1 कुरीन्थियो 12 - बारेली पावरी

चुखली आत्मान वरदान

¹ हे भाशो मेसेक नी लागतो कि आत्मिक वरदानोनन बारामा ओनजानला रोये.

² तुमुक मालूम छे जेतार तुमु दिसरा जातीन होता, ती मुकी मूर्ती पोछोव जोसा चालता होता तोसात चालता होता.

³ इनान कोरता मे तुमुक जोताळीन कोयो कि जू कुदु परमेश्वरोन आत्मान कोयनासी बुलतलु, चू नी कोयतेला कि येसु श्राप वावू नी होय; एने नी कुदू कोयतेलु पवित्र आत्मान विगुर कोय सोकतलु कि येसु प्रभू छे.

⁴ वरदान ते लोकेत भातीन छे, बाकीन आत्मा एकुत छे;.

⁵ एने सेवा बी लोकेत भातीन छे, बाकीन परमेश्वर एकुत छे,

⁶ एने प्रभाव शाली काम लोकेत भातीन छे, बाकीन परमेश्वर एकुत छे, जू आखामा होर एक भातीन प्रोभाव पोयदा कोरतेलू.

⁷ बाकीन आखात लाभ पुगाळनेन कोरता होर एक जोना काजे आत्मान विजावो आपायतलो.

⁸ काहाकि आत्मान लारे ओलोग वाते आपायली, एने दिसरा काजे तीना आत्मान अनसारे ग्यानोन वाते.

⁹ कुदाक तिनान आत्मामा गोथू भुरसू एने कुदाक तिना आत्मासी वारू कोरणेन वरदान आपायतलो.

¹⁰ एने कुदा काजे मोटला काम कोरनेन ताकत, एने कुदा काजे भविष्यवाणी, एने कुदा काजे आत्मान पारख, एने कुदा काजे लोकेत भाती-भातीन भाषान, एने कुदा काजे भाषान मतलब देखाळनेन.

¹¹ बाकीन ये आखा प्रभाव शाली काम एकुत आत्मा कोरतेलू, एने तीनाक जो लागतलो चो वाट देतलु.

एक डील एने सोवटा भागे

¹² काहाकि जिना रितीसी डील ते एक छे एने तेरा भागे लोकेत छे, एने तिना डीलोन आखा भागे लोकेत होयने पोर बी आखा मेवीन एकुत डील छे, तिना रितीसी मसिह बी छे.

¹³ काहाकि आखा यहुदि होय काय युनानी, काय पावोर होय काय छुटकारू एकुत आत्मान लारे एक डील होयनेन कोरता बाप्तिस्मा लेदू, एने आपनु आखा काजे एकुत आत्मा पिवाळी छे.

¹⁴ इनान कोरता कि डीलोमा एकुत डील नी बाकीन लोकेत छे.

¹⁵ ओगर पाय कोये, “मे हात नी होय, इनान कोरता डीलोन नी होय,” ती काय चू इना वोजेसी डीलोन नी होय.

¹⁶ एने ओगर कोदि कानटो कोये, “मे डूवू नी होय, इनान कोरता डीलोन नी होय ती काय चू इनान वोजेसी डीलोन नी होय?”

¹⁷ ओगर आखो डील डूवूत रोयतू ती सोमवनो कां होयतो? ओगर आखो डील कानटो रोयतो, ती सुंगणो कां होयतो?

¹⁸ बाकीन छाचलीन परमेश्वर डीलोन आपना मोर्जीन अनसारे एक-एक बोनावीन डीलोमा मेक रोयू.

¹⁹ ओगर मे एकुत डील रोयतु, ती डीले कां रोयता?

²⁰ बाकीन हिमी डीले ते लोकेत छे, बाकीन डील एकुत छे.

²¹ डूवा हातो काजे नी कोय सोकतला, मेसेक तारी जरुरत नी होय, एने नी पायो काजे कोय सोकतलु, “मेसेक तारी जरुरत नी होय.”

²² बाकीन डीलोन चे डीले जे दिसरा गोथा कोमजुर लागते लाव, घोणा जरूरतन छे;.

²³ इनी डीलोन जिना डीलो काजे आपनु मोनोन लायक नि सोमजतला तीनुक आपनु जादा मानतेला; एने आपनुक सोबतलो डीले एने बी घोणा शोभा वावो बोन जातलो;.

²⁴ एने बी आपनो घाटावा डीलोक तिंदरा जरुरत नि होय बाकीन परमेश्वर डील काजे ओसो बाव देतलू छे कि जिना डीलो काजे आदरोन कोमी होती तीना काजे ओवी बी मान जोळे.

²⁵ काहाकि डीलोमा फुट ते पोळे, बाकीन डील एक दिसरान बोराबोर चिंता कोरे.

²⁶ इनान कोरता ओगर एक डील तोकलीत झेले, ती आखा डील तेरे पुठी तोकलीत झेलतला; एने ओगर एक डीलोन स्तुती होयतेली, ती तेरे पुठी आखो डील खुशी कोरतेला.

²⁷ इनान कोरता तुमु आखा मेवीन मसिहन डीले छे एने ओलोग-ओलोग तेरा डीले छे.

²⁸ एने परमेश्वरोन मंडवीमा मे ओलोग-ओलोग माणसोक नेमलू छे, पेहेले प्रेषितोन दुसरू भविष्य कोरता, तीसरु मास्तर, ओवते मोटला काम कोरणे वावा, एने आरगाई आपने वावो वरदान, एने एहेसान कोरणे वावा एने शास्त्र पावणे वावा एने होर एक भाती-भातीन भाषा बुलने वावा.

²⁹ काय आखा प्रेषित छे? काय आखा भविष्य कोरता छे? काय आखा वारली खोबर आपनेवावा छे? काय आखा मोटला काम कोरणे वावा छे?

³⁰ काय आखा आरगाई आपनेन वरदान जोळलो छे? काय आखा होर भाती-भातीन भाषा बुलतला?

³¹ काय आखा ओलोग-ओलोग भाषान पारख कोरतेला? तुमु मोटा-मोटा वरदानोन हेरेमा रोयू, बाकीन मे तुमु काजे ओवी बी आखा गोथी वारली वात देखाळो.