1 कुरीन्थियो 11 - बारेली पावरी

मुनको धुवनेन बारामा

¹ तुमु मारेन तोसा चाल चालू जोसू मे मसिहन तोसु चाल चालतलु छे.

² हे भाशो मे तुमुक मदत कोरो कि आखा वातोमा तुमु मेसेक फोम कोरतेला छे; एने जी रिती रीवाज मे तुमुक सोपलु छे, तिना काजे पावतला छे.

³ बाकीन मेसेक जुवे कि तुमु यो जान लेवू कि होर एक ओदमीन मुंडको मसिह छे, एने बायरोन मुंडको ओदमी छे एने मसिहन मुंडको परमेश्वर छे.

⁴ जू ओदमी मुंडको ढाकिन प्रार्थना नीती भविष्यवाणी कोरतेलू छे, चू आपना मुंडकान अपमान कोरतेलू छे.

⁵ बाकीन जी बायर उगाळला मुंडकासी प्रार्थना नीती भविष्यवाणी कोरतेली छे, ची आपना मुंडकान अपमान कोरतेली छे, काहाकि ची टोकली होयनेन बराबर छे.

⁶ कोदि बायोर उढनी नी पांगरे ती झोटा बी काट लेये; ओगर बायरोन कोरता झोटा काटने कोरता नीती टोकलो कोरनो लाजोन वात छे, ती उढनी पांघरे.

⁷ होव, माणसो काजे आपनो मुंडको ढाकनो वारू नी होय काहाकि चू परमेश्वरोन रूप एने महिमा छे बाकीन बायर माणसोन शोभा छे.

⁸ काहाकि ओदमी बायरीसे नी होय बाकीन बायोर ओदमीसी होयली छे;.

⁹ एने ओदमी बायरोन कोरता नी तीयार कोराय गोयू, बाकीन बायर ओदमीन कोरता तीयार कोराय गोयली छे.

¹⁰ इनान कोरता सोरग दूतोन वोजेसी बायोर काजे वारू छे कि होक आपना मुंडका पोर मेके.

¹¹ ते बी प्रभूमा नी ते बायोर बिना ओदमी, एने नी ओदमी बिना बायरोन छे.

¹² काहाकि जोसो बायोर ओदमीसी छे, तोसोच ओदमी बायरोन लारे छे; बाकीन आखा चीजे परमेश्वर गोथो छे.

¹³ तुमु खुद विचार कोरु, काय बायर काजे उगाळलो मुंडके परमेश्वरोनचा प्रार्थना कोरनो सोबतलो छे?

¹⁴ काय स्वाभाविक रितीसी बी तुमु नी जानतला कि ओगर ओदमी मोटला झोटा राखे, ती हेरेन कोरता अपमान छे.

¹⁵ बाकीन ओगर बायोर नानला झोटा राखे ती हेरेन कोरता शोभा छे, काहाकि झोटा हिनी काजे उढनीन कोरता आपाय गोयला छे.

¹⁶ बाकीन ओगर कुदु वाद विवाद कोरणे हिंडे, ती यो जान लेये कि नी आमरी एने नी परमेश्वरोन मंडव्यान ओसली रिती छे.

प्रभू भजन बारामा

¹⁷ बाकीन जी आग्या आपतू जायीन मे तुमुक नी बोढावू आपो, इनान कोरता कि तुमरो एखठो होयनेसी भोलाई नी होय, बाकीन नुकसान होयतलो छे.

¹⁸ काहाकि पेहेले टेमे यो सोमोवतलु कि जेतार तुमु मंडवीमा एखठा होयतला ते बी तुमरेमा फुट पोळतेली, एने मे इनापोर थुलो-थुलोक भुरसू कोरतेलू.

¹⁹ काहाकि भेदभाव बी तुमरेमा जरूर होसे; इनान कोरता कि जे माणसे तुमरेमा खोरला छे चे देखनो जुवे.

²⁰ हिमी तुमु जे एक जागामा एखठा होयला ती यो प्रभू भोज खाणेन कोरता नि,

²¹ काहाकि खाणेन टेमे एक दिसरान पेहेले आपनो खाणो खाय लेतलू, इना रितीसी कुदू ते भुकलु रोयतलु एने कुदू मोतलोबी होय जातलू.

²² काय खाणे पिणेन कोरीन तुमरो घोर नि होय? नि ती परमेश्वरोन मंडवी काजे विटव जानतेला, एने जिंदरे जुव नि होय तीनुक लाजवाडतेला? मे तुमु काजे काय कोयो? काय इनी वातोमा तुमरी बोढाई कोरो? नि, मे बोढाई नि कोरतू.

²³ काहाकि जो वात मारेंचा प्रभू जुव गोथी पुगली, एने मे तुमरेनचा बी पुगाळ देदू कि प्रभू येसु जिने राती धोराय गोयू, रुटू लेदू,

²⁴ एने धन्यवाद कोरीन तीनाक भांग्यु एने कोयू, “जो मारो डील छे, यो तुमरेन कोरता छे मारी फोम कोरीन योत कोऱ्या कोरु.”

²⁵ इना रितीसी चू खाणेन ओवतेन प्यालू बी लेदू एने कोयू, “यु प्यालू मारा लुयमा नवलू वायदू छे जोतरा कावार पिसू, ती मारी फोम कोरीन योत कोऱ्या कोरु.”

²⁶ काहाकि जेतार कोबी तुमु यु रुटू खातला एने इना प्यालामा गोथा पितला, ती प्रभून मोत काजे जेतार तोक चू नि आवे, प्रचार कोरतेला.

²⁷ इनान कोरता जू कुदू गलत रितीसी प्रभून रुटू खाय एने तेरा प्यालामा गोथू पिये चू प्रभून डीलोन एने लुयोन गुणावू ठेरायसे.

²⁸ इनान कोरता माणूस आपना खुदो काजे पारखे एने इना रितीसी इना रुटामा गोथू खाय, एने इना प्यालामा गोथू पिये.

²⁹ काहीन खाणे पिणेन टेमे प्रभून डीलो काजे बी उवखे, चू इना खाणा एने पिना सी आपना खुदो पोर दोंड बी लावतेलु.

³⁰ इनान वोजेसी तुमरेमा लोकेत कोमजुर एने बिमार छे, एने लोकेत जोना मोरी बी गोया.

³¹ ओगर आपनु खुदो काजे पारेखता ती दोंड नि जोळतु.

³² बाकीन प्रभू आमुक दोंड आपीन आपुक शिक्षा कोरतेलु, इनान कोरता कि आपनु जोगो पुठी गुणावा नि ठेराये.

³³ इनान कोरता, हे भाशो, जेतार तुमु एखठा होयतेला ती एक दिसरान कोरता वाट जुवे.

³⁴ ओगर कुदू भुकलु होय ती आपने घोरमा खाय लेये, जीनासी तुमरो एखठो होयनो दोंडोन वजा नि होयनो जुवे, रोयला वाते मे आवीन ठीक कोरिस.