Golle Lilaaɓe 28 - Bible Fulfulde Bénin New Testament

Pol der dunne Malta

¹ No men daɗi, men nani dunne nen wi'etee Malta.

² Himɓe ton jaɓɓii men e yidde mawne. Wakkati mum diyam e toɓa, jaaŋol bo e waɗa, go ɓe kuɓɓi yiite, ɓe noddi men men fu men aytinoo.

³ Pol hawriti leɗɗe, watti e yiite, go purdi wurtoy sabbu gulɗum, taarii junŋo makko.

⁴ No himɓe dunne nen yi'i boddi e jimmitii e junŋo Pol, ɓe bi'ontiri: «Seko walaa, gorko oo ɗo laati nun baroowo himɓe, baa no o daɗi diga maayo, tooruure meeɗen wi'eteene gooŋaaku accataa mo e yonki.»

⁵ O fiɗɗi boddi nin e yiite, ɗum tooray mo baa seɗɗa.

⁶ Ɓee miili o ɓuutan naa bo o yanan ɗon maa ɗon o maaya. Amma no ɓe keɗii faa ɓooyi, ɓe ji'i goɗɗum tooray mo, den hakkillooji maɓɓe waylitii, ɓe bi'i: «Caafeteeɗo nun.»

⁷ Ɓattii nokkuure nen nun jeyde hooreejo dunne bi'eteeɗo Pubiliyus wonnoo. O jaɓɓake men faa wooɗi, o werni men wuro makko faa balɗe tati.

⁸ Wakkati mum baaba Pubiliyus e fukkii yanɗaa, oo yontaa, reedu makko e dogga ƴiiƴam. Pol yahi to makko, du'ii, yowi juuɗe muuɗum e makko, nyawti mo.

⁹ Ɓaawo mum, nyawɓe horiiɓe wonɓe e dunne nen wari, ɓe nyawtaa.

¹⁰ Ɓe teddini men tedduŋal manŋal. No men naati laana emen jawta, ɓe jooɓini men ko men bukaa fu.

Pol yottake Roma

¹¹ Ɓaawo lebbi tati, men naati laana ƴiwuka Aleksandiriya, dabbunooka e dunne nen, men jawti. Inne ne ŋa takkanaa woni «Tooruuje ciwte .»

¹² Men jottii siire Sirakus, men gaɗi ɗon balɗe tati.

¹³ Diga ɗon men piili, men gari Regiyus. Fini mum no hennu hoore fuɗo wifi, der balɗe ɗiɗi men jottii Potiyoli.

¹⁴ Men tawi ton banniraaɓe goonɗinɓe ɓe eeli men beerana ɓe balɗe jeeɗiɗi. Nunnun jahaaŋal amen waɗiri men jottoroy Roma.

¹⁵ Banniraaɓe goonɗinɓe wonɓe Roma nananii garki amen, wari luumo Appiyus e nokkuure wi'eteene Cuuɗi Hoɓɓe Tati taɓɓitaago men. No Pol yi'i ɓe, o yetti Alla, o semmiɗini hoore makko.

¹⁶ No men jottii Roma, Pol hokkaa laawol weerugo feere muuɗum, kanko e soogeeru deenunu mo.

Pol e waajoo der Roma

¹⁷ Balɗe tati ɓaawo muuɗum, Pol noddini mawɓe *Yahuduuɓe wonɓe Roma. No ɓe kawriti, o wi'i ɓe: «Banniraaɓe! Mi waɗanay himɓe meeɗen naa bo tawaaŋal kaakiraaɓe men goɗɗum, amma mi nanŋaama *Urusaliima, gattaami e juuɗe Romankeeɓe.

¹⁸ No ɓe ƴamimmi haalaaji, ɓe jiɗiino yoofugo am, gam ɓe taway gacce e am baa goote potuɗe mi wariree.

¹⁹ Amma Yahuduuɓe salake mi yoofitee, kanjum doolimmi ƴamugo sariya am yawtinee, yaaree to Kaysara laamiiɗo, mi woodaa bo miilo gaccaago lenyol am.

²⁰ Kan waɗi ko noddumi on gam mi yi'a on, mi badda e mon. Gam tammuwe Isira'iilaaɓe kaɓɓaami callalluwol ŋol ɗo.»

²¹ Ɓe bi'i mo: «Men keɓay ɗerewol diga Yahudiya kolloowol haala maa. Kade bo goɗɗo der banniraaɓe waray bati men haala maa kalluka.

²² Amma emen jiɗi bataa men ka miiluɗaa, gam emen anni diina ka tokkuɗaa ɗo yeddete nun nokku fu.»

²³ Ɓe taƴani mo nyalaane ɓe bittoyta. No nyalaane nen yottii, ɗuuɓɓe wari, hawriti wuro to o weeri. Diga subaka faa kiikiiɗe oo waajoo ɓe haala *Laamaare Alla. Tawreeta Muusa e dewte annabiiɓe o etti o durwiri no o waawiri fu gam ɓe goonɗina Yeesu.

²⁴ Woɓɓe maɓɓe jaɓii ka o bati, woɓɓe bo goonɗinay.

²⁵ No ɓe jeddontirta eɓee cankitoroo, Pol ɓeydi haala goota kaa ɗo, wi'i: «*Ruuhu Ceniiɗo batii gooŋa no o badduno kaakiraaɓe mooɗon diga e annabi *Esaaya, o wi'i:

²⁶ “Yahu to himɓe ɓee ɗo bi'aa ɓe: On kettinto faa wooɗaa, amma on paamata. On daaran faa laaɓa, amma on ji'ataa.

²⁷ Gam himɓe ɓen ɓerne mum e yoori, ɓe cukkii noppi maɓɓe, ɓe munni gite maɓɓe, gam to ɓe ji'u e gite maɓɓe, to ɓe nanu e noppi maɓɓe, to hakkillooji maɓɓe faamu, hakko ɓe baylitoo mi nyawta ɓe .”»

²⁸ Pol wi'i kade: «Gam majjum, annee, faabuwe Alla lildaama ɓe lenyi janani, kamɓe ɓe kettinto!» [

²⁹ No Pol bati haalaaji ɗin, *Yahuduuɓe dilli e yeddontira hakkune mum e semme.]

³⁰ Pol waɗii duuɓi ɗiɗi mam mam der suudu ŋol o waɗi haya. Ɗon nun o jaɓɓotonoo warannooɓe daarugo mo fu.

³¹ Oo waajoo haala *Laamaare Alla, oo janŋina habaru Yeesu *Almasiihu Joomiraawo e hoolaare mawne, walaa kaɗuɗo mo.