Matiye 3 - Bible Fulfulde Bénin New Testament

Waaji Yuhaana gaɗoowo batisi

¹ Wakkati majjum, Yuhaana gaɗoowo *batisi suppitii. Oo waajoo der ladde haro Yahudiya, oo wi'a:

² «Tuubee, gam *Laamaare Alla faanake .»

³ Kanko nun annabi *Esaaya batani, wi'i: «Daane neɗɗo e bata dow dow, der haro, e wi'a: Moƴƴinee laawol Joomiraawo, poonnitee laabi makko !»

⁴ Yuhaana e ɓorninoo gineeji cannyiraaɗi leeɓi jeelooba, oo haɓɓii ɓelɓelol gurol dow funŋudu makko. Nyaamdu makko laatii baɓatti e juuri ladde.

⁵ Himɓe *Urusaliima, e leydi Yahudiya, e tawaaɓe takkol maayo Urdun fu, wari to makko.

⁶ Ɓe tuubi hakkeeji maɓɓe, go Yuhaana waɗi ɓe batisi der maayo Urdun.

⁷ No o yi'i *Farisaaɓe e *Sadukiiɓe ɗuuɓɓe e wara waɗeego batisi, o wi'i ɓe: «Ɓiɓɓe bolle pure! Moy tintini on doggon mone Alla waroore?

⁸ Gaɗee golle kollitooje on tuubii.

⁹ To on miilee e ɓerɗe mooɗon bi'on: ‟Iburahiima nun woni maama amen!” Gam mii wi'a on, Alla e waawi waylitingo kaaƴe, ɗe laatoo ɓiɓɓe Iburahiima!

¹⁰ Jooni, jammere ɓantaama gam feƴƴa leɗɗe faa e ɗaɗi mum. Den, leggal ŋal rimataa ɓiɓɓe booɗɗe fu wudditinte, faɗɗee der yiite.

¹¹ Min, e diyam nun gaɗiranmi on batisi, gam hollitingo on tuubi. Amma garoowo ɓaawo am, e ɓurimmi baawɗe. Mi fotay du baa jimminaago, ɓorta paɗe makko. Kanko, o waɗan on batisi e *Ruuhu Ceniiɗo, e yiite.

¹² Oo jogii besirɗum e junŋo makko, o laaɓinan fiyirde makko. O loowa gawri der rummuure makko, o wula nyaane der yiite ŋe nyifataa.»

Yeesu waɗaama batisi

¹³ Wakkati majjum, Yeesu ƴiwi *Galili, wari maayo Urdun to *Yuhaana, gam Yuhaana waɗa mo *batisi.

¹⁴ Amma Yuhaana nootaaki, wi'i: «Min nun haajaa gaɗanaa batisi, ko an nun wari to am mi waɗanee?»

¹⁵ Yeesu toontii mo, wi'i: «Noota ɗum laatoo non non jooni, gam hande non kebbinirten ko foonnitii fu.» Den Yuhaana nootii.

¹⁶ Ɗon maa ɗon, no Yeesu waɗaa *batisi, wurtii e diyam, kammu maɓɓitii. O yi'i *Ruuhu Alla e jippoo dow makko, hande tantabaraaru.

¹⁷ Ɗon daane gom nanaa dow kammu, e wi'a: «Oo ɗo nun laatii *Ɓiɗɗo am jiɗaaɗo, mo ceyoriimi.»