Iburaninkeeɓe 1 - Bible Fulfulde Bénin New Testament

Alla baddii himɓe diga e Ɓiɗɗo mum

¹ Diga ko ɓooyi, Alla baddiino kaakiraaɓe meeɗen de ɗuuɗɗum, e laabi feere feere. O baddii ɓe diga e annabiiɓe.

² Amma der nyalaaɗe cakittiiɗe ɗee ɗo, o baddii en diga e Ɓiyiiko. E makko Alla tagiri duuniyaaru e kammu. Kanko nun bo Alla suɓi laatoo donoowo huune fu.

³ Kanko nun laatii jayŋol jalboowol, kollitoowol tedduŋal Alla, e no Alla laatii e gooŋa. Oo jogii huune fu diga e haala makko gooduka baawɗe. Ɓaawo o laaɓini hakkeeji himɓe, o jooɗake dow kammu, to nyaamo Alla mawɗo, mo tedduŋal.

Ɓiɗɗo e ɓuri malaykaaɓe

⁴ Ɓiɗɗo e ɓurii malaykaaɓe manŋu, kan waɗi Alla hokki mo inne ɓurune inɗe maɓɓe.

⁵ Malaykaajo moy nun Alla meeɗi ko wi'i: «An laatii *Ɓiɗɗo am, hanne min nun laatii *Baaba maa ?» Moy o wi'i kade: «Mi laatanto mo Baaba, kanko bo, o laatanoo am Ɓiɗɗo ?»

⁶ Kade bo, no o liloyta Afo makko e duuniyaaru, o wi'i: «Malaykaaɓe Alla fu sujidana mo .»

⁷ Dow malaykaaɓe bo Alla wi'ii: «Oo gollira malaykaaɓe makko hande keni, o waɗii ɓe jagganoo mo hande ɗelle yiite .»

⁸ Amma dow Ɓiɗɗo, o wi'i: «Laamu maa, an Alla, wonoo faa abada! A laamoranto himɓe maa e sawru foonnitaare.

⁹ Aa yiɗi foonnitaare, aa wanyi ko halli, gam majjum, Alla maaɗa suɓi ma, wuju maa nebbam seyo ɓuruŋo ŋo wonduɓe e maaɗa .»

¹⁰ O wi'i kade: «Joomiraawo, diga fuɗɗoode, an tagi leydi, juuɗe maa tagi kammu.

¹¹ Ɗum fu, ɗum halkan, amma an, a tabbitinto, ɗum fu, ɗum hiiɗɗan hande kolte,

¹² a taggan ɗum hande toggoore, ɗum waylitinte, hande kolte. Amma an, a waylitintaako. Duuɓi maa bo heennyataa .»

¹³ Alla meeɗay ko wi'i malaykaajo gom: «Jooɗa nyaamo am gam mi waɗa wanyuɓe maa laatoo jaaɓirɗum koyɗe maa .»

¹⁴ Malaykaaɓe fu laati nun ruuhuuji jaggantooɗi Alla, oo lila ɗi gam ɗi gollanoo ronooɓe kisidam.