Golle Lilaaɓe 21 - Bible Fulfulde Bénin New Testament

Pol yahii Urusaliima

¹ No men ceenniri e maɓɓe, men naati laana diyam, men jahi Kos. Fini mum, men jottii dunne Rodos, men ƴiwi ɗon, men jahi Patara.

² Men keɓi laana diyam jahoowa Finikiya, men naati ŋa, men jawti.

³ No men kolliri Kipurus men acci ni nano amen, go men poonnanii Siriya, men darii Tirus. Ɗon nun laana kan jippini dolle mum.

⁴ Men tawi ɗon goonɗinɓe, go men gaɗi ɗon balɗe jeeɗiɗi. Goonɗinɓe ɓen bati Pol e *Ruuhu Ceniiɗo to yahu *Urusaliima.

⁵ Ɓaawo balɗe jeeɗiɗi ɗen, men jawti. Ɓe fu ɓe ɗotti men faa men burti siire, kamɓe e rewɓe e sukaaɓe. Men diccii fonŋo maayo, men du'ii.

⁶ No men baynontiri, menen, men naati laana diyam, kamɓe bo ɓe kooti.

⁷ Go men keennyita yaadu amen, men naati laana diyam diga Tirus, men jahi Potolemayis. Men kiinni banniraaɓe, men baali nyalaane woore.

⁸ Fini mum, men nanŋi laawol men jottoy Kaysariya, men naati suudu Filippu baajotooɗo *linjiila, gooto der jeeɗiɗo suɓaaɓe *Urusaliima, men beerani mo .

⁹ Neɗɗo on e woodi gati naay ɗi annaa worɓe, ɗii gaɗa annabaaku.

¹⁰ No men gaɗi ɗon balɗe, Annabiijo bi'eteeɗo Agabus ƴiwi Yahudiya.

¹¹ No o wari to amen, o hocci ɓelɓelol Pol, o haɓɓi koyɗe e juuɗe mum, o wi'i: «*Ruuhu Ceniiɗo wi'i: ‟*Yahuduuɓe wonɓe Urusaliima haɓɓan jom ɓelɓelol ŋol, wattan ɗum e juuɗe heeferɓe.”»

¹² No men nani ɗum, menen e wonɓe ɗon fu, men eeli Pol to o yahu Urusaliima.

¹³ Pol toontii, wi'i: «Koni bullanton am, oon tampinammi? Min, mi siriyake, hinaa haɓɓeego tan, amma mi maaya *Urusaliima gam inne Yeesu Joomiraawo.»

¹⁴ No o salii ka amen, men acci mo, men bi'i: «Ko Joomiraawo yiɗi laatoo.»

¹⁵ Ɓaawo balɗe ɗen, men ciriyii, men jahi Urusaliima.

¹⁶ Woɓɓe der goonɗinɓe ɓe Kaysariya yaadi e amen, yaari men wuro gorko bi'eteeɗo Manason, mo Kipurus, goonɗinɗo diga ko ɓooyi ciriyiiɗo weernugo men.

Pol yahii to Yaakuuba

¹⁷ No men jottii *Urusaliima, banniraaɓe jaɓɓorii men e welwelo.

¹⁸ Fini mum men jaadi e Pol to Yaakuuba. *Dottiiɓe eklesiya fu e tawanoo ton.

¹⁹ Ɓaawo o sanni ɓe, o bati ɓe huune fu ko Alla waɗani ɓe lenyi janani diga e golle makko.

²⁰ No ɓe nani ɗum, ɓe maanti Alla. Ɓe bi'i Pol: «Banniraawo, a yi'ii *Yahuduuɓe ujuneeje ɗuuɗɗe goonɗini, ɓe fu ɓee tinnii tokkugo tawreeta Muusa.

²¹ Ɓe bataama a na'on janŋina Yahuduuɓe wonɓe hakkune lenyi janani ɓe joofa tawreeta Muusa, bi'uɗaa to ɓe juulnu sukaaɓe maɓɓe, to ɓe tokku tawaaŋal bo.

