Luka 3 - Bible Fulfulde Bénin New Testament

Waaji Yuhaana gaɗoowo batisi

¹ Wakkati Tiber, laamiiɗo Roma waɗi duuɓi sappo e joy der laamaare, Ponsu Pilaatu e laatii hooreejo leydi Yahudiya. *Eroodu bo e laatii hooreejo leydi Galili, mawniiko Filippu e laatii hooreejo Ituriya e Tarakonitis, go Lisaniyaasi e laatii hooreejo Abilenu.

² Go Annas e Kayafas e laatii hooreeɓe *limaamiiɓe. Wakkati mum nun Alla baddi Yuhaana ɓii Jekariya der haro.

³ O wari o woosii takkol maayo Urdun, oo waajoo himɓe ɓe baylitoo ɓe tuuba, ɓe gaɗanee *batisi gam hakkeeji maɓɓe yaafee.

⁴ Hande no annabi Esaaya batuno der dewtere mum wi'i: «Daane gom e bata e semme der haro e wi'a: Moƴƴinanee Joomiraawo laawol, poortee laabi makko .

⁵ Lugge fu sukkete, baalle e tepaaje fu pusete. Laabi turiiɗi fu foortete, gayɗe tawaaɗe e laabi fu sukkete.

⁶ Den himɓe fu, yi'an kisidam Alla.»

⁷ Himɓe ɗuuɓɓe e wara to Yuhaana gam o waɗana ɓe *batisi, o bati ɓe o wi'i: «Onon ɓiɓɓe bolle pure, moy tintini on doggon mone Alla waroore?

⁸ Accee kolliton diga e gaɗuuji mon no on baylitake on tuubii, to on bi'ee der ɓerɗe mon: ‟Iburahiima woni baaba amen.” Gam mii bata on e gooŋa. Alla tampataa ko etti kaaƴe ɗee ɗo, tagirana Iburahiima ɓiɓɓe.

⁹ Kakkilee! Gam jammere ettaamaa dow gam feƴƴugo leɗɗe faa e ɗaɗi mum. Leggal ŋal rimataa ɓikkol geetol fu, wudditinte, wattee der yiite.»

¹⁰ Go jama'aare ƴami mo wi'i: «Den ume nun haani men gaɗa?»

¹¹ O toontii ɓe o wi'i: «Gooduɗo toggooje ɗiɗi fu, hokkora mo woodaa woore, gooduɗo nafa bo waɗa hande nun.»

¹² *Jaɓooɓe ceede faada wari kanun bo waɗaneego *batisi, ɓe ƴami Yuhaana ɓe bi'i: «Moodibbo, ume haani men gaɗa?»

¹³ O toontii ɓe o wi'i: «To on joɓinee goɗɗo ɓura ko desanaɗon.»

¹⁴ Soogeeji bo ƴami mo wi'i: «Minon bo na, ume haani men gaɗa?» O wi'i ɓe: «To on jaɓiree goɗɗo ceede e semme, to on jammee bo goɗɗo, amma cawroree joddi mooɗon.»

¹⁵ Jama'aare e wonunoo der keɗaaki, moy fu e miilunoo Yuhaana nun laatii *Almasiihu.

¹⁶ Go Yuhaana bati ɓe wi'i: «Min, mii waɗana on *batisi e diyam, amma goɗɗo ɓuruɗo am baawɗe e wara, mi fotay du ko jimminii fitti lokkuli paɗe makko. O waɗanan on *batisi e *Ruuhu Ceniiɗo e yiite.

¹⁷ Oo jogii besirɗum e junŋo makko, o wesan gawri makko, o hawrita ni faa fiyirde laaɓa. O loowa gawri der rummuure makko, o wula nyaane der yiite ŋe nyifataa faa abada.»

¹⁸ E haalaaji ɗuuɗɗi Yuhaana waajorii himɓe *linjiila.

¹⁹ Yuhaana felii *Eroodu, gam o hoowii Erodiya debbo mawniiko, kade bo oo waɗa kalluɗum goɗɗum ɗuuɗɗum.

²⁰ *Eroodu waɗii kade ko halli ɓeydi dow ko waɗunoo: O nanŋi Yuhaana o watti der kasu.

Yeesu waɗanaama batisi

²¹ Himɓe fu e waɗanee *batisi, go Yeesu bo waɗanaa batisi. Wakkati o du'otoo, kammu maɓɓitii,

²² *Ruuhu Ceniiɗo jippii dow makko hande ɓannu tantabaraaru, go daane gom nanaa dow kammu e wi'a: «An woni *Ɓiɗɗo am jiɗaaɗo, mo ceyoriimi.»

Lenyol Yeesu

²³ Yeesu waɗii jaka duuɓi laso e sappo go o fuɗɗa golle makko, o laati nun ɓii Yusufu ɓii Heli hande no miilaa.

²⁴ Heli ɓii Matat, Matat ɓii Leewi, Lewi ɓii Melki, Melki ɓii Yannay, Yannay ɓii Yusufu,

²⁵ ɓii Matatiya, ɓii Amos, ɓii Nahum, ɓii Hesli, ɓii Naggay,

²⁶ ɓii Maata, ɓii Matatiya, ɓii Semeyen, ɓii Yosek, ɓii Yoda,

²⁷ ɓii Yo'anan, ɓii Resa, ɓii Jorobabel, ɓii Salaatiyel, ɓii Neri,

²⁸ ɓii Melki, ɓii Addi, ɓii Koosam, ɓii Elmadam, ɓii Eri,

²⁹ ɓii Yeesu, ɓii Eli'ejer, ɓii Yorim, ɓii Matat, ɓii Leewi,

³⁰ ɓii Simeyon, ɓii Yahuuda, ɓii Yusufu, ɓii Yonam, ɓii Eliyakim,

³¹ ɓii Meleya, ɓii Menna, ɓii Mattata, ɓii Natan, ɓii Dawda,

³² ɓii Yesa, ɓii Obed, ɓii Bo'es, ɓii Salmuuna, ɓii Nasuuna,

³³ ɓii Aminadab, ɓii Adimin, ɓi Arni, ɓii Hisuruuna, ɓii Fares, ɓii Yahuuda,

³⁴ ɓii Yaakuubu, ɓii Isiyaaku, ɓii Iburahiima, ɓii Tara, ɓi Nakor,

³⁵ ɓii Saruku, ɓii Ragaw, ɓii Farek, ɓii Eber, ɓii Sala,

³⁶ ɓii Kayan, ɓii Arfasada, ɓii Sem, ɓii Nuuhu, ɓii Lamek,

³⁷ ɓii Matusala, ɓii Anuhu, ɓii Yaratu, ɓii Maleliyel, ɓii Kaynan,

³⁸ ɓii Enos, ɓii Setu, ɓii Aadamu, ɓii Alla.