Matiye 16 - Bible Fulfulde Bénin New Testament

Farisaaɓe ƴamii Yeesu waɗana ɗum kayniiɗum

¹ *Farisaaɓe e *Sadukiiɓe wari jarbaago Yeesu. Ɓe ƴami mo o waɗana ɓe kayniiɗum ƴiwuɗum diga kammu.

² O toontii ɓe, o wi'i: «[To on ji'ii dow kammu e wojji kiikiiɗe, oon bi'a: ‟Nokkuuje wooɗan.”

³ Subaka bo, to on ji'ii kammu e wojji e niɓɓi, oon bi'a: ‟Diyam toɓan.” Oon anni suttontirgo ko waɗotoo dow kammu, amma on baaway suttontirgo maane wakkatiire nee ɗo!]

⁴ Himɓe jaamanuuru hallunu, coɓuɓe, e daarta kaayeefi. Ɓe ji'ataa kaayeefi gom, to hinaa kaayeefi Yonas.» Ɓaawo majjum, o acci ɓe, o yawti.

Hakkilango munaafitaare Farisaaɓe e Sadukiiɓe

⁵ No aahiiɓe jolata fonŋo maayo far to, ɓe jeggiti ko etti peen.

⁶ Yeesu wi'i ɓe: «Kakkilee, deenee ko'e mon e ƴuufinirɗum *Farisaaɓe e ɗum *Sadukiiɓe.»

⁷ Aahiiɓe darii e wi'ontira hakkune mum: «Gam en ettay peen acci oo bata ka.»

⁸ Yeesu anniti ka ɓe batata, wi'i ɓe: «Ko waɗi oon badda hakkune mon, oon batana dullere mooɗon jogaago peen? Onon ɓe goonɗinki paanɗuki!

⁹ E gooŋa faa jooni on paamay na? On ciwtoray peen joyo ko ceennanmi worɓe ujune joyo, e killaaje ɗe kebbinɗon ko horii na?

¹⁰ On ciwtoray bo peen jeeɗiɗo ko ceennanmi worɓe ujune nayo, e killaaje ɗe kebbinɗon ko horii na?

¹¹ Noy waɗi go on paamay no haala peen bane batananmi, wakkati bi'umi on, kakkilanee *ƴuufinirɗum *Farisaaɓe e ɗum *Sadukiiɓe?»

¹² Den, ɓe paami no ƴuufinirɗum conni peen bane o batanta, amma, ekkitinol *Farisaaɓe e ŋol Sadukiiɓe.

Piyer batii Yeesu nun woni Almasiihu

¹³ Yeesu yahii leydi Kaysariya Filippu. O ƴami aahiiɓe makko, o wi'i: «Moy himɓe wi'ata *Ɓii neɗɗo e laatii?»

¹⁴ Ɓe toontii mo, ɓe bi'i: «Woɓɓe e wi'a, a laati nun Yuhaana gaɗoowo *batisi. Woɓɓe e wi'a, an woni annabi Eliya. Woɓɓe kade e wi'a, an woni annabi Yeremiya, to ɗum bo gooto der annabiiɓe.»

¹⁵ Yeesu ƴami ɓe, onon bo na: «Moy bi'oton mii laatii?»

¹⁶ Simon Piyer toontii mo, wi'i: «An woni *Almasiihu, *Ɓiɗɗo Alla yonkinteejo.»

¹⁷ Den Yeesu ettitii haala wi'i mo: «Barke laatanii maa, an Simon ɓii Yonas. Gam neɗɗo bane hollitin maa ɗum, amma *Baaba am gonuɗo dow kammu hollitin maa ɗum.

¹⁸ Min bo, mii wi'ee, an woni Piyer, waato hayre. Dow hayre nen mahanmi Eklesiya am, baa joonne maayɓe waawataa ko jaalii ka.

¹⁹ Mi hokkete maɓɓitirgel *Laamaare Alla. Ko caliɗaa e leydi ɗo, salaama dow kammu. Ko jaɓuɗaa e leydi ɗo bo, jaɓaama dow kammu.»

²⁰ Den, Yeesu waggini aahiiɓe mum, e semme, wi'i to ɓe batu goɗɗo, no kanko nun woni Almasiihu.

Yeesu batanii maayde e pintol mum

²¹ Diga wakkati mum, Yeesu fuɗɗi faamingo aahiiɓe mum wi'i e haani o yaha *Urusaliima. Ton dottiiɓe e *limaamiiɓe, e *moodiɓɓe tawreeta tooroyta mo puy, ɓe bara mo. Amma nyalaane tatawre, o fintan.

²² Den, Piyer yaari mo sera, wooltani mo wi'i: «Joomiraawo, Alla haɗu ɗum! Iri majjum tawataa maa!»

²³ Yeesu yeeƴitii, wi'i Piyer: «An *Seyɗan, wittu ɓaawo am! A laati nun ko doƴƴatammi. Miilooji maa ƴiway to Alla, to himɓe ɗi ƴiwi!»

Tokkugo Yeesu

²⁴ Den Yeesu wi'i aahiiɓe mum: «Jiɗuɗo tokkugo am fu, acca miijaanaago hoore mum, etta leggal mum palaaŋal, tokkammi. ,

²⁵ Gam jiɗɗo hisingo yonki mum, dullan ki. Amma, majjinɗo yonki mum gam am, hisinan ki.

²⁶ To neɗɗo heɓii huune fu der duuniyaaru ɗo, ko yonki mum halki, ume ɗum nafi mo? Naa ume neɗɗo waawata ko hokki gam sooditaago yonki mum?

²⁷ Gam *Ɓii neɗɗo waran e tedduŋal *Baaba mum, e *malaykaaɓe mum. Den o yoɓan moy fu ko waɗi der golle mum.

²⁸ E gooŋa batanmi on, tawaaɓe ɗo, woɓɓe mum maayataa, ko ɓe ji'a Ɓii neɗɗo e warida e laamaare mum.»