Yaakuuba 2 - Bible Fulfulde Bénin New Testament

¹ Banniraaɓe am, onon goonɗinɓe Joomiraawo meeɗen Yeesu *Almasiihu, Jom tedduŋal, to on ceennontiree himɓe.

² Hande jon to jom jawdiijo ɓorniiɗo gineeji ŋariiɗi warii e wattii hootande kanŋeeri der hawriine mooɗon, to talakaajo ɓorniiɗo gineeji tuunuɗi warii, kanun bo,

³ to on ji'ii ɓorniiɗo gineeji ŋariiɗi, kakkilanɗon ɗum, bi'uɗon ɗum: «Jooɗa e joonne teddune,» bi'on talakaajo bo, «dara to,» naa bo «jooɗa e leydi, ley koyɗe am.»

⁴ To on gaɗii nun, on ceennontiray himɓe der hakkillooji mooɗon na? On kiitorike e miijooji kalluɗi.

⁵ Banniraaɓe am yiɗaaɓe, kettinee! Alla bane suɓi ɓe duuniyaaru daari talakaaɓe gam o hokka ɓe jawdi gooŋaari der goonɗinki, ɓe naata *Laamaare Alla ŋu o haɓɓani yiɗuɓe mo alkawru na?

⁶ Amma onon, on leesinii talakaajo. E gooŋa, jom jawdiiɓe bane toorata on, yaara on to hiitotooɓe na?

⁷ Kamɓe bane yennata inne Yeesu wooɗune ne noddirteɗon na?

⁸ Gooŋa nun, to on tokkii sariya *Laamaare Alla gonuka e Binni Ceniini bi'uka: «Yiɗu banniraawo maa no jiɗirɗaa hoore maa.» To on tokkii ɗum, on gaɗii ko goonɗi.

⁹ Amma to on cuttontirii himɓe, on gaɗii hakke, sariya bo e holla no on boofii.

¹⁰ Gam to neɗɗo woofanii sariya Laamaare Alla goota, baa to emo tokkii koriika fu, ka fu o woofani ɗon.

¹¹ Gam Alla bi'uɗo: «Taa jeenu,» kanko nun wi'i kade: «Taa waru neɗɗo.» Jooni, baa to a jeenay, ko baruɗaa neɗɗo, a woofanii sariya fu.

¹² Batee, gaɗon hande himɓe ɓe sariya dimɗinoowa hiitoto.

¹³ Mo walaa enɗam, Alla enɗataa ɗum. Amma enɗam jaaloto kiita.

No goonɗinki hollitortoo

¹⁴ Banniraaɓe am, ume ɗum nafi to goɗɗo wi'ii e goonɗini Alla go golle makko hollitintaa emo goonɗini? Goonɗinki kin waawan ko hisini mo na?

¹⁵ To aa woodi banniraawo gorko naa debbo, go ɓee kaajaa kolte e nyaamdu,

¹⁶ to goɗɗo mooɗon wi'ii ɓe: «Jahee e jam, kolton kolte tekkuɗe, nyaamon kaaron,» ko on kokkay ɓe ko ɓe kaajaa, ume ɗum nafi?

¹⁷ Hande nun goonɗinki bo laatii. To ki walaa golle geete, kii baatuki, ki nafataa.

¹⁸ Amma goɗɗo wi'an: «An aa woodi goonɗinki; min bo, mii woodi gaɗu geetu,» mi toontoto mo: «Hollam goonɗinki maa ki walaa gaɗu geetu. Min bo diga e gaɗu am, mi hollete goonɗinki am.»

¹⁹ A goonɗinii Alla laati nun gooto na? E wooɗi! Amma baa ginnaaji bo e goonɗini ɗum faa ɗii diwna sabbu kulol!

²⁰ Ŋaaɓiiɗo! Mi hollete goonɗinki ki walaa gaɗu geetu nafataa.

²¹ Noy maama meeɗen Iburahiima waɗi go o laatii poonnitiiɗo, e gaɗu makko o laatorii ɗum no o sakki ɓiyiiko Isiyaaku dow hiisirde .

²² A yi'ii no goonɗinki Iburahiima hawtii e gaɗu na? Go gaɗu makko hebbini goonɗinki makko.

²³ Nun ka Binni Ceniini wi'i tabbitiri: «Iburahiima goonɗinii Alla, go Alla laatini mo poonnitiiɗo,» noddi mo jaadiijo mum.

²⁴ On ji'ii, no diga e gaɗu geetu neɗɗo laatortoo poonnitiiɗo, hinaa diga e goonɗinki tan.

²⁵ Hande nun bo Rahab, debbo jeenoowo, o laatake poonnitiiɗo gam gaɗu geetu ŋu o waɗi, no o jaɓɓorii lilaaɓe o walli ɓe wurtaago e laawol gonŋol.

²⁶ Hande no ɓannu nu walaa yonki laatorii maaynu, hande non bo goonɗinki ki walaa golle laatorii baakki.