²² Jooni noy gaɗeten? Gam ɓe nanan e gooŋa a warii.

²³ Waɗu ko men bi'etee. Emen goodii ɗo worɓe nayo haɓɓanɓe Alla alkawal.

²⁴ Hawtu e maɓɓe, cenidoɗaa e maɓɓe, den joɓaa ko haani ɓe joɓa, gam ɓe pemmoo. To a waɗii ɗum himɓe ɓen fu annan ka batanteɗaa fu, gooŋa bane, ɓe annitan bo an e hoore maa, aa tokki tawreeta Muusa.

²⁵ Goonɗinɓe ɓe lenyi janani kan, men dawrii men binnani ɓe to ɓe ƴakku tew kiisanaaɗum tooruuje, to ɓe nyaamu ƴiiƴam, to ɓe ƴakku ko saaɗi, ɓe acca bo teele centiniiɗe.»

²⁶ Pol yaadi e worɓe ɓen. Fini mum o senodii e maɓɓe. O naati suudu Alla, o bati *Limaamiiɓe nyalaane de senuki ko'e maɓɓe heennyata e nyalaane ne moy maɓɓe fu waɗantee sadaka.

Nanŋoore Pol

²⁷ No balɗe jeeɗiɗi ɗen faanii hebbugo, *Yahuduuɓe ɓe leydi Asiya yi'i Pol der suudu Alla, ɓe ummini himɓe fu, ɓe nanŋi mo.

²⁸ Ɓee boola: «Isira'iilaaɓe, paabee men! Gorko oo ɗo nun janŋinta himɓe nokku fu ko luudontiri e himɓe amen e tawreeta Muusa e suudu Alla, ko ɓuri du, o naanni heeferɓe der suudu ŋol, o soɓini nokkuure ceniine!»

²⁹ Ko acci ɓe bi'i ka walaa maa gam ɓe ji'iino Torofimus Efesunkeejo e wondi e Pol der siire, go ɓe miili Pol naannu mo nun der suudu Alla.

³⁰ Siire nen fu laawontirii, himɓe e wurtoo nokku fu. Ɓe nanŋi Pol, ɓe pooɗi ɗum ɓe burtini e suudu Alla, ɓe maɓɓi dammuɗe law.

³¹ No ɓe jiɗi ɓe bara mo, habaru mum yottii hooreejo soogeeji, o bataa *Urusaliima fu na'on laawontira.

³² Ɗon maa ɗon, o hocci soogeeji e mawɓe mum, o tinnii e doggudu. No himɓe yi'i mo e soogeeji, ɓe acci fiyugo Pol.

³³ O ɓattii mo, o nanŋi mo o wi'i o haɓɓiree callalluuji ɗiɗi, o ƴami ɓe kanko woni moy, ume o waɗi.

³⁴ Der jama'aare nen, woɓɓe e woola kaa ɗo, woɓɓe kaa to. No o waaway ko nani deydey kaye nun, gam hannaare, o waɗi o yaaree far suudu soogeeji.

³⁵ No Pol yottii eencirde suudu ŋol, soogeeji hocci mo dow sabbu cattal jama'aare,

³⁶ gam himɓe ɗuuɓɓe e tokki mo e wi'a: «Baree mo!»

Ko Pol toontii ɓe Urusaliima

³⁷ No ɓe naannata mo e suudu soogeeji, Pol wi'i hooreejo on: «Mi waawan ko baddi e maa na?» O wi'i mo: «Aa nana yunaninkeere?

³⁸ An bane Misirankeejo umminnooɗo fitina ɓooyay, yaari fasotooɓe ujune nayo der haro na?»

³⁹ Pol toontii, wi'i: «Min, mi *Yahuduujo nun, mo Tarsus der leydi Silisiya, e siire annanaane. Mii ƴamee kokkaa am laawol mi badda e himɓe.»

⁴⁰ O nootanii mo. Pol darii dow eencirde, ɓanti junŋo. No ɓe deƴƴi, o bati e Iburaninkeere, o wi'i: