Korintu ɗiɗaɓol 11 - Bible Fulfulde Bénin New Testament

Pol felii lilaaɓe fewrekuuɓe

¹ Mii yiɗi munyanon am dow kaaŋal am seɗɗa. Mii anni oon munyanimmi.

² Mii woodi yidde ne nawniraagu ƴiwune to Alla dow mooɗon. Mi ɗaɓɓanii on gorko gooto, kanko woni *Almasiihu. Mii yiɗi yaarugo on to makko hande gatol ŋol annaa gorko.

³ Amma mii woodi kulol to hakkillo mooɗon waylitoo, accon yiɗugo Almasiihu e ɓerɗe goote, laaɓuɗe, nandon hande Hawwa, mo boddi ƴoyri.

⁴ To goɗɗo warii waajii on Yeesu feereejo, mo men baajaaki on, oon jaɓana mo. Oon jaɓa bo, ruuhu feerewu, ŋu on jaɓayno, ɗum bo *linjiila feereha ka men baajaaki on.

⁵ Amma mii miila, lilaaɓe mooɗon ɓe daaruɗon mawɓe ɓen, ɓuraa am der goɗɗum.

⁶ Baa to mi laataaki baawuɗo batu, mi dullay annal, men kollii on ɗum e laabi ɗuuɗɗi, e der huune fu.

⁷ No leesinmi hoore am gam mawnineɗon, baajiimi on *linjiila Alla on joɓay, gacce nun gaɗumi ɗon na?

⁸ Mi jaɓirii eklesiyaaji goɗɗi ko woodi, nootiimi ɗi joɓammi gam mi jagganoo on.

⁹ No gonunoomi to mooɗon, baa no kaajanoomi goɗɗum, mi laatanaaki goɗɗo mon dongal. Gam banniraaɓe ƴiwɓe Maseduwaan waddanii am ko kaajaami. Der huune fu, mii hakkili to mi laatana goɗɗo doongal, mi hakkilanan ɗum bo.

¹⁰ E gooŋa *Almasiihu gonuka der am, batiranmi on batu kaa: Der leydi Akaya ɗo, goɗɗo haɗataa am juroraago no mi laatanaaki on dongal.

¹¹ Gam ume gaɗumi ɗum? Gam mi yiɗaa on na? Alla e anni mii yiɗi on!

¹² Ko gaɗanmi, mi waɗan ɗum kade, gam mi maɓɓa laawol jurotooɓe e wi'a, ɓee golla hande no men gollirta.

¹³ Himɓe ɓen laati nun lilaaɓe fewrekuuɓe, gollotooɓe jammotooɓe, nandinɓe ko'e mum hande lilaaɓe *Almasiihu.

¹⁴ Ɗum haaynaaki, gam baa *Seyɗan e nandina hoore mum hande malaykaajo mo jayŋol.

¹⁵ To non non, ɗum haaynaaki to gollantooɓe mo e nandina ko'e mum hande gollantooɓe foonnitaare. Amma heennyitirde maɓɓe laatoto hande golle maɓɓe.

Tooraaji ɗi Pol heɓi

¹⁶ Mii batitoo kade: To goɗɗo daarammi hande kaaŋaaɗo. Amma to oon jiɗi, jaɓee am hande kaaŋaaɗo, gam min bo mi juro seɗɗa.

¹⁷ Ka batanmi jooni, mi batataa ka hande no Joomiraawo yiɗiri. Amma mii bata hande kaaŋaaɗo, gam mi hoolo mi heɓan ko jurortoomi.

¹⁸ No ɗuuɓɓe e juroro kujje duuniyaaru, min bo, mi waawan ko jurorii ɗe.

¹⁹ Onon wooduɓe hakkillo, oon munyana haaŋaaɓe e seyo.

²⁰ Onon ɓe Korintu, oon munyana lilaaɓe fewrekuuɓe laatina on maccuɓe, nyaama on, teeta jawdi mooɗon, yawoo on, fiya on meeƴe.

²¹ Senteene nun batiranmi ka. Asee tampere nun men kolliti ɗon! To goɗɗo suusan juroraago goɗɗum, min bo mi suusan juroraago ɗum. Hande kaaŋaaɗo nun batanmi ɗo.

²² Ɓe Iburaninkeeɓe nun? min bo mi Iburaninkeejo. Ɓe Isira'iilaaɓe nun? min bo mi Isira'iilaajo. Ɓe lenyol Iburahiima nun? min bo mo lenyol Iburahiima nun.

²³ Ɓe laati nun gollantooɓe *Almasiihu? Mii laatii ɗum ɓuri ɓe, mii bata hande kaaŋaaɗo. Mii ɓuri ɓe gollaago, mii ɓuri ɓe maɓɓeego, mii ɓuri ɓe fiyeego. De ɗuuɗɗum gonumi der kaliire maayde.

²⁴ De joyi *Yahuduuɓe fiyimmi looci lasoy ɗiɗi gootol walaa.

²⁵ De tati piyaami cabbi, de woore paɗɗaami kaaƴe. Laabi tati jooliimi der maayo e laana diyam, mi wonake jemmaare woore e nyaloomaare woore der maayo.

²⁶ Mi waɗii jahaale ɗuuɗɗe. De ɗuuɗɗum mi wonake der kaliije maayo e wuyɓe. Himɓe lenyol am e himɓe lenyi janani laatanake am kaliire. Mi wonake der kaliije der wanŋarde e der ladde, e der maayo ɓalewo, e caka banniraaɓe fewrekuuɓe!

²⁷ Mi gollake faa comumi. De ɗuuɗɗum mi ɗaanaaki, rafo e ɗonka waɗii am, mi suumake de ɗuuɗɗum. Jaaŋol waɗii am, goniimi der dullere.

²⁸ Mi batanay du ko horii. Ko jogii am de weeti fu, kan woni batu eklesiyaaji fu.

²⁹ Moy tampi ko mi tampay? Moy yani go ɗum mettinay yonki am?

³⁰ To mi juroto, tampere am jurortoomi.

³¹ Alla laatiiɗo *Baaba Yeesu Joomiraawo meeɗen e anni mi fewataa. Yettoore laatanoo mo faa abada.

³² No gonunoomi Damas, kakkilanoowo wuro laamiiɗo bi'eteeɗo Aretas, acciino himɓe reena dammuɗe siire nen, gam ɓe nanŋammi.

³³ Amma mi wurtiniraama e yulande birniwol e killaal. Nun nun daɗirmi e juuɗe makko.