Yaakuuba 4 - Bible Fulfulde Bénin New Testament

¹ Diga toy jeddi e kaɓe gonɗe caka mon ƴiwi? Diga e suunooji mon kaɓooji der ɓalli mooɗon bane ɗi ƴiwi?

² Oon cuunaa, amma on keɓataa, kan waɗi oon bara himɓe. Oon kaɓa, oon jeddontira, on keɓay ko jiɗuɗon gam on eelay Alla.

³ Oon eela Alla, amma on keɓataa gam suunooji ko'e mon eelirton, gam keɓon giɗaaɗi yonki mooɗon tan.

⁴ Onon ɓe holnaaki. E gooŋa, on annaa yiɗugo duuniyaaru laati nun wanyugo Alla? Jiɗɗo laataago giɗo duuniyaaru fu, waɗii hoore mum ganyo Alla.

⁵ To on miijee gam baanji Binni Ceniini wi'i: «Alla e yiɗi *Ruuhu mo o watti der meeɗen e nawniraagu.»

⁶ Alla waɗanii en moƴƴere ɓurune mawnugo, gam majjum Binni wi'i: «Alla hokkan mawnitiiɓe ɓaawo, amma o hokkan leesinɓe ko'e mum moƴƴere.»

⁷ Ɗowtanee Alla. kaɓee e *Seyɗan, o doggan on.

⁸ Ɓattee Alla, kanko bo o ɓattoto on. Onon hakkeeɓe, laaɓinee juuɗe mooɗon, onon waɗuɓe ɓerɗe ɗiɗi, laaɓinee ɓerɗe mooɗon!

⁹ Accee ɓerɗe mooɗon biisoo, cunee, bullee, jaleeɗe mooɗon laatoo bojji, welwelo mooɗon laatoo suno.

¹⁰ Leesinee ko'e mon yeeso Joomiraawo, o towinan on.

Taa hiita banniraawo

¹¹ Banniraaɓe, to on nyo'ontiree hakkune mooɗon. Nyo'uɗo bannun, naa bo hiitii mo, ƴartake sariya Alla, hiitake ka. To aa hiitoo sariya, a ɗowtantaako ka, amma a kiitotooɗo ka nun.

¹² Gooto tan woni darnuɗo sariya e kiitotooɗo: Kanko woodi baawɗe hisingo e halkugo. An, moy laatiɗaa faa kiitoɗaa banna?

To Alla e yiɗi, en kewtan jaaŋo

¹³ Onon wi'ooɓe: «Hanne naa jaaŋo, men jahan siire nee ɗo e nee to, men gaɗa ton duuɓol emen tenkoo, men keɓa riiba, gaɗee hakkillo!»

¹⁴ On annaa ko waɗata jaaŋo, ume yonki mooɗon laatii? Ki laati nun curki birnitiiki wakkatiyel gootel tan, ki yawta.

¹⁵ Nii haani bi'on: «To Joomiraawo e yiɗi, men buuran, men gaɗan ɗum ɗo e ɗum ɗo.»

¹⁶ Amma jooni, on mawnikinake, oon juro. Juro hande ŋoo ɗon fu wooɗaa.

¹⁷ Annuɗo waɗugo ko wooɗi, to waɗay ɗum, o waɗii hakke.