1 कुरीन्थियो 1 - बारेली पावरीस्वागत 1 पौलुस भूनी गोथो यु परमेश्वरोन मोर्जीसी येसु मसिहन प्रेषित होयनेन कोरता बुलवाय गोयो एने भाश सोस्थिनेस तोरोफसी, 2 परमेश्वरोन तिना मंडव्यान नावे यो कुरिन्थमा छे, मतलब तिंदरा नावे ये मसिह येसुमा पवित्र कोराय गोया, एने पवित्र होयनेन कोरता बुलवाय गोयलो छे; एने हिंदरा आखान नाव बी जे होर एक जागे आमरा एने प्रभू येसु मसिहन नावोसी प्रार्थना कोरतेला छे. 3 आमरू बास परमेश्वर एने प्रभू येसु मसिहन भूनी गोथो तुमुक दया एने शांती जोळती रोये. परमेश्वर काजे धन्यवाद 4 मे तुमरा बारामा आपना परमेश्वरोन धन्यवाद हमेशा कोरतेलू, इनान कोरता कि परमेश्वरोन दया तुमरे पोर मसिह येसुमा होये, 5 कि हीनामा होयीन तुमु होर एक वातोमा, मतलब आखा वचन एने आखा ग्यानमा धोनवावा कोराय गोया. 6 कि मसिहन गोवायी तुमरेमा पाकी निकवी. 7 न्या तोक कि काहना वरदान मा तुमुक घोटी नि होये, एने तुमु आमरा प्रभू येसु मसिहन देखायनेन वाट जुवता रोयला छे. 8 चू तुमुक आखरी तोक पाकु बी कोरसे कि तुमु आमरा प्रभू येसु मसिह दाहळामा गुणावावा नि गीनाये. 9 परमेश्वर खोरलू छे, जू तुमु काजे आपनु पुऱ्यु आमरा प्रभू येसु मसिहन संगतीमा बुलावलू छे. कुरीन्थुसोन मंडवीमा दुय भाग 10 हे भाशो, मे तुमरेसी आमरू प्रभू येसु मसिहन नावसी विनता कोरो कि तुमु आखा एकुत वात कोयू, एने तुमरेमा फुट नि रोये, बाकीन एकुत मोन एने एकुत मोन होयीन मेवायला रोये. 11 काहाकि हे मारा भाशो, खोलोयान घोरानान माणसे मेसेक तुमरा बारामा कोयला छे कि तुमु झोगळायला रोयतला छे. 12 मारो कोयनेन मतलब यो छे कि तुमु तुमरेमा गोथो कुदू ते आपना खुदो काजे पौलुसोन, कुदु अपुल्लोस, कुदु, कैफान, ते कुदू, मसिहन कोयतेला छे. 13 काय मसिह वाटाय गोयू? काय पौलुस तुमरेन कोरता ख्रुस पोर चोळाय गोयू? कि तुमु पौलुसोन नावो पोर बाप्तिस्मा लेदा? 14 मे परमेश्वरोन धन्यवाद कोरो कि क्रिस्पुस एने गयुस काजे छुळीन मे तुमरे माईन कुदा काजे बी बाप्तिस्मा नी आप्यू. 15 कोदि ओसो नी होयनो जुवे कि कुदू कोये कि तुमुक मारा नावो पोर बाप्तिस्मा जोळ्यू. 16 एने होव, मे स्तेफनोन घोराना काजे बी बाप्तिस्मा आप्यू; इनुक छुळीन मे जानतलु छे कि मे ओवी कुदा काजे बाप्तिस्मा नी आप्यू. 17 काहाकि मसिह मेसेक बाप्तिस्मा आपने नी, बाकीन वारली खोबर सोमवाळने कोरीन मुकली रोयू, एने यो बी बुलोन ग्यानोन अनसारे नी, ओसो नी होयनो जुवे कि मसिहन ख्रुस बिना कामोन गीनाये. येसुन ताकत एने परमेश्वरोन ग्यान 18 काहाकि ख्रुसोन काहणी नाश होयने वावान कोरता बिना दिमाकोन छे, बाकीन आपनु छुटकारू आपनेवावान कोरीन परमेश्वरोन ताकत छे. 19 काहाकि लिखलो छे, “मे ग्यानवावान ग्यान काजे खोतम कोरीस, एने सोमोजदारोन सोमोज काजे विटोव कोर दिस.” 20 का रोयू ग्यानवावू? का रोयू शास्त्री? का रोयू इना जोगोन विवादी? काय परमेश्वर संसारोन ग्यान काजे बिना दिमाकोन नी ठेराव्यु? 21 काहाकि जेतार परमेश्वरोन ग्यानोन अनसारे जोगोन ग्यानसी परमेश्वर काजे नी जान्यो, ती परमेश्वर काजे यो वारू लाग्यो कि इना प्रचारोन बिना दिमाकोन लारे भुरसू कोरणे वावा काजे छुटकारू आपे. 22 यहुदि काजे निशाणी जुवे, एने युनानी ग्यानोन हेरमा छे, 23 बाकीन आमु ते इना ख्रुस पोर चोळावला मसिहन प्रचार कोरतेला छे, जू यहुदियान कोरता ठूकरोन वोजा एने दिसरा जातोन कोरता बिना दिमाक सारखो छे;. 24 बाकीन जे बुलावला छे, काय यहुदि काय युनानी, तिंदरे साते मसिह परमेश्वरोन ताकत एने परमेश्वरोन ग्यान छे. 25 काहाकि परमेश्वर बिना दिमाकोन माणसोन ग्यानसी ग्यानवान छे, एने परमेश्वरोन कोम ताकत माणसोन ताकतसी जादा ताकत वावा छे. येसुमा मोटाय 26 हे भाशो, आपना बुलवाय जाणो काजे ते सोचू कि नी डीलोन अनसारे जादा ग्यानवान, एने नी जादा ताकत, एने नी जादा कुलीन बुलावाय गोया. 27 बाकीन परमेश्वर जोगोन बिना दिमाक वावा काजे नेवाळ लेदलु छे कि ग्यानवावा काजे लाजवाड देये, एने परमेश्वर जोगोन कोम ताकत वावा काजे नेवाळ लेदलु छे कि ताकत वावा काजे लाजवाळे. 28 एने परमेश्वर जोगोन नेचला एने वीटवला काजे, चा ओतरा नि बाकीन जो होय बी नि तीनुक बी नेवाळ लेदलु छे कि तीनुक जो छे, बिन कामोन ठेरावे. 29 काहाकि काहनलो जोनावर परमेश्वरोन ओगोव बोढाई नी कोरनो जुवे. 30 बाकीन हेरे जुव गोथोत तुमु मसिह येसुमा छे, जो परमेश्वर जुव गोथो आमरेन कोरता ग्यान ठोऱ्यु एने मतलब धारमिकता, एने चुखला, एने छुटकारू. 31 काहाकि जोसो लिखलो छे, तोसोच होये, “जो बोढाई कोरे चो प्रभूमा मोटाय कोरे.” |
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
Beyond Translation