Marku 1 - Bible Fulfulde Bénin New Testament

Waaju Yuhaana gaɗoowo *batisi

¹ Nani ɗo no *linjiila Yeesu *Almasiihu, *Ɓiɗɗo Alla fuɗɗiri.

² Winnaama e dewtere annabi Esaaya: «Min Alla, mi ardinante lilaaɗo am moƴƴinanoowo maa laawol.

³ Daane jagganiiɗo am e nanoo der haro e wi'a: ‟Moƴƴinee laawol gam Joomiraawo, poonnitanee mo laabi!”»

⁴ Lilaaɗo on woni Yuhaana gaɗoowo *batisi. O suppitake der haro, oo bata e daane towne, oo wi'a himɓe tuuba, waɗee batisi gam hakkeeji mum yaafee.

⁵ Leydi Yahudiya e himɓe *Urusaliima fu wari, bati hakkeeji mum, tuubi, Yuhaana waɗi ɓe batisi der maayo Urdun.

⁶ Yuhaana, toggoore ne leeɓi jeeloobi nun ɓornii, oo haɓɓii ɓelɓelol gurol e funŋudu makko, baɓatti e juuri ladde nun o nyaamata.

⁷ Oo waajoo e daane towne, oo wi'a: «Ɓurɗo am baawɗe e wara ɓaawo am, mi fotay baa jimminaago mi firta ɓoggi paɗe makko.

⁸ Min, e diyam gaɗiranmi on *batisi, amma kanko, to o warii, e *Ruuhu Ceniiɗo o waɗirta on batisi.»

No Yeesu waɗiraa batisi e no o jarboraa.

⁹ Der balɗe ɗen Yeesu ƴiwi siire Nasaratu der leydi Galili, wari, Yuhaana waɗi mo *batisi der maayo Urdun.

¹⁰ Wakkati o wurtoto der diyam, o yi'i kammu maɓɓitii, *Ruuhu Ceniiɗo e jippoo dow makko hande tantabaraaru.

¹¹ Daane gom nanaa diga dow kammu, e wi'a: «An woni *Ɓiɗɗo am jiɗaaɗo, mo belirmi ɓerne.»

¹² Ɗon maa ɗon *Ruuhu yaari mo der haro.

¹³ O waɗi ton balɗe lasoy ɗiɗi, *Seyɗan e jarboo mo, oo woni hakkune tewuuji ladde, malaykaaɓe e hiinnii mo.

Aahiiɓe Yeesu nayo arandeeɓe

¹⁴ Ɓaawo no Yuhaana nanŋaa, Yeesu wari *Galili oo waajoo *linjiila Alla.

¹⁵ Oo wi'a: «Wakkati waɗii, *Laamaare Alla ɓadake, accee hakkeeji mon, tuubee, goonɗinee *linjiila.»

¹⁶ Yeesu yahi fonŋo maayo *Galili, ɗon o yi'i Simon e minyum Andere e faɗɗa taaruwol mum der maayo, ɓe laati nun suuɓotooɓe liƴƴi.

¹⁷ Yeesu wi'i ɓe: «Tokkee am, mi waɗan on suuɓotooɓe himɓe.»

¹⁸ Ɗon maa ɗon ɓe acci taaruuji maɓɓe, ɓe tokki mo.

¹⁹ O yahi yeeso seɗɗa, o yi'i Yaakuuba ɓii Jebede e minyum Yuhaana, kamɓe bo ɓee gonii der laana, ɓee moƴƴina taaruuji maɓɓe.

²⁰ Ɗon maa ɗon o noddi ɓe. Ɓe acci baaba maɓɓe Jebede der laana kan, e wiirɓe, ɓe tokki mo.

Yeesu riiwii ginnaaru.

²¹ Ɓaawo majjum ɓe jahi siire Kafarnahum. Yeesu naati *suudu waajorde e janŋina. Nyaanne mum laati nun *nyalaane siwteteene.

²² Tawaaɓe ɗon haaynaare nanŋi ɗum e janŋinol makko, gam o janŋinirii ɓe e baawɗe, hinaa hande no *moodiɓɓe tawreeta janŋinirta.

²³ E wakkati majjum, gorko gooduɗo ginnool naati e waajorde nen, bati e semme,

²⁴ wi'i: «Yeesu mo Nasaratu, ume faali maa e amen? A warii gam halkugo men na? Mii anni mo laatiɗaa, a laati nun ceniiɗo, ƴiwuɗo to Alla!»

²⁵ Yeesu falmi ginnool ŋol, wi'i: «Jeeɗa, wurta e makko!»

²⁶ Ginnool ŋol dimmi gorko on e semme, halɓi, wurtii e makko.

²⁷ Jama'aare fu haaynaare nanŋi ɗum, e ƴamontira: «Ume nun ɗum ɗon? Janŋinol kesol nun. Oo umura e baawɗe baa e ginnaaji eɗi ɗowtanoo mo.»

²⁸ Ɗon maa ɗon habaru makko sankitii der leydi Galili fu.

Yeesu nyawtii nyawɓe ɗuuɓɓe

²⁹ No Yeesu e aahiiɓe mum wurtii waajorde, ɓe jahi wuro Simon e Andere. Yaakuuba e Yuhaana yaadi e maɓɓe.

³⁰ Esiraawo Simon debbo yontere e fukkini ɗum. No Yeesu yottii, o batanaa mo,

³¹ o ɓattii mo, o nanŋi junŋo makko, o ummini mo. Ɗon maa ɗon o yoofii, yontere nen acci mo, o ummii oo jagganoo ɓe.

³² No naaŋe muti, kiikiiɗe, himɓe waddani mo nyawɓe fu ɓe ginnaaji toorata.

³³ Siire nen fu hawriti e dammugal.

³⁴ O nyawti nyawɓe ɗuuɓɓe, ɓe nyawuuji feere feere. O riiwi ginnaaji ɗuuɗɗi, o accay ɗi ɗi bata, gam ɗii anni moy o laatii.

Yeesu e waajo der Galili.

³⁵ Fini mum Yeesu hujji diga law, yahi nokkuure feere to goɗɗo walaa e waɗa du'aare.

³⁶ Simon e wondaaɓe mum yahi e daarta mo.

³⁷ No ɓe jiiti mo, ɓe bi'i mo: «Himɓe fu e daartee.»

³⁸ Yeesu wi'i ɓe: «En jahee der genniije ɓadiiɗe mi waajoo ton bo, gam kanjum waddimmi.»

³⁹ O yahi der leydi *Galili fu, oo waajoo der baajorɗe maɓɓe, oo riiwa ginnaaji.

Yeesu nyawtii mo ceppam.

⁴⁰ Gorko mo ceppam wari, jiccii yeeso makko, eeli mo, wi'i: «To aa yiɗi, a waawan ko nyawtimmi!»

⁴¹ Yeesu yurmii mo, foorti junŋo mum, meemi mo, wi'i: «Mii yiɗi, nyawta!»

⁴² Ɗon maa ɗon, ceppam acci gorko on, o nyawtii.

⁴³ Yeesu waynii mo, waggini mo,

⁴⁴ wi'i: «Hakkil, taa batu ka goɗɗo, yahu holloy hoore maa *limaamiijo, gaɗaa sadaka ka Muusa wi'i on gaɗon, heɓa anninaa ɓe a yoofake.»

⁴⁵ Amma kanko, o yawti, o yahi oo sankita habaru ko mo waɗanaa. Ɗum waɗi faa Yeesu waawataa naata genni gom himɓe e yi'a ɗum, o darii ladde, himɓe ƴiwi nokkuuje fu e wara to makko.