Yaakuuba 5 - Bible Fulfulde Bénin New Testament

Jom ceedeeɓe hakkila

¹ Jooni nanee onon jom ceedeeɓe, bullee, kalɓon gam boneeji garananɗi on.

² Jawdi mooɗon nyolii, mooƴi nyaamii gineeji mooɗon.

³ Kanŋeeri e cardi mooɗon fuunii. Fuunugo mum laatii seedaaku dow mooɗon, ɗum nyaaman ɓalli mooɗon hande yiite. Duuniyaaru ɓadake heennyugo go oon kawrita jawdi.

⁴ Nani joddi ruggooɓe gese mooɗon ɓe caliɗon yoɓugo e gaccoo on. Joomiraawo hooreejo konunkeeɓe nanii bojji maɓɓe.

⁵ Oon belbelta, on kaɗay ko'e mon goɗɗum der duuniyaaru, on paynii ko'e mooɗon gam nyalaane kirseteɗon.

⁶ On kiitake poonnitiiɗo, baruɗon mo, o saloraaki hoore makko.

Nafakka munyal

⁷ Banniraaɓe am, munyee faa Joomiraawo wara. Hande no demoowo heɗortoo leydi hokka ɗum dugge booɗɗe, o munya faa o heɓa diyam artirɗam e cakitiiɗam.

⁸ Onon bo munyee hande nun, tiiɗinee ɓerɗe mon gam garki Joomiraawo ɓattake.

⁹ Banniraaɓe, to on gaccontiree gam daɗon hiiteego. Kiitoowo e ɓadii on, emo darii dammugal!

¹⁰ Banniraaɓe am, ciwtoree annabiiɓe batunooɓe e inne Joomiraawo, ɓe munyii toora. Onon bo munyee hande no maɓɓe.

¹¹ Een bi'a tinniiɓe ɓen ɓee barkiɗinaaɓe. On nanii tinnaare Ayuba e batanee, on ji'ii bo ko Joomiraawo waɗani mo sakitiine, gam Joomiraawo laati nun mo enɗam e jom yurmeene.

¹² Amma banniraaɓe am, ko ɓuri fu, to on kunoree dow kammu e leydi. To on kunoree bo goɗɗum feere. To gooŋa nun, bi'on gooŋa, to fewre nun bo, bi'on fewre, gam to Alla hiitoo on.

¹³ E woodi toorotooɗo caka mooɗon na? O du'oo! E woodi mo ɓerne welne caka mooɗon na? O yetta Alla e jimi.

¹⁴ E woodi nyawɗo caka mooɗon na? O noddina *dottiiɓe Eklesiya ɓe moomira mo nebbam e inne Joomiraawo, ɓe du'anoo mo.

¹⁵ Du'aare gaɗiraane e goonɗinki nyawtan nyawɗo on. Joomiraawo umminan mo. To joomum waɗiino hakke bo, o yaafete.

¹⁶ Moy fu bata bannun hakkeeji muuɗum, eelana banniraawo muuɗum Alla, gam nyawtoɗon. Du'aare neɗɗo poonnitiiɗo e woodi baawɗe waɗugo kujje mawɗe.

¹⁷ *Eliya laati nun neɗɗo hande meeɗen. O du'ii e tinnaare to kammu toɓin diyam. Duuɓi tati e lebbi jeego'o, diyam sintay e leydi.

¹⁸ Ɓaawo majjum, o du'ii kade, den kammu toɓini diyam, leydi fuɗini ko ruggetee.

¹⁹ Banniraaɓe, to gooto mooɗon majjii laawol gooŋa, to goɗɗo wittinoy mo,

²⁰ annitee bittinoyɗo gaɗuɗo hakke diga laawol majjere, hisinii yonki makko e maayde, suddii hakkeeji ɗuuɗɗi.