1 कुरीन्थियो 14 - बारेली पावरी

दिसरी-दिसरी भाषा एने भविष्यवाणी

¹ मोंगोन पोछोव चालू, एने आत्मिक वरदानोन धंदू मा बी रोयू, खास भविष्यवाणी कोरु.

² काहाकि जू दिसरी भाषामा वात कोरतेलू चू माणसो पुठी नी बाकीन परमेश्वर पुठी वात कोरतेलू; इनान कोरता कि तेरी वाते कुदू नी सोमजतला, काहाकि चू भेदोन वाते आत्मामा भोराईन बुलतेलु.

³ बाकीन जू भविष्यवाणी कोरतेलू, चू माणसोन बोढती एने प्रचार एने शांतीन वाते कोयतेला.

⁴ जू दिसरी भाषामा वात कोरतेलू चू आपनीत खुदोन बोढती कोरतेलू; बाकीन जू भविष्यवाणी कोरतेलू चू मंडवीन बोढती कोरतेलू.

⁵ मारी मोर्जी छे कि तुमु दिसरी भाषामा वाते कोरु बाकीन इना गोथो ज्यादा यो वारू लागे कि भविष्यवाणी कोरु; काहाकि दिसरी भाषा बुलनेवावू मंडवीन बोढतीन कोरता भाषान मतलब नी देखाळे ती भविष्यवाणी कोरणे वावू तीनासी मोटू छे.

दिसरी भाषान मतलब कोयनो जुवे

⁶ इनान कोरता हे भाशो; ओगर मे तुमरेनचा आवीन दिसरी भाषामा वाते कोरो एने विजावान नीती ग्यानोन नीती भविष्यवाणीन नीती उपदेशोन वाते तुमुक नी कोयो ती मारजुव गोथू तुमुक काय फायदु होयसे?

⁷ इना रितीसी ओगर जीनामा जीव नी होय ओसली चीजे बी जीनामा गोथी रोडनो निकवतलु छे, जोसी पावी नीती विना वाजतलो चो कोसो पारखायतलो?

⁸ एने ओगर फेपाऱ्यान ओवाज चुखो नी होय, ती कून लोळायीन कोरता तीयारी कोरसे?

⁹ ओसात तुमु भी ओगर जीबमा गोथा चुखो-चुखो वात नी कोरे, ती जो काहीन कोवायतेलो छे चो कोसो सोमजाय जासे? तुमु ते होवा मा वाते कोरणे वावा ठेरायसु.

¹⁰ जोगोमा कोतरा भातीन भाषा काहणी होय, बाकीन तिंदरेमा गोथा काहनाबी, बिगुर मतलबन नी रोये.

¹¹ इनान कोरता ओगर मे काहणी भाषान मतलब नी सोमजो, ती बुलने वावान नोजोरमा दिसरा देसोवावू ठेहरसे एने बुलने वावा मारी नजरमा दिसरा देसोवावा ठेहेरतला.

¹² इनान कोरता कि तुमु बी जेतार आत्मान वरदानोन आसमा रोये, ती ओसी कोशिश कोरु कि तुमरा वरदानोन बोढतोसी मंडवीन बोढती होये.

¹³ इनान वोजेसी यु दिसरी भाषा बुले, चू प्रार्थना कोरे कि तेरो मतलब भी जान लेसे.

¹⁴ इनान कोरता ओगर मे दिसरी भाषामा प्रार्थना कोरो ती मारी आत्मान प्रार्थना कोरतेली बाकीन ओकोल काम नी कोरतेली.

¹⁵ आखरी काय कोरनो जुवे? मे आत्मामा भोरायीन बी प्रार्थना कोरिस, एने ओकोलसी बी प्रार्थना कोरिस; मे आत्मामा भोरायीन गावीस, एने ओकोलसी बी गावीस.

¹⁶ नीती हिमी आत्मामात धन्यवाद कोरिस, ती ओवते बिना ग्यानसी तारा धन्यवाद पोर आमेन कोसा कोयसे? काहाकि चे नी जानतला कि तु काय कोर रोयू?

¹⁷ तू ते वारला रितीसी धन्यवाद कोरतेलू, बाकीन दिसरान बोढती नी होयतेली.

¹⁸ मे मारा परमेश्वरोन धन्यवाद कोरो, कि तुमरे गोथा जादा दिसरी भाषामा बुलतलु.

¹⁹ बाकीन मंडवीन दिसरी भाषामा दोस होजार वाते कोयनेसी यो मेसेक एने बी वारू जाणायतलो कि दिसरा काजे भोनावनेन कोरता ओसली पाचुत वाते कोये.

दिसरी भाषा विस्वास्यान कोरता चिन्ह छे

²⁰ हे भाशो, तुमु समजनेमा नानला पुऱ्यामा बोनु बुराईमा ते नानला पुऱ्या रोयू, बाकीन सोमोजनेमा शहाना बोनु.

²¹ नियम शास्त्रामा लिखलो छे कि प्रभू कोयतेला, “मे अनजानला भाषा बुलने वावान लारे एने पारख मुखोन लारे इना माणसोन साते वाते कोरिस ते बी चे मारी नी सोमवे”.

²² इनान कोरता दिसरी भाषा विस्वासीन कोरता नी, बाकीन अविस्वासीन कोरता निशाणी छे; एने भविष्यवाणी अविस्वासीन कोरता नी, बाकीन विश्वासीन कोरता चिन्ह छे.

²³ आखरी ओगर मंडवी एक जागे एखठी होये; एने आखान आखा दिसरी भाषा बुलने, एने बारथे वावा एने अविस्वासी माणसे माहाय आव लाग ती चे काय तुमुक गांडा नी कोये?

²⁴ बाकीन ओगर भविष्यवाणी कोरणे बाज गोया, एने कुदू अविस्वासी नि ती बारथे वावा माणसे माहाय आव लागे, ती आखा तीनुक गुणावा ठेरावसे एने पारखी लेसे;

²⁵ एने तिंदरा मोनोमा भेद सामने एने जेतार चू उबळू पोळीन परमेश्वर काजे नोमोन कोरसे एने मान लेसे कि छाचलीन परमेश्वर तुमरा इचमा छे.

उपवास मा नियममा रोयनो

²⁶ इनान कोरता हे भाशो, काय कोरनो जुवे? जेतार एखठा होयतला, ती एकुत दिलमा भजन नीती प्रचार नीती दिसरी भाषा नीती विजावो नीती दिसरीबुलीन मतलब देखाळ रोयतलु आखो काहीन आत्मान बोढाईन कोरता होयनो जुवे.

²⁷ ओगर दिसरी भाषामा वाते कोरनो होय ती दुय नीती लोकेत होय ती, तीन जोना वार वाऱ्या बुलू, एने एक जोणु मतलब कोयू.

²⁸ बाकीन ओगर मतलब कोयने वावू नी होय, ती दिसरी भाषा बुलने वावा मंडवीमा हुगा रोयू, एने आपना मोनसी एने परमेश्वर पुठी वाते कोरु.

²⁹ भविष्य कोरता मा गोथा दुय नीती तीन जोना बुलू एने बाकी माणसे तिंदरा वचन काजे उवखे.

³⁰ बाकीन ओगर दिसरा पोर जू बोस गोयू, काहीन परमेश्वरोन विजावो होय ती पेहेलु हुग रोय जाय.

³¹ काहाकि तुमु आखा एक-एक कोरीन भविष्यवाणी कोर सोकतला, काहाकि आखा सीके एने आखाक शांती जोळे.

³² एने भविष्य कोरताण आत्मा भविष्य कोरताण अधीनमा छे.

³³ काहाकि परमेश्वर गळबळवावू नी होय, बाकीन शांतीन परमेश्वर छे जोसा चुखला माणसोन आखा मंडव्या छे.

³⁴ बायरा सभामा मंडवीमा हुगा रोये, काहाकि तीनुक वाते कोरनेन आग्या नी, बाकीन अधीनतामा रोयनेन आग्या छे, जोसो नियम शास्त्रामा लिखलो छे.

³⁵ ओगर तीनुक काहीन भोननेन मोर्जी होय, ती घोरमा आपना-आपना पाहणा काजे पुछु, काहाकि बायरीन मंडवीमा वात कोरनेन लाजवायने सारखो वात छे.

³⁶ काय परमेश्वरोन वचन तुमरे गोथो निकोवलो छे? नीती निस्ता तुमरेनचा तोक पुगलो छे?

³⁷ ओगर कुदू माणूस आपना खुदो काजे भविष्य कोरता नि ते आत्मिक जन सोमजे, ती यो जान लेवू कि जे वाते मे तुमुक लिखो, चे परमेश्वरोन आग्या छे.

³⁸ बाकीन ओगर कुदू यो नी माने, ती तीनुक बी मा माणू.

³⁹ आखरी हे भाशो भविष्यवाणी कोरनेन आसोमा मा रोयू एने दिसरी भाषा बुलनेसी मोना मा कोरु.

⁴⁰ पुन आखी वाते शिस्त एने वारली रितीसी होयने देवू.