Golle Lilaaɓe 26 - Bible Fulfulde Bénin New Testament

Pol e bata haala mum yeeso Agirippa

¹ Agirippa wi'i Pol: «A hokkaama haala, batu ka maa.» Den, Pol ɓanti junŋo, bati, saloroo hoore mum, wi'i:

² «Agirippa laamiiɗo, ɓerne am welii no yeeso maa calortoomi hoore am hanne dow ko *Yahuduuɓe gaccortoo am fu.

³ Gam aa anni e laaɓuɗum tawaaŋal Yahuduuɓe e jeddi maɓɓe fu. Gam majjum mii eelee, munyaa, kettinanoɗaa am.

⁴ «*Yahuduuɓe fu e anni goonki am diga gojankaaku am. Ɓee anni no gonirmi caka himɓe am e der *Urusaliima.

⁵ Ɓee annimmi diga fuɗɗoode, ɓe baawan ko seedii ɗum to ɓee jiɗi. Mi tokkuno nun laawol diina amen ɓurŋol tiiɗugo, ŋol *Farisaaɓe.

⁶ Jooni, mii hiitee gam mii woodi tammuwe dow alkawal Alla ŋal o waɗani kaakiraaɓe amen.

⁷ Alkawal ŋal nun lenyi amen sappo e ɗiɗi tammihii ɓee caafira Alla jemma e nyalooma. Agirippa laamiiɗo, gam tammuwe nen gacceteemi, Yahuduuɓe bo gaccotoo am!

⁸ Ko waɗi onon Yahuduuɓe on goonɗinay Alla waawan fintina maayɓe?

⁹ «Min e hoore am, mi miiliino mi haɓida inne Yeesu Nasaratuujo e laabi feffeere.

¹⁰ Kanjum gaɗumi *Urusaliima. Hooreeɓe *Limaamiiɓe hokkiino am baawɗe mi maɓɓa himɓe Alla ɗuuɓɓe der kasu. To ɓee baree bo, junŋo am na'on der.

¹¹ Mi toorii ɓe de ɗuuɗɗum der baajorɗe fu, mi doolii ɓe, ɓe bata kalluka dow Joomiraawo. Mone am dow maɓɓe mawnii sanne faa toorunoo mi ɓe der ci'e jananɗe.

¹² Kanjum nun jahananmi Damas, hooreeɓe *Limaamiiɓe hokkimmi laawol e baawɗe mum.

¹³ Agirippa laamiiɗo, mii woni e laawol caka nyalooma, ko ji'umi jayŋol ƴiwi dow kammu fiiltitii am, min e yahidooɓe am. Jaayŋol ŋol e ɓuri naaŋe jalbugo.

¹⁴ Men fu, men jani e leydi, nanumi daane e wi'ammi e Iburaninkeere: “Sol, Sol, ko waɗi aa toorammi? Ɗum saɗante latugo tufirgel.”

¹⁵ Ƴamumi: “An moy nun?” Joomiraawo wi'i: “Min woni Yeesu mo toorataa.

¹⁶ Umma dara, mi hollu maa nun hoore am gam mi laatinee jaggiiɗo e seedeejo ko ji'uɗaa, e ko kollitan maa mi yeeso.

¹⁷ Mi hisinte e juuɗe *Yahuduuɓe e juuɗe himɓe lenyi janani. Caka maɓɓe nun lilan maa mi

¹⁸ gam bumtinaa ɓe, kogitaa ɓe e niwre, ɓe gara der jayŋol, ɓe burtoo e junŋo Ibiliisa, ɓe gara to Alla, ɓe keɓa yaafeego hakkeeji, ɓe keɓa joonne maɓɓe e himɓe Alla gam ɓe goonɗinii am.”»

Pol e batana golle muuɗum

¹⁹ «Laamiiɗo Agirippa, kan waɗi mi salaaki nanango ko ji'umi ƴiwani am diga kammu.

²⁰ Mi artii taw baajiimi himɓe Damas den ɓe *Urusaliima e ɓe Yahudiya fu. Ɓaawo mum tokkitiimi e himɓe ɓe lenyi janani, ɓe tuuba, ɓe bittaa to Alla, ɓe gaɗa golle kollitooje ɓe tuubii.

²¹ Gam majjum nun *Yahuduuɓe nanŋimmi der suudu Alla, daarti warugo am.

²² Amma faa hanne, Alla e reenimmi. Mii seedanoo mawɓe e sukaaɓe, mi waajataako goɗɗum sey ko annabiiɓe e tawreeta Muusa wi'unoo laatoyto, waato

²³ *Almasiihu tooroto, arta maayɓe fintugo. Ɓaawo mum o waajoto haala jayŋol, hinaa himɓe meeɗen tan o waajotoo, amma bo e ɓe lenyi janani.»

Pol e bata Agirippa o goonɗina

²⁴ No Pol batata e saloro hoore mum, Festus bati dow dow, wi'i: «Pol, a haaŋa nun! Annal maa manŋal haaŋii maa!»

²⁵ Pol toontii, wi'i: «An Festus tedduɗo, mi haaŋaaka. Ko bi'anmi, laati nun haalaaji goonɗuɗi, poonnitiiɗi.

²⁶ Agirippa laamiiɗo, e anni kujje ɗe. Kan waɗi mi hulay batugo ɗum yeeso makko. Gam mii anni goɗɗum mum suuɗanaaki mo, gam ɗum waɗay e cuuccukka.

²⁷ Laamiiɗo Agirippa! Aa goonɗini annabiiɓe na? Mii anni aa goonɗini!»

²⁸ Agirippa wi'i Pol: «Law hande ninni nun miiluɗaa laatinaa am Yeesuujo!»

²⁹ Pol toontii, wi'i: «Law nun, law bane, mii eela Alla, hinaa an tan, amma an e hettinaniiɓe am ɗo hanne, laatoɗon no laatiimi baka e callalluuji ɗi kaɓɓiraami.»

³⁰ Laamiiɗo, e gomnaajo, e Berenisi, e jooɗodiiɓe e maɓɓe fu ummii.

³¹ No ɓe burtii e suudu, ɓee bi'ontira: «Gorko oo waɗay ko foti warugo ɗum naa bo ko foti maɓɓugo ɗum.»

³² Agirippa wi'i Festus: «En baawanno yoofugo mo to o wi'ayno sariya makko yaaree to laamiiɗo.»