो बिना नाश वावा काजे पेहेर लेसे, एने यो मोरने वावू, नी मोरने वावा काजे पेहेर लेसे, तेत्यार यो वचन जो लिखलो छे पुरो होय जासे जय मोरोन काजे गिव गोयो.

⁵⁵ “हे मोरोन, तारो जय कां रोयू? हे मोरोन, तारो डंक कां रोयू”?

⁵⁶ मोतोन डंक पाप छे, एने पापोन ताकत नियम शास्त्र छे.

⁵⁷ बाकीन परमेश्वरोन धन्यवाद होये, जू आमरा प्रभू येसु मसिहन लारे आमु काजे जयवंत कोरलु छे.

⁵⁸ इनान कोरता हे मारा मोंगावा भाशो, पाका एने जागेत रोयू, एने प्रभून कामोमा आखामा बोढता जावू, काहाकि यो जानतला छे कि तुमरो मेहनत वायबार नी होय.