Luka 7 - Bible Fulfulde Bénin New Testament

Yeesu nyawtii maccuɗo hooreejo soogeeji Roma gom

¹ No Yeesu heennyi waajaago himɓe hettinaniiɓe mo, o yahi Kafarnahum.

² Hooreejo soogeeji Roma gom e woodi maccuɗo mum jiɗaaɗo, maccuɗo on nyawi faa faani maayugo.

³ No hooreejo soogeeji on nani Yeesu e batanee, o lili *dottiiɓe *Yahuduuɓe woɓɓe gam ɓe noddanaa mo Yeesu wara nyawta maccuɗo makko.

⁴ No ɓe jottii to makko, ɓe eeli mo ɓe eeliti, ɓe bi'i: «Neɗɗo on fotii gaɗanaa mo ɗum.»

⁵ Gam oo yiɗi lenyol men, kanko nun bo waɗi juulirde men mahaa.

⁶ Go Yeesu e yahida e maɓɓe. No ɓe paani wuro, soogeeru nun lili igooɓe mum ɓe bi'a mo: «Joomiraawo, taa tooru hoore maa, mi fotay naataa wuro am.

⁷ Gam majjum daarumi mi fotay ko yahi min e hoore am to maaɗa. Amma batu haala goota tan, den maccuɗo am yoofoo.

⁸ Gam min e hoore am mii woodi ɓe ɗowtaniimi, min bo mii woodi ɗowtaniiɓe am. To mi wi'ii oo ɗo: “Yahu!” O yahan. To mi wi'i oo to: “War!” O waran bo, to mi batii maccuɗo am: “waɗu ɗum ɗo!” O waɗan ɗum bo!»

⁹ No Yeesu nani boliiɗe ɗe, haaynaare soogeeru nun waɗi mo. O yeeƴitii far to jama'aare tokkune mo, o wi'i: «Mii bata on, baa der Isira'iila, daɗey mi meeɗay ko yi'i goonɗinki iri hande kii ɗo.»

¹⁰ No lilaaɓe ɓen hooti, ɓe tawi maccuɗo soogeeru nun yoofake.

Yeesu fintinii suka debbo gowniijo gom

¹¹ Fini mum, Yeesu e yaha siire bi'eteene Nayin, aahiiɓe makko e jama'aare ɗuunne yaadi e makko.

¹² Wakkati ɓe paanii dammugal siire nen, ɓe potti maayɗo gom e yaaree uwirde. O laati nun ɓii debbo gowniijo gom bajjo. Himɓe siire nen ɗuuɓɓe mum yahi e tawdaa e makko.

¹³ No Joomiraawo yi'i debbo on, yurmeene makko waɗi mo, o wi'i: «Taa wullu!»

¹⁴ O ɓattii, o meemi pakoroowal ettirgal maayɓe, rooniiɓe mo darii, Yeesu wi'i: «Suka gorko, mii batee, umma!»

¹⁵ Maayɗo on ummii jooɗii, yanti e bata. Yeesu hokkiti mo inniiko.

¹⁶ Ɓe fu, kulol nanŋi ɓe, ɓee teddina Alla ɓee bi'a: «Annabiijo mawɗo warii hakkune men! Alla warii wallugo himɓe mum!»

¹⁷ Habaru Yeesu sankitii der Yahudiya e der ci'on piiltitiikon ton fu.

Yuhaana gaɗoowo batisi lilii aahiiɓe mum to Yeesu

¹⁸ Aahiiɓe Yuhaana fillanii mo huune ɗum fu. Yuhaana noddi ɗiɗo maɓɓe,

¹⁹ o lili ɓe to Joomiraawo gam ɓe ƴama mo ɓe bi'a: «An nun laatii garoowo naa, naa men kettinoo goɗɗo?»

²⁰ No ɓe jottii to Yeesu, ɓe bi'i mo: «Yuhaana gaɗoowo *batisi nun liloy men men ƴamee: ‟An nun laatii garoowo naa, naa men kettinoo goɗɗo?”»

²¹ Der wakkati mum, Yeesu nyawti nyawɓe ɗuuɓɓe, yoofini ɓe e nyawuuji maɓɓe, o faabii ɓe ginnaaji toorata, o wuntini bo wumuɓe ɗuuɓɓe.

²² O toontii lilaaɓe ɓen o wi'i: «Jahee pillanoɗon Yuhaana ko ji'uɗon e ko nanuɗon: wumuɓe e yi'a, laƴooɓe e yaha, sesseɓɓe e laaɓinee, pahiɗinɓe e nana, maayɓe bo e finta, talakaaɓe e batee linjiila.

²³ Barke laatanto mo woppay hoolaare mum gam am!»

²⁴ No lilaaɓe Yuhaana yawti, Yeesu yanti e bata jama'aare haala Yuhaana e wi'a: «Ume jahuɗon daaroygo der haro? Ƴommal ŋal hennu dimmata na?

²⁵ Den ume daaroyɗon? Tagaaɗo ɓorniiɗo gineeji booɗɗi na? Ɓorniiɓe gineeji booɗɗi, go e wuuri der goonnan, der wuro laamiiɓe nun ɓe gonii.

²⁶ To, kade ume jahuɗon daaroygo? Annabiijo na? Oo, mii bata on e gooŋa, oo ɓuri annabiijo.

²⁷ Gam Yuhaana laati nun mo Binni Ceniini batani. Alla wi'i: ‟Nani mii lila lilaaɗo am yeeso maa gam o moƴƴinanee laawol .”»

²⁸ Yeesu ɓeydi kade wi'i: Mii bata on: «Der ɓe rewɓe rimi fu walaa ɓuruɗo Yuhaana manŋu, amma ɓuruɗo pettiɗingo der *Laamaare Alla e ɓuri Yuhaana manŋu.»

²⁹ Himɓe hettinaniiɓe mo fu, e jaɓooɓe ceede faada, annitii no Alla laati nun poonnitiiɗo, go Yuhaana waɗani ɓe batisi.

³⁰ Amma *Farisaaɓe e *moodiɓɓe tawreeta salii Yuhaana waɗana ɗum batisi, nun ɓe calorii ko Alla yiɗannoo ɓe.»

³¹ Yeesu wi'i kade: «Ume poonniranmi himɓe jaamanuuru nuu ɗo? E moy ɓe nandi?

³² Ɓee nandi e sukaaɓe jooɗiiɓe luumo e noddontira e wi'a: ‟Men puuranii on fuuraanu, amma on pijay! Men jimanii on jimi maayde, amma on cimaaki.”

³³ Gam Yuhaana gaɗoowo batisi warii o ƴakkataa peen, o yarataa bo innabojam, amma on bi'ii: ‟O ginnaajiijo nun!”

³⁴ *Ɓii neɗɗo kan warii e nyaama e yara, amma on bi'ii: ‟O miijantaako maa nyaamɗe e jarɗe innabojam tan, o laati nun bo igo jaɓooɓe ceede faada e hakkeeɓe!”

³⁵ Amma faamu Alla e laatii gooŋa der jaɓuɓe ŋu fu.»

Yeesu yahii wuro Simon Farisaajo

³⁶ *Farisaajo gom noddini Yeesu nyaamɗe. o yahi o jooɗii ɓee nyaamda.

³⁷ Der siire nen, debbo hakkeejo gom e tawaa ɗon. No o nani Yeesu na'on nyaamda e Farisaajo on, o waddoy faanu kebbuŋol wardi,

³⁸ o darii ɓaawo Yeesu, ley koyɗe mum. Oo wulla, ko gonɗi makko e soofina koyɗe Yeesu, oo moyta gonɗi ɗii e gaasa makko, o mammilii ɗe, o misi ɗe wardi.

³⁹ No Farisaajo noddinɗo Yeesu nyaamɗe on yi'i ɗum, o wi'i der ɓerne makko: «To neɗɗo oo e laatino annabiijo, o annitanno no debbo meemoowo mo on, hakkeejo nun.»

⁴⁰ Yeesu etti haala, bati Farisaajo on wi'i: «Simon, mii woodi gokka ka batetee mi.» Simon toontii wi'i: «Batu moodibbo!»

⁴¹ Yeesu wi'i: «Himɓe ɗiɗo nun joganii goɗɗo nyamaane, oo ɗo e joganii mo hande ceede jaka golle duuɓol gootol e seɗɗa, oo to bo jaka ceede golle lewru gootol e seɗɗa.

⁴² No ɓe fu ɓe goodaa ko ɓe joɓira, o yaafanii ɓe nyamaane nen ɓe fu ɗiɗo. Moy nun e maɓɓe ɓurata yiɗugo mo?»

⁴³ Simon toontii mo: «Mii miiji mo o accani nyamaane ɗuunne nun.» Yeesu wi'i mo: «A batii gooŋa.»

⁴⁴ O waylitii far to debbo on, o wi'i Simon: «A yi'ii debbo oo ɗo, mi naatii wuro maa, a hokkay am diyam caƴƴumi koyɗe am, amma kanko, o soofini koyɗe am e gonɗi makko, o moytii ɗe e gaasa makko.

⁴⁵ A jaɓɓaaki am e mammilaaɗe, amma kanko o accay mammilaago koyɗe am diga naatumi ɗo.

⁴⁶ A waanjay nebbam e hoore am, amma kanko o waanjii wardi e koyɗe am.

⁴⁷ Gam majjum, mii wi'ee: No hakkeeji makko ɗuuɗiri fu, ɗi jaafaama, gam majjum o yiɗimmi puy. Amma jaafanaaɗo seɗɗa, yiɗan nun seɗɗa.»

⁴⁸ Go Yeesu bati debbo on wi'i: «Hakkeeji maa yaafaama.»

⁴⁹ Nyaamdannooɓe e makko yanti e wi'a der ɓerɗe mum: «Iri moy nun oo ɗo, cuusoowo yaafaago hakkeeji?»

⁵⁰ Amma Yeesu bati debbo on wi'i: «Goonɗinki maa hisinii maa, yahu e jam.»