1 कुरीन्थियो 10 - बारेली पावरी

इस्राईलोन इतिहास सी चेतावनी

¹ हे भाशो मेसे काजे नी लागतलो कि तुमु इना वातोसी ओनजानला रोये कि आपना डाहा-डाहा वादवान नेचा होता एने आखान आखा दोरीयान बिचमा गोथा पार निकव्या.

² एने आखा वादवामा एने दोरीयामा, मुसान बाप्तिस्मा लेदा.

³ एने आखा एकुत आत्मिक खाणो खादा;.

⁴ एने आखा एकुत आत्मिक पाणी पीदा काहाकि चे तिना आत्मान चाफुरमा गोथा पिता होता, जू तिंदरे साते-साते चालतू होतु एने ची चाफुर येसु मसिह होतु.

⁵ बाकीन परमेश्वर तीनुमा गोथा घोणा सोवटा पोर खुश नी होतु इनान कोरता चे बोयळामा मोर गोया.

⁶ जे वाते आमरेन कोरता दाखलु ठेहेऱ्यु, कि जोसो चे लालच कोऱ्या, तोसा आपु भुंडा चीजोन लालच नी कोरजे.

⁷ एने तुमु नी मूर्ती पुजा कोरणे वावा बोनु, जोसो कि तीनुमा गोथा कोतरा जोना मूर्ती पूजा कोरण्या बोन गोयला होता, ओसो लिखलो छे, “माणसे खाणे पिणे बोश्या, एने खेलने कुदने खेल तामासू कोरणे उठ्या.”

⁸ एने नी आपु व्यभीचार कोरजे, जोसो तीनुमा गोथा कोतराक कोऱ्या; एने एक दाहळामा तेवीस होजार मोर गोया.

⁹ एने नी आपनु मसिह काजे पारखजे, जोसो तीनु मायला कोतराक कोऱ्या एने घोळसान लारे नाश होय गोया.

¹⁰ एने नी तुमु कुरकुर कोरु जिना रितीसी तीनु मायला कोतराक जोना कुरकुर कोऱ्या एने नाश कोरणे वावान लारे खतम होय गोया.

¹¹ बाकीन जे आखा वाते जी तिंदरे पोर पोळी दाहळान रिती पोर होती; एने ची आपनी चेतावनीन कोरता संसारोन आखरी टेमोमा रोयनेन टेमोमा लिखाय गोयलो छे.

¹² इनान कोरता जो सोमजे, मे पाकु छे, “चो हुशारीमा रोये कि कोदि पोळ नी जाय,

¹³ तुमु ओसी काहनली परीक्षामा मा पोळू माणसोन सोहोन कोरनेन बारथे छे, परमेश्वर खोरलु छे, एने चू ताकतसी बारथे परीक्षामा नी पोळनो देय, बाकीन परीक्षामा सहन कोरणे बाहर बी आपसे.”

मूर्ती पूजान खिलाप चेतावनी

¹⁴ इनान वोजेसी हे मारा मोंगावा भाशो, मूर्ती पूजासी वाचीन रोयू.

¹⁵ मे बुद्धिमान सोमजीन तुमु काजे कोयो जो मे कोयो तीना काजे तुमु पारखू.

¹⁶ चे धन्यवादन वाटको जीना पोर आपनु धन्यवाद कोरतेला काय येसुन लुयोन सहभागीता नी होय? चू रुटू जिना काजे आपनु भांगतेला काय चो येसु मसिहन डीलोन सोहोभागीता नी होय?

¹⁷ कि एकुत रुटू छे ती आपु बी जे जादा छे, एक डील छे, काहाकि आपु आखा तिना एकुत रुटामा भागीदार रोयतला छे.

¹⁸ जे शरीरोन भाव सी इस्राईल छे, तीनु काजे देखू, काय बलिदान काजे खुवने वावा वेदीन भागीदार नी होय?

¹⁹ पोछो मे काय कोयो? काय जी बी मूर्ती पोर चोळवाय गोयलो बलिदान काहीन छे, नीती मूर्ती काहीन छे?

²⁰ नी, बाकीन यो कि दिसरा जातीन जे बलिदान कोरतेला छे; चे परमेश्वरोन कोरता नी बाकीन भुंडली आत्मान कोरता बलिदान कोरतेला छे एने मेसेक नी जुवतो कि भुंडला आत्मान सहभागी होये.

²¹ तुमु प्रभून प्यालू एने भुंडला आत्मान प्यालामा गोथा, दुयूमा गोथा नी पी सोकतला. तुमु प्रभून मेज एने भुंडली आत्मान मेज दुयून भागीदार नी होय सोकतला.

²² काय आमु प्रभू काजे रीस देवाळतला छे? काय आमु तिना गोथा ताकत वावा छे?

मसिह आजादी

²³ आखा चीजे मारेन कोरता वारला ते छे, बाकीन आखा फायदान नी होय, आखा चीजे मारेन कोरता वारला ते छे, बाकीन आखा चीजोसी उन्नती नी होये.

²⁴ कुदू आपनी बी भोलायीन कोरता नी, बाकीन दिसरान भोलाई काजे हेरे.

²⁵ जो काय खाटेकळानचा वेचायतला छे, चो खावू एने विवेकोन वोजेसी काय मा पुछु?

²⁶ “काहाकि कोवीन एने हेरी भरपुरी प्रभू येसुन छे.”

²⁷ कोबी अविस्वास्यामा गोथू कुदू तुमुक नेवतो आपे, एने तुमुक जुवे ती जो काय तुमरे सामने मेकाय जाय चोत खावू; एने दिमाकोन वोजेसी काय मा पुछु.

²⁸ बाकीन ओगर कुदू तुमु काजे कोये, “यो ते मूर्ती काजे बलि चोळावलो चीजे छे,” ती तीना कोयने वावान वोजेसी एने दिमाकोन वोजेसी मा खावू.

²⁹ मारो मतलब तारो दिमाक नी, बाकीन तीना दिसरान. वारलो, मारी आजादी दिसरान विचारसी काहा पारखाय जाय?

³⁰ ओगर मे धन्यवाद कोरीन सहभागी होयतलु छे, ती जीना पोर मे धन्यवाद कोरतेलू छे तीना वोजेसी मारी बोदनामी काहा होयतेली?

³¹ इनान कोरता तुमु चाहे ती खावू, पिवू, जो जुवे चो कोरु, आखो काय परमेश्वरोन महिमान कोरता कोरु.

³² तुमु नी यहुदि, नी युनानी एने नी परमेश्वरोन मंडव्या कोरता ठूकरोन वोजा बोने.

³³ जोसू मे बी आखा वातोमा खुश रोयतलु छे, एने आपनो नी बाकीन जादा जोनान फायदु हेरतलु छे कि तीनुक छुटकारू जोळे